عروس

جدول رمضان كمان جميل اللهم بلغنا رمضان واجعلنا من عتقائه وربنا ييسر لك الامور قبلها ان شاء الله

Spanish Flower

يا جماعه مينفعش ان زوجك يعلق عليكي في نظافه او نظام البيت ابدااا

التعليق ده حتي ميصحش اننا نسمعه من امهاتنا مش من ازواجنا مينفعش

يعني ممكن يعلق علي لبسك
علي شعرك
علي الوان لبسك
علي تربيتك للولاد
علي اكلك
علي اي حاجه في الدنياااااااا الا النظافه و النظام و الترتيب

لازم هو اللي يفخر بيكي قدام اي حد ان بيتك زي الالف

الطرق كتيره جداااا و الجداول كتيره جداااا بس المهم انه يبقي اسلوب حياه

عجبني اوي اوي كلام زوجه مصريه و كلام ميرو و كلمه مني دموع قالتها علي موضوع السرير و ترتيبه فعلااااا هو ده اسلوب الحياه ان انتي اللي مش عاجبك كده ما شاء الله عليكم جيمعااا و لا ازكي علي الله احد و فعلا فعلاااااا لما الواحد يبتعود علب الترتيب هتلاقي نفسك لا اراديا بقت هي دي جياتك

و النماذج كثيره جدااا جدااا بس المهم انه يكون عن اقتناع انه اسلوب حياه


================================================
زوجة مصرية

زى ما قالت عروس انتوا الاتنين بتحبوا بعض...
بس أنا شايفة انكم لا تجيدوا التعبير عنه
انتوا الاتنين على موجتين مختلفين خاااااااالص..كل واحد بيرسل ويستقبل على موجة التانى مش شايفها
انتى عارفة هو عايز ايه وهو كمان ..بس مش عارفة ليه كل واحد مكسل او مستخصر ف التانى ....مش فاهمة!!!!!!!!!!
الاول هآخدك لحتة بعيدة شوية...مفيش حد فينا ما يعرفش قصة إسلام سيدنا عمر رضى الله عنه
واختصارا....لما واحد من الكفار وشى عنده باخته انها اسلمت هى وزوجها لما لقاه عمال يسب ويلعن فى الاسلام وفى سيدنا الحبيب المصطفى صلى الله عليه وسلم
اتجه لبيتها وهو ف قمة غضبه وناوى على قتلها هى وزوجها....شايفة الكفر كان عامل فيه ايه؟..وهو من هو القوى اللى بيخافه سادة قريش واهل مكة
ولطمها على وجهها حتى سال الدم منها...........ورق قلبه على اخته من منظر الدماء
ووسط الكلام ده طلب منها صحيفة القرآن "كتاب محمد " اللى كانوا بيقرأوا منها لما دخل عليهم
اخته قالت له انت مش طاهر ولازم تغتسل عشان تقرأه...ووافق!!!!!!!!!
كان رايح ازاى ووافق على ايه؟؟؟
ليه المقدمة دى....عشان أسألك السؤال ده
فيه أصعب من تحول الكافر عن كفره؟
مش سيدنا عمر ده مضرب المثل فى القوة والعزة والكبروالعند؟
يعنى الانسان ممكن يتغير حتى لو كان واصل لفين.......................... .....
انا ضد اللى يقولوا ازاى واحد ممكن يتغير بعد العمر ده
ولنفس السبب -غير انه شرعا حرام- بارفض علم التنجيم والابراج والكلام الفاضى ده
لان مفيش حد شخصيته بتكون ثابتة عشان يكون دايما مزاجيا تابع للقمر ولا المشترى ولا المريخ الاخضر والاحمر كمان...حتى لو سموه علم وبقى له جامعة كمان!!!!!!
يعنى انك تتغيرى مش صعب....واسمحى لى ده بقى فرض عليكى مش اختيار
وان جوزك يتغير مش صعب.....
مين فيكم أشد واصعب ف الخلق...اى خلق من سيدنا عمر؟
ولا زوج السيدة زينب بنت رسول الله اللى فضل على الكفر 20 سنة ،بس عشان محدش يقول من عشيرته انه ترك دين آباؤه...
والله مش فلسفة ..هو اجتهاد فى فهم معنى التغيير
كل البنات اجمعوا على انك لازم تتغيرى فيما يخص شئون بيتك واولادك ف التنظيم والترتيب
عندى جارة عندها 5 اطفالعند...مش 3 بس وف مراحل تعليمية مختلفة
وبيتها ما شاء الله لا قوة الا بالله
تحسى انه بيت عروسة جديدة..
كل يوم فيه ترتيب وتنظيم غير اليوم الاساسى للتنظيف
بس يوم اجازة زوجها بتكون فاضية تماما...مجرد تسخين وتهوية غرف البيت
وعلى فكرة...بتشتغل مدرسة مش ربة بيت يعنى
هآجى للنقطة اللى داخلة اكلمك فيها...وانتى اللى ادتينا حق الكلام والمناقشة معاكى....وسامحينى لو كلامى فيه شدة..
ليه وعارفة انى باكررها ......ليه آخدة نفسك ونازلة؟؟؟؟؟؟؟
(زوجك)..هاحطه بين قوسين دلوقتى وتحت منه عشر خطوط كده...لان غرضنا نصلح مش حاجة تانى
بس اسمحى لى انتى جاية على نفسك اوى عشانه......اوى
ايه اللى يوصلك انك تترجيه وتاخدى من ايده الشنطة
مش هو اللى ما بيحبش الدلع والكلام ده؟

