أخواتي العزيزات ...
بغيت منكم خدمة وان شاء الله يوفقني والقى الحل عندكم ..
اخواتي ما ادري إذا كنتون تعرفون او سمعتون عن مراضع بليتكس (playtex) والاكياس إللي تجي معاها المخصصة حق الاستخدام الواحد (Disposable Bottle)
هذا هي صورة المرضعة تجي بحجمين صغير 4 اونص وكبير 8 اونص وإللي في الصورة هو الحجم الصغير
ومعظم الاحيان تجي على شكل طقم كامل فيه اربع مراضع كبيرة وثنتين صغار ومعامهم الاكياس والحلمات وسعرهم حوالي 7 دينار او 70 ريال
هذا هو شكل الحلمات (ممكن نشتريها لحالها كمان)
هذا هو شكل الاكياس وطبعا نشتريها كل ما تخلص لان نستخدمها مرة وحدة بس بعدين نرميها
من ميزات هذي المراضع انها:
1)الاكياس مخصصة للاستخدام مرة واحدة فقط يعني ان كل مرة راح تسوين حليب لابنك راح يكون كأنك تستخدمين مرضعة جديدة لانها بتكون نظيفة ومعقمة وتستخدم للمرة الاولى ما راح تخافين انها تكون مو مغسولة او معقمة بشكل غير آمن.
2) شكل الحلمة يكون قريب جدا من شكل صدر الام وهذا شي جيد عشان الطفل ما يحس كثير بالفرق وعشان صحة اسنانه كمان وبعد بين فترة وفترة لازم نغير الحلمات إذا حسينا ان شكلها بدا يتغير
3) المرضعة مصنوعة من البلاستك يعني وزنها خفيف جدا مما يساعد على ان الطفل ما راح يلقى صعوبة في مسكها في الاشهر الاولى
4) و فيها ميزة جدا حلوة انها راح تقلل الغازات إللي راح يعاني منها طفلك لان الكيس المستخدم فيها يسمح بطرد الهواء الزايد خارج المرضعه عن طريق الضغط عليه من الاسفل ليتبقى الحليب فقط وحتى لو الطفل شرب الحليب كله وتم يمص في المرضعة بعد ما راح يشفط هواء لان الكيس بيكون فاضي من الحليب والهواء والمرضعة بتصير مثل المصاصة
من سلبيات هذي المراضع:
1) لانها مصنوعة من البلاستك ممكن ما راح تقدري تعقميها بطريقة الغلي بس انا عن نفسي استخدم الحبوب المعقمة ومرتاحة عليها لانها عملية و آمنة على صحة الاطفال على حسب علمي
2) ولانها الاكياس مصنوعة من البلاستك كمان لازم تنتظري الحليب لين يبرد إذا كان ساخن بعدين تخليه في المرضعة لان مثل ما نعرف ان الاكل الساخن مع البلاستك غير صحي
3) لازم نشتري الاكياس كل ما يخلصوا هالشي ممكن يعتبره البعض انه مصرف زيادة وهم مو ناقصين مصاريف. عندهم حق يفكروا بهالطريقة لكن لين جينا نحسب التكاليف ممكن يغيروا ر أيهم
سعر علبة تحتوي على 100 كيس هو دينارين بحريني يعني 20 ريال سعودي
لو قلنا ان راح نسوي 4 إلى 5 مرات حليب في اليوم حق البيبي يعني راح نحتاج 150 كيس في الشهر تقريبا
5*30=150 كيس
ولو قلنا راح نشتري علبتين اكياس (200 كيس) كل شهر معناها راح تكلفنا الاكياس 4 دينار شهريا يعني حوالي 40 ريال سعودي
2*20=40 ريال
بما اننا راح نحتاج إلى 150 كيس معناته راح يفضل عندنا 50 كيس للشهر الجاي
4 دينار او 40 ريال مبلغ مو كبير راح يخل بالميزانية خصوصا إذا لاحظنا مميزات الاكياس
الحين المشكلة
صار لي استخدم هذا النوع من المراضع سنة ونص حق ابني بس خلال الست الشهور إللي فاتت لاحظنا ان الصيدليات ما قامت توفر هذي النوعية من الاكياس ومن الحلمات بشكل كافي إلى ان وقفت استيرادها وسألنا معظم الصيدليات في البحرين ( أنا من البحرين) ما ليقينا حتى في بعض صيدليات السعودية ما لقينا ...
وضطرينا نشتري النوع العادي من المراضع بس الولد مو راضي يشرب منها حاولنا نعوده عليها بس ما في فايدة فطلبي يا خواتي ان إللي تعرف مكان او صيدلية يبيعوا فيه هالنوع من الاكياس او الحلمات انها تقول جزاها الله الف خير...
والله كان ودي اني اقول لكم في الموضوع عن اماكن توافر هالنوع من المراضع عشان يكمل بس ان شاء الله البنات فيهم الخير ويخبرونا وين يبيعون هالنوع.
بس اذا لقيتيهم بلغيني