مرت سنوات من طلاقي وانا ماتغيرت انصحوني

انا مطلقه وراضيه بكتبه ربي الحمدلله وجامعيه بس ماتوظفت للحين توظفت بكذا شركه وتركتها
عندي مشكله صراحه متعبتني اني احس صرت اناظر النعم اللي عند غيري واقول ليه انا حياتي كذا ماحولي احد
باعطيك نموذج من حياتي وباترك لكم النصيحه لاني فعلاً محتاجتها
ابوي كبير بالسن ومريض وامي الحمدلله ماعليها قايمه بنفسها بس انا عندها اشوف طلباتهم والبي كل اوامرهم واقعد معهم وكل البيت انا مسؤله عنه تنظيف وطبخ وكل شي انا اقوم فيه
انا احس اني وحيده دايما
صح عندي اختي تدرس اخر سنه جامعه ومشغوله وولد اخوي بالمتوسط ساكن معنا امه وابوه منفصلين
عندنا سواق جايبينه اخواني للبيت ومخليني اهلي على راحتي اروح واجي واقضي حاجات البيت لان كل اخواني برا منطقتنا ماعندنا الا ولد اخوي اللي بثالث متوسط وكل مشاوري اخذه محرم ومره حبيب مايرفض
لو اطفش اقول وش رايك نروح مول ويوافق عادي
واحيانا اطلع انا واياه نروح نجيب عشاء ونرجع
وضعي راضيه عنه لين اجي باجتماعات قرايبي وكان فيه متزوجات اتحطم والله اني اتمنى اعيش حياتهم خصوصا اللي معهم اطفال عشقي وحبي للاطفال اشوف كيف يوكلون اطفالهم واللي تنومه واللي تلاعبه
والله ماحسدهم بس اتامل بكل حركاتهم واقول ياحظهم ماشالله كونوا اسره وانا العمر راح 31 والسنين تركض وانا واقفه بنفس مكاني مافيه تغيرات بحياتي مرت سنين من طلاقي وانا بنفس الوضع
اسال الله في هذه الساعه كل وحده تنصحني ربي يرزقها رزق حتى يرضيها ومن كانت بهم اسال الله ان يفرج همي وهمها