مربين كويتي ..شغل عدل مدل..بطريقتي الخاصة

أطباق رئيسية

السلام عليكم


اليوم بحط لكم طريقتي بالمربين .. وتنفع حق هالأيام ..الربيان تارس السوق

ومع البرد ..شغل عدل ...


المربين






::المقادير::

كيس ربيان 500 غرام مغسول عدل ومنقع بليمون وكركم وملح وشويه بهار ( وتخلينه بالثلاجه نص ساعه)

بصل مقطع طولي (كميه كافيه للطباخ والتزيين)

2 ثوم مدقوق / 1 مكعب ماجي / بهارات : كزبره-كركم- زنجبيل- كاري- بهار مشكل/ ملح/

1 شبنت / نص كزبره خضرا << مفرومين

طماطه كبيره مفرومه + معجون طماط + فلفل بارد مقطع

ماء مغلي/عود دارسين/4 مسمار (قرنفل) / رشه هيل ناعم/بصله مقطه ارباع/علب فلفل

عيش مغسول ومنقع




::الطريقة::

* نغسل الربيان من التتبيله - ونكون مجهزين جدر فيه

ماء مغلي/عود دارسين/4 مسمار (قرنفل) / رشه هيل ناعم/بصله مقطه ارباع والفلفل .. ولما يفوح نظيف الربيان

نخليه يغلي لمده ربع ساعه وبعدين نشخله ونحتفظ بالماي


* بجدر ثاني نسوي الحمسه ... نحط شويه زيت و نظيف البصل ولما يحمر شويه نظيف الربيان والفلفل

البارد مع البهارات ونحمسهم عدل لمده 5 دقايق .. بعدين نظيف الخضرا والطماط نحركه شويه بعدين نغطي

الجدر لمده 7-10 دقايق على نار هاديه .. وبعدين نظيف المعجون ونحرك.. وما ننسى نعدل الملح

* راح اتكون صلصه ثقيله بس لا تكون ناشفه .. (يعني اذا احتجتي ظيفي شويه ماي)

بعدين نقصر على الجوله ونغطيه ونخليه لين يتسبك شويه (10 دقايق )


* بعدين نفوح العيش بماي فوح الربيان لين اتضاعف حبه العيش ونشخله


الحين أهم شي طريقه تنسيق الخلطه والعيش


نحط الخلطه بماعون ثاني ونستخدم الجدر اللي حمسنا فيه الربيان (ما نغسله) نحط بالقاعه

نتفه زبده .. ونحط شويه عيش نغطي القاعه

الطبقه نص كميه الخلطه - بعدين نغطيها بنص كميه العيش - بعدين باقي الخلطه -

ونغطيها بباجي كميه العيش ونرش اخر شي شويه زعفران منقع ونحط بصل مقلي للتزين

ونتفه زبده على الويه


* ونرد الجدر على نار هاديه ونحط تحته حديده ونخليه 45 دقيقه وبعدين .. تنجبونه وتزينونه بالبصل المقلي


ولا تنسون الدقوس







وبالعافية


واتمنى تجربونه ويعجبكم


والى اللقاء في طبق قادم
33
93K

يلزم عليك تسجيل الدخول أولًا لكتابة تعليق.

تسجيل دخول

أنسام الليل
أنسام الليل
تسلم يدينك على الطبخه الحلوه
بس كنت بسالك انتي مستخدمه الربيان المجفف
الي يجي بكيس
وووو
يصلح اذا صلحتهااا احطهاا بحافظه يعني ما يتغير طعم الربيان
ولك جزيل الشكلر
نسررررين
نسررررين
يممممممممممم شكله يشهي ممكن طبق
روعة ألماس
روعة ألماس
يعطيك العافيه دخلت بشوف شنو المربين بس طلع روعه حفظته وباذن الله بجربه
gloos
gloos
ووووواااااو روعة ماشالله تبارك الله

تسلم ايدينك

بس الروبيان المجمد هو اللي استخدمتيه؟؟؟ وهل يحتاج تنظيف؟

جزاك الله خير
jolie_q8
jolie_q8
تسلم يدينك على الطبخه الحلوه بس كنت بسالك انتي مستخدمه الربيان المجفف الي يجي بكيس وووو يصلح اذا صلحتهااا احطهاا بحافظه يعني ما يتغير طعم الربيان ولك جزيل الشكلر
تسلم يدينك على الطبخه الحلوه بس كنت بسالك انتي مستخدمه الربيان المجفف الي يجي بكيس وووو يصلح...
يا هلا ومرحبا اختي الغاليه

الربيان المستخدم (المثلج/ المجمد)

واتمنى تجربين الطبخه اهيا وايد سهله ولذيذه بنفس الوقت

وما فهمت شنو تقصدين بالحافظه؟