مرت ٦ سنوات من طلاقي وخايفه من المصير

سلام عليكم موضوعي للفضفضه وابي كلام يريحني
انا مر ٦ سنوات من طلاقي انفصالي من ملكه قبل الدخول يعني تطلقت قبل زواجي ،


الان انا خايفه من المصير والمستقبل كثير جدا
كل يوم عن يوم يمر اجلس افكر فيه ياترى متى بيجي نصيبي لاتقولو ميته على الزواج
قولو ميته على الزواج اذا كان عمري ١٧ و ١٨
لكن انا الا عمري على مشارف الثلاثين وفيني قلق من النصيب والمستقبل انا لاهيه بحياتي وشغلي وماحد يدري عن اللي بخاطري قدام اهلي وصديقاتي
لكن من داخلي خايفه احيان انام ولما اتقلب اتذكر اني ماتزوجت للان وافكر بالاطفال والذريه واجلس استغفر الين انام مره ثانيه
كثير اشخاص صالحين اعرفهم دعيت ربي من كل قلبي انهم يكونون من نصيبي بالحلال وتصدقت بنية هالشيء واخلصت نيتي ودعائي لله لكن ماتحققت جميع من تمنيته زوج صالح لي تزوج لكن انا ادري واعلم ان هذا الامر خيره لي من رب العالمين
لاني ادعي ياجامع الناس في يوم لاريب فيه اجمع بيني وبين فلان في الحلال ويارب اذا كان فيه خير لي يسره لي واذا فيه شر لي اصرفني عنه واصرفه عني وابدلني بخير منه ..

انا واثقه ان مابعد الصبر الا الفرج
وانا مايأست من رب العباد
بس حاسه ان ربي بيختبر صبري
وباذن الله اني صابره ومحتسبه الاجر
لكن ابن ادم احيان تجيه لحظات يتعب نفسيا فيها
ويفكر وانا كذلك تعبني التفكير
شيء خارج عن ارادتي
انا افكر ابي العوض قريب عاجل غير اجل تدرون ليه؟؟؟؟؟؟؟
لاني تعبت بحياتي وتعرضت لمواقف بحياتي ماقدر اذكرها خلت الناس تضحك علي وتتشمت فيني
وكل وحده تتزوج وتشوف حياتها اشوف بعيونها اللي حرام تطلقت وللان ماتزوجت اشوف هالشيء بعيونهم
ابي العوض يكون قريب
ابي افرح واسجد سجدة شكر ان ربي عوضني عن سنين التعب وعن شماتة الناس
ابي اشوف اثر عوض ربي لي بعيون الناس
ابي اقرا بعيونهم ان صبرت وربي عوضها ونعم بالله
ابي اشوف الفرحه بعيون ابوي وامي واخوي
ابي استقر نفسيا وهذي سنة الحياة
انا درست وتخرجت وتوظفت وملكت وانا جدا صغيره وحصل لي ظلم والان مر ٦ سنين ع طلاقي
لكن الحمدلله هالظلم خلاني قريبه من ربي كثير كثير الحمدلله
،،،،،،


كل يوم اعيشه بترقب العوض من رب العالمين
يمكن وحده منكم تدعيلي ويستجاب لها
دعاء المسلم لاخيه المسلم بظهر الغيب مستجاب


احتاج دعواتكم حبيباتي