انا بقول ماكانش مفروض اصلا يحصل الحوار ده...مش شئ صحى ابدا ان الحوار العادى بينكم يكون بالشكل ده يا حبيبتى....خالص
انا عارفة طبعا التقصير فيما يخص البيت بيضايق اى راجل....والنقطة دى لازم تنتهى وبأى شكل لاااااااااازم ما يبقالوش حجة فيها تانى... لازم لازم لازم
واستعينى بالدعاء والتكبير والتسبيح والتهليل ولو حسيتى بالكسل قولى لا حول ولا قوة الا بالله...كنز من كنوز الدنيا...
.بس عارفة ايه كمان مخليه يعمل كده؟...انك هاينة على نفسك
يخاصمك بالشهور وتترجيه
ما ياكلش من اكلك ..تزعلى...يا بنتى عادى سيبيه براحته وكلى واكلى اولادك..وابتسمى وقولى له الاكل النهاردة كان تحفة فاتك كتير .....
وادخلى اعملى حاجة حلوة حتى لو عصير وقدمى لولادك واشربى ولو طلب ماشى ما طلبش براحته.....عاااااادى...هو اللى اختار كده مش انتى..انتى بتعملى اللى عليكى
ايا كانت ظروفك اللى مش مضطرة تحكيهالنا اكيد
من فضلك ....افصلى شوية ...حياتك كلها بتدور فى فلكه ومداره وكأنك مشدودة بخيط ف ايديه زى عرايس الماريونيت!!!..هو شايفك كده
النوع شديد النظام والدقة من الرجال...نوع متعب جدا لو زوجته مش على نفس الوتيرة، بس ممكن يكون خير معين ومثال رائع جدا لاولادك فى الحياة ..
لو حسبتيها بالشكل ده هتلاقى نفسك بقيتى زيه وهتحبى ان ولادك يكونوا هذا الرجل.
وطبعا أكيد بيشوفك باستمرار فى حالة حزن وتعبيرات وشك كلها بتقول انك زعلانه منه وعلى نفسك وعلى الولاد...وفاكرة انه كده هيحس بيكى؟ وهييجى مثلا يقولك خلاص وما تزعليش؟
مش هيحصل...هو كده فى قمة "الأمااااااااااااااااان" من ناحيتك..شايف وبوضوح ارتباطك بيه وبالولاد مهما عمل...اكتبها تانى؟ مهما عمل
ومكبر...
انا عايزاكى تفطمى نفسك منه تدريجيا...زى ما بنفطم الولاد ونبقى قلبنا هيموت عليهم ، بس عارفين انها مرحلة وهيكون بعدها احسن لهم...
والله مش بقولك ما تحبيهوش ولا تعزيه
بالعكس ...ده زوجك وابو اولادك
لكن ما زهقتيش انك تحبى وتغفرى وتعدى وتكبرى وهو زى ما هو؟
لازم تكونى اقوى من كده
على فكرة هو لو بجد مش عايزك ...كان زمانه طاااار ومن زمان
البلاد اللى انتى فيها قانونها ومعبودها معاذ الله واستغفرك يا ربى هو النظام والدقة
ما تخليهوش يقاااااااااااااارن
ما تحسسيهوش انه مميز عنك
وحتى ف فترة التغيير بتاعتك لو لمح بانك طول عمرك كذا او كذا ما ترديش ، ولا حتى تقولى له انا باحاول...
خليه يشوف التغيير بنفسه مش كلام منك ووعود سمعها قبل كده وما اتنفذتش
او نفذتيها شوية ورجعتى تانى
انتى لو ف مصر لازم توصلى لمستواه فى النظام والدقة ف المواعيد وكل حاجة
أما وانتى ف البلد دى بقى انتى لازم تسبقيه وتعدى كمان مستواه
تظبطى ازاى مثلا دقة المواعيد....اصحى قبل الكل وجهزى حاجتك من يوم قبلها لازمممممممم ،،،،،واضبطى منبه على قبل ميعاد النزول الفعلى بنص ساعة ...فكده حتى لو اخرتى يبقى عندك وقت وفرتيه قبل الميعاد الحقيقى
هدومكم دايما مكوية وجاهزة ع اللبس -اكلك متفرزن وع التسخين-واهم حاجة كل شئ له مكان عشان ما تتعبيش ولا تضيعيش وقت ف البحث عنه...
