مراقبه وحب إستطلاع.....وش نجني من ذلك ؟!

ابي اكتب الي يجول في خاطري مدري انا صح وغيري خطأ ولا انا خطأ وهم صح
لكن مابي اقولكم اني انا مثاليه وشوفني انا على حق انا لما كتبت قصة
حياتي كانت كلها تفريغ عن الي في قلبي لاني لما كتبتها كانت ضايقة بي الدنيا
ولقيت خوات لي في هذا المنتدى ........
وطويت صفحة الماضي لكن الي حواليني دائم يذكروني وخصوصا قريباتي وتدخلهم
بكل صغيرة وكبيرة مع اني مافتحت لهن مجال انهن يشوفن ويطلعن على حياتي
لكن يتصيدن اخطائي ويعرفن حياتي عن طريق ضرتي مادري وش الفائدة الي
بيطلعن فيها ياترى هل حب استطلاع ولاشي ثاني......
مدري انا طريقة تربية عيالي خطأ ولا صح لاني ماعودتهم ينقلون لي أي شي
او يتجسسسون على احد ........
لان قبل فترة يجون بنات زوجي مع انهم صغار يلعبون مع خواتهم لاني ماقدر امنعهم
يدخلون بيتي يلعبون ويرحون حاولت اكثر اني اقول لزوجي وابين له كان يقول هذولا بنات
صغار عادي خليهم يلعبون مع خواتهم انا مابي امنعهم عن خواتهم واعرف انهم صغار لكن
تربية امهم لهم هي تخليني اسوي كذا لدرجة مرة كنت جالسة مع زوجي في غرفة الجلوس
وجت بنتها في اول ابتدائي وصارت تناظر مع الباب لان الباب كان شبه مسكر جت بنتي
الكبيرة وشافتها قالت وش تسوين تقولي انصدمت لما شافتني وجت تركض لي على طول وتضمني
تقول بنتي انا انصدمت لما شفتها واقفة عند الباب والي صدمني اكثر ردة فعلها ماتوقعت تسوي كذا
تقول حسيتها فعلا انها ذكية تقول لو انا بمكانها ماكان سويت كذا .....
انا ابي عرف وش الفايدة من كل هذا الي تسويه مع انها لها بيت لحال لها لكن اليوم الي يكون فيه زوجي
تجيب بناتها مع انها لما يكون عندها مايطلعن وصارت في أيام الدراسة تجيبهن لما يجي زوجي انا صرت اسكت
لاني عارفه انها ماهي مرتاحة وصرت ماسوي مثلها لكن مادري وش الفائدة من ذلك......
حتى جاراتي صرت اقلل من روحتي لهن طول ماكون جالسة وهي ماتكون معنا يجلسون يقارنون بيني وبينها
حرام ليش يتزوج عليك انت احلى منها ووانت فيك كذا وهي فيها كذا مايدرون ان كلامهم لي يجرحني زيادة
طيب ليش يقارنون انا مابي يرفعون معنوياتي بالعكس تجرحني اكثر طيب يمكن انا فيني عيوب ليش دايم
يقيسون على الشكل الخارجي طيب ماهي( بغيبه) اتوقع لوكانت جالسه معنا مايتكلمون ولا راح يسون المقارنات
ولو هي كانت عندهن وانا ماني موجودة معقوله راح يتكلمن عني ويسبني........
وكل وحدة تحاول تعرف عن حياتي انا من النوع الي ماتكلم عن حياتي ومعهن رسمية بالمرة لكن مع ذلك يحاولن
حتى لما صارت عند زوجي دورة لمدة اربع شهور برى عن مدينتنا صارن يقولن ليش هي ماتروح مع زوجك
هي بناتها صغار طيب ليش التدخل التوقع لوحدة متزوج زوجها عليها ماكانت تقول الكلام هذا
والمشكله انهن متعلمات الي مدرسة وغيرها انا معمم لكن هذا الي حاصل ليش يحاولن يدخلن في علاقتنا
لدرجة مرة غيرت كنب غرفة الجلوس وراحت وحدها وقالت لضرتي روحي قولي لزوجك يغيركنب غرفة
جلوسك مايدرون انا هذا مني انا طيب وش الفائدة من ذلك........
وحتى ضرتي لها دور بذلك ليش تفتح المجال لوهي ماحافظة على اسرار البيت ماكان صارت سيرتنا عند الجارات
ومتجرئات يقولن هذا الكلام ويدخلنا بحياتنا
ليش يشعلون نار الفتنه......
قريت مرة مقوله عن عمر بن الخطاب يقول: لا تشغلوا أنفسكم بذكر الناس، فإنه بلاء ، وعليكم بذكر الله، فإنه رحمة.
كتبت موضوعي هذا ابي ردوكم وش ممكن اسوي انا ماهمني والحمدالله لكن ليش يسون كذا.......
وطبعا ماهو بكل جاراتي وقريباتي يسون كذا والله بعضهن قمة الاحترام والادب في تعاملهن معنا.......
ويمكن اتمنى ان ضرتي وجاراتي وكل وحدة تقرأ موضوعي ويعرفن بس ياترى معقولة مايتعضن ليش
يحاولن يأذن ماشاعرنا ليش الكره طيب ياترى مايدرن ان حنا نعيش ولا لا خلاص كأن صارت قلوبنا حجر
ليش يسببن لنا لآلم ليش يخلنا نرفع يدينا ونقول حسبي الله ونعم الوكيل في جوف الليل ......

يارب نسألك العافية اللهم جنبنا الظلم ان نظلم او نُظلم

سبحانكـ اللهم وبحمدكـ أشهد ان لا إله الا انت استغفركـ واتوب اليكـ