مرت عمي وتصرفاتها الغثيثة

مراحب بنات كيفكن
بأدخل في الموضوع ع طول لأني لا أجيد فن المقدمة
مشكلتي تصرفات مرت عمي اللي ترفع الضغط
وأولها إنها تنتقد الناس على أشياء يسونها وهي المشكلة انها تسويها
وتنصح وكثيرا ماتقع في الأشياء اللي تنصح فيها
ولا عاد الطامه الكبرى إذا قالت أنا الحمدلله ما أسوي كذا ولا منيب راعية كذا وهي تسويه
ولا غير هذا تنافس على اشياء مافيها مجال للمنافسة
طبعا بما أنها ساكنه جنبنا إذا درت أن فيه أحد من جماعتنا من طرف أبوي وعمي ساكن بمنطقة غير المنطقة اللي احنا فيها ودرت انهم بيجون تكلمهم وهم في الطريق وتناديهم تدرون ليش مو حبا فيهم ولا من طيب أصلها لا هذا من حب المنافسة على غير وجها الصحيح لأنها تخاف يمرونا
وغير ذلك تحب تمدح نفسها كثير في أن الناس يحبونها ويقدرونها وهي المشكلة اللي تتلصق فيهم لين تفرض نفسها عليهم
وتمدح نفسها بالكرم وانها كريمة وهي ماتعرفه والدليل أني مره زرتهم وكانت عندها بنتها الكبيرة وجابت القهوة والتمر وفنجالين واحد لها وواحد لبنتها تخيلوا صبت لبنتها وعطتها وصبت فنجالها وقالت لي تبين قلت طبعا لا ماأبي
وأشياء كثيرة أعد وأغلط من كثرها
بس وش رايكم فيها وفي تصرفاتها وش الحل معها لأنه صعب نواجها بعيوبها وخصوصا أذا قامت تنتقد وهي تسوي لأنا نخاف نخسر بناتها اللي هم بنات عمي لأنهم محترمات جدا ومانبي نجرحهم في أمهم