الارادة ثم الارادة ثم الارادة......ده مفتاح الحل لمشاكلك
وحبك لنفسك
تعرفى معظم الل اتغيروا هنا اتغيروا ليه؟ وما اقصدش احنا وبس لا كل الحبايب اللى عدوا وبيعدوا ولسه هييجوا ان شاء الله
الغيرة
اه والله بجد غيرة الستات بس الحلوة مش اللى بتودى ف داهية
ما سألتيش نفسك اشمعنى كووووووووووووووووول الستات الشاطرة دول كده وانا لا؟
افرق ايه عنهم يعنى...
ما قلتيش مرة لنفسك ..والله جوزى عنده حق؟ انا فين من دول
باستفزك؟ اه بصراحة
انا مثلا عمرى ما كنت عملت بايدى اى نوع من المحاشى اللى فيها لف الكرنب وورق العنب مثلا...ويمكن زوجى ما بيحبوش اوى فكنت مكبرة، وباستمرار باشتريه جاهز على الطبخ على طول
لما لفيت ف المنتدى وشفت المبدعات اللى هنا ما شاء الله...جالى الاحساس ده
ولما جبت بنوتة كمان زاد اكتر...ما هى مش لازم تكون خايبة زى ممتها اللى هى انا !
وعملتهم ولولا ظروف الريجيم وان زوجى مش بيحبهم اوى كنت زمانى باعملهم كل يوم...لقيتنى شاطرة والله وعرفت عادى مش صعب يعنى، وكمان حسيت انى كنت بصرف كتير على بند ممكن يفيدنى ف حاجات تانية
وايه كمان ف التنظيف
حاجات معينة كنت شايفة ان دى تعملها الست اللى بتيجى لى تنضف وبس ..لقيت ناس بتحطها ف الجدول اليومى
واشتغلت الغيرة........بس الحميدة مش اللى تحسد ولا تتنمى زوال نعمة من ند حد
نصيحة ...خصصى ولو نص ساعة يوميا ولفى شوفى البنات هنا بيعملوا ايه وازاى تفاصيل التفاصيل ف النضافة والترتيب بتشغلهم...كلهم مش عايزين حد يتهم بالتقصير
وكمان بيحبوا بيوتهم
حبى بيتك يا فيميل مش عشان جوزك..عشانك انتى
حبيه عشان ده المكان اللى انتى عايشة فيه مع اولادك
حبيه واهتمى بيه لانه واجهتك..الناس بتعرفك من بيتك...مش بشياكته والله ولا بفخامة أثاثه دى اذواق....لكن بنظافته المستمرة وبنظامه
اشركى اولادك معاكى واعملى لهم جدول مكافآة للى يساعدك...عفوا..ما تكونيش سبب فى جيل جديد هيحملك زوجك برضه سبب فشلهم وعدم نظامهم
خلى فيه ركن ف البيت ليكى ...مكان يخصك انتى بس....هو مش معاكى فيه
وحطى جنبه ترابيزة صغننه عليها كتاب بيتغير كل شوية أومجلة ومش مفروض اقول مصحف لان المفروض ده موجود ف اى بيت
وخليه ركنك اللى عايزة تخلصى كل يوم اللى وراكى عشان تلحقى تجرى علي وتشربى العصير بتاعك او حبة فاكهة او كوباية ينسون
خليه يفتقدك ويفتقد لفك وراه
استقلى يا فيميل
انت كائن مستقل مش تابع
اقطعى الخيوط الحرير دى اللى بينك وبينه...الحرير رغم رقته لكن مش بيتفك بسهولة وممكن يخنق
والله يا بنتى لو لقاكى قوية وكل طلباته اللى اتفقنا انها لااااااازم تعمليها هو اللى هيجرى وراكى..هو اللى هيخاف تروحى منه مش العكس زى ما انا حاسة وشايفة من طريقة كلامه معاكى
وقصة موافقتك انه يتجوز تانى دى...دى اسمها سلبية ويأس بتريحى نفسك عشان تفضلى ف نفس الدايرة اللى بتدورى فيها
الشكوى
ضعف الإرادة
التقليل من ذاتك
هتندمى والله وتقولى يا ريتنى
مين غيرك انتى واولاده اولى به؟؟؟؟؟ احسبيها كده وقررى هتعملى ايه

