مرة أخو زوجي تجرحني بدون قصد!

السلام عليكم
الحمد لله اللي اللي تعرفت على هذا المنتدى الرائع اللي خلاني أحس أني ماني بروحي بهالغربة وان لي أخوات افضفض لهم همي خصوصا أني ما احب اغث هلي بسوالفي لاني مؤ بنفس ديرتهم

سبق وكتبت موضوع لي أن لي سنتين متزوجة والحمد لله للحين الله ما كتب لي أني احمل، وقلت لكم أن أم زوجي دايما تفاتحني بهالموضوع، خصوصا بعد ما حملت مرت أخو زوجي الله يقومها بالسلامة...

لكن الحين اللي مضايقني انه مرت أخو زوجي دائماً ترسلي صور الجنين في رحمها وانه راحت المستشفى ومواعيدها وسمعت نبضات قلب الجنين الله يحفظه لها واليوم رسلت لي انه بكرة موعدها تشوف إذا بنت أو ولد واني ادعيلها يكون ولد

أنا اعرف أنها ما تقصد إلا كل خير وأني اشاركها فرحتها وتعتبرني نفس اختها بس يا رأيت حطت نفسها مكاني وحست أني محرومة من كل هالأشياء وانه لين أشوف صور الألتراساوند ادعيلها بكل خير بس بنفس الوقت تذكرني بهمي وتزيد حزني مع أنه ما شاء الله عنها خمس عيال يعني هاي مؤ فرحتها الأولى بالحمل

تعبت كل لحظه تعيشني فيها فرحتها وكل شهر ترسلي صورة للجنين بدون ما تفكر أني محرومة هالفرحة... يا ترى أنا حساسة زيادة وبديت ازودها بهالموضوع؟

الله يكتب لكل متأخرة ويكتب لي الحمل والذرية الصالحة المعافاه عاجلا وليس آجل

آسفة طولت عليكم بس مالي غيركم افضفض له