================================================

miro

مع اختلاف شخصيات جوزي وجوزك لكن عندي نصيحة انا مجرباها شخصيا اوعي تفقدي ثقتك بنفسك لانك لو فقديها هو كمان هيفقد ثقته بيكي وبتقديرك للامور
يعني لازم تتغيري طبعا وتكوني مثال للزوجة والام المنظمة والنظيفة (شفتي النظام قبل النظافة )
يعني ايه كلامي ليه شقين
اولهم انك متخليهوش ليه تعليق عليكي في اي حاجة في البيت يعني اعملي اللي عليكي وكمان خليكي ناصحة(في مثل بيقول ستي لئيمة وانا الئم منها)
ازاي بقى يعني اكيد هو مش بيدور يفتش كل البيت له حتت بيركز عليها دي اول حاجة تتعمل وتكون على سنجة عشرة وكمان الترتيب اهم من التنظيف (مش معنى كده نهمل التنظيف )يعني ممكن يكون البيت مش متنظف تنظيف عميق لكن مترتب ومتلمع بيكون شكله حلو شفتي اللؤم
كمان اهتمي بالظاهر قدام عينه يعني اعملي اولويات مثلا حجرة النوم اولوياتك تكون كالاتي :
دولابه _ السرير - مفيش هدوم مرميه والقودة مترتبه ومتلمعه بس ده كل يوم
بعد كده يوم التنظيف العميق بقى يبقى كنس ومسح وغيره والدولايب ليها يوم تكوني مرتباله لكن دولابه هو يكون دايما جاهز 24/7
اديكي مثال تاني صعب
المطبخ اولوياتي فيه الارض مكنوسه والمطبخ متروق ومتلمع والمواعين مترتبه في الحوض وهي مش نظيفة لما افضي بعملها لكن اللي يدخل المظبخ يقول ده فلة هههههههههه
كل ده بيفرق مع جوزي ودايما يقولي انت مطبخك علطول نظيف ومتروق مع اني كتير مش بلحق اعمل المواعين وممكن ايبها لتاني يوم الصبح اعملها قبل ما انزل

فهمتيني ولا عايزة امثلة تانيه
اه في حاجة كمان بتريح اوي
اقفلي كل الاود وخلي اودة واحدة بس اللي فيها العيال واللعب وهاتي سلة او صندوق بلاستيك قبل ما جوزك ييجي في دقيقتين تتلم اللعب وتترمي في الصندوق ده

تاني حاجة بقى ثقتك بنفسك متتزعزعش ولا يكلف الله نفسا الا وسعها
يعني الاول وهقول تاني اعملي اللي عليكي واللي ينقص غصب عنك ومتحمليش نفسك كتير وخصوصا ادامه يعني متقوليش انك غلطانه لا دوري على مبررات زي ما هما بيعملوا
يعني معملتيش حاجة ونسيتي قوليله اي مبرر لكن متقوليلوش معلش انا غلطانه وازاي صحيح انسي كذا؟
يعني انا عملت عملة سودا النهاردة ضيعت مفاتيحي ومش عارفة هي فين (ادعولي الاقيها)
طبعا صاحبنا ما صدق وهاتك يا انتقاد واهمال مش عارفة ايه؟ قمت سكت وقلتله جلا من لا يسهو منتا كتير بتنسى حاجات بتحصل مع أي حد هدور عليها واشوف راحت فين وبعدين ده مش اهمال منى اكيد شيكو لعب في حاجتي وضيعها
راح ساكت
عندى تعليق على الجزء ده انه مينفعش مع كل الازواج فى نوع بيستفزهم اوى الجدال بالعكس لو اعتذرت باسلوب بسيط بتمتص غضبه وماتديلوش فرصة يكتر فى الكلام

كمان اعملي ترويج لنفسك قدامه بس اختاري الاسلوب المناسب
يعني انا الحمد لله دايما بيتي نضيف لولا الولاد بيبهدلوة
انا احلى حاجة فيا جسمي مثلا
الولاد مؤدبين الحمد لله تعبي معاهم جايب نتيجة الناس بتقولي ماشاء الله ولادك مؤدبين وهكذا ده بيديله ايحاء نفسي ان فعلا الكلام ده صح ومع التكرار بيصدق فعلا وهتلاقيه ابتدي يخفف انتقد ليكي
بس تكوني على قد المسئوليه

واوعي اوعي تتحايلي عليه في خناقة ولا تقللي من نفسك واعرفي ان كل ده نصيب بتترجاه او لو رافعة راسها
انت اختاري تحبي انهي
ربنا يكفينا كلنا شر الظلاق لكن انا بقوله كاوحش حاجة ممكن تحصل
هو طول الوقت بيختبرك خليكي الئم منه وافهمي كده ولاعبيه
فهميه انتي انك واثقة في نفسك وممكن تعيشي منغيره وانك معاه بس لانك بتحبيه مش علشان الولاد ولا البيت لا علشانه هو

جربي واي سؤال انا تحت امرك وحاولي تقري كتير في انماط الشخصيات

=================================================
miro

انا امبارح كنت معاكي جدا
النهاردة ضدك ومع جوزك جدا


انت جوزك بيعمل زي ما يكون دكتور نفسي بيعالج بالصدمة
انت عندك حاله من الانهيار النفسي اللي مش هيخلص غير بصفعة على الوجهه وده علاج نفسي مؤلم ومهين لكن بيدي صدمة مباشرة وبعدها الشفاء ان شاء الله
كمان جوزك بيعمل كده علشان سوري يربيكي
اوعي اوعي اوعي تتحايلي عليه

انتي يا بنتي مقرتيش اللي قلته امبارح
لو وطيتي بوستي رجله برضه مش هيرجع
احلفلك

خلاص اللي حصل حصل
الحل دلوقتي وارجوكي ركزي واقري كلامي مرتين وتلاتة

اتغيري مية وتمانين درجة
مش شعر وصبغة وهبل هو ده مهم لكن مكمل مش اساسي

اتغيري من جوة
اتغيري من جوة
اتغيري من جوة

زي ما عروس قالت بتك ثم بيتك ثم بيتك
وقبلهم نظافتك الشخصية وولادك
انت فاكرة انه راجع يديكي المفتاح انت لسه طيبة وبتفكري كده
دا راجع يشوف تاثير اللي عمله فيكي ويشوف اتغيرتي ولا لا
لقاكي زي منتي قاعدة تبكي على اللبن المسكوب
يا بنتي فوقي ارمي ورا ضهرك
هو لما حبك واتجوزك مكنتيش بتتحايلي عليه علشان يرضي ويتجوزك ده هو اللي حفى وراكي وانت متمنعة
حبي نفسك ليه تذلي نفسك كده(هو مذلكيش انت اللي حابة دور الضحية وبتذلي نفسك)

اعملي فورا جدول شامل واعتبري موتك في انك متطبيقوهوش
دخلي فيه عناية شخصية ونظافة ووقت للولاد ونيو لوك ليكي وقبل كل ده طاعة وعبادات لله

عايزاه يرجع لازم هيعدي عليكي تاني ولو لقاكي عاملة كده ومفرفشه ومش همك هيخاف ويقول دي جرالها ايه اتبسطت وانا مش موجود ليه؟
خليه يغير ويحس انه بيه او منغيره هتعيشي

عايزة ترجعيه اتحايلي على ربنا مش عليه

ازاي تتحايلي عليه وعندك رب العرش العظيم الذي ادذا قال كن فيكون الجئ اليه
ادعي ادعي ادعي
واعملي ليكي واجب كل يوم قراءة سورة ياسين بنيه رجوع زوجك والصلح لغاية ما يرجع واوعي يوم تنامي منغير الواجب ده
قولي لربنا واشتكي حالك
اللهم يا جبار السموات والارض اجبر بيني وبين زوجي
اللهم رده لي ردا جميلا
اللهم باعد بينه وبين المعاصي كما باعدت بين المشرق والمغرب
اللهم صب حبي في قلب زوجي صبا صبا وارني ذلك
اللهم انه استقوا علي بقوته على ضعفي فارني قوتك فيه وانصرني عليه
اللهم اجعلني قرة عينه
اللهم اصلحه لي واصلحني له واصلحنا لك يا رب العالمين
ادعي اكتر كمان انا مش فاكرة صيغ تانيه انت دوري
اتعبي شوية
بدل ما تتعبي في العياط والكرف نازل
اتعبي في البحث والتغيير وخلي كرفك طالع



الحقي نفسك علشانك مش عشانه معلش العيب مش فيه العيب فيكي ولو مصلحتيش من علاقتك بنفسك علاقتك بيه مش هتتصلح

ام البنات

انا حطيت المشاركات اللى جمعتها زى ماقولتلك بس عدلت فيها شوية وحذفت اسم الشخص عشان لما ااقراها احس ان الكلام موجه ليا

انا ما فهمتش طلبك الاخير انتى عايزانى ادور على ايه بالظبط؟؟؟

السلام عليكم ورحمة **** وبركاتة
ازيكم يا بنات انا و**** مش عارفة اقولكم اية دة كتير قوى انتم فرحانين ان جوزى رجع زى ماتكونو اخواتى
انا عارفة ان احنا كدة رجعنا للنقطة اللى قبل ما يمشى بردة مشاكل واختلاف فى وجهات النظر بس الحمد للة اهون من الاول
انا مش قدرت اقرا كل الكلام عايزة احفظ الجداوال بتاعة رمضان اللى انتم كاتبينها (هو رمضان جى وانا مش عارفة ولا اية)
ميرو الف سلامة على ابنك يمكن اتحسدتى يا ميرو وجت فى شيكو
روشانا شكرا على التجميع اللى كتبتية
يا بنات محدش يزعل منى لو ماتبعتكوش انتم عملتم معايا كتيييييييييييير بس انا مش هاقدر ارد كل دة رينا يجازيكم عنى كل خير