انا بعد مافتح معي تكامل وش القصة ؟؟؟؟؟؟؟؟؟؟؟؟؟؟؟

مبروووووووك التعين ...يااااااارب يسرها انا من مكة وتعييني بالقويعية وما اعرف احد تعين فيها من مكة

ماشاء الله عليكم اغلبكم من الرياض .... يااااااارب انت العالم بحالنا يسر لنا امورنا وارزقنا من حيث لانحتسب

السلام عليكم ورحمة الله وبركاته

أنا معلمة لي سنتين بالقويعية

حبيت أشارك معكم وأوضح لكم بعض النقاط الهامه

أولا القويعية منطقة جميله وأهلها ناس فيهم دين وأخلاقهم عاليه وكريمين

طبعا القويعية 4 مناطق

القويعية تبعد عن الرياض 170 كيلو لكن بعض القرى فيها تبعد عن الرياض حوالي 250 كيلو مثل جاحد والعبده أم أثله وغيرها

الرين تبعد عن الرياض برضو 170 - 180 كيلو لكن طريقها سيد واحد رايح جاي مو مثل طريق القويعية مسارين

الرين هجرها كثييييييييره مررره كل هجره بينها وبين الثانية أقل من ربع ساعه أبعد شي حفيرة صماخ تبعد من الرياض أكثر من 250 كيلو لكن في فانات تطلع من الرياض لها

الرويضة تبعد 280 كيلو من الرياض ميزتها أن قراها متقاربه نوعا ما بس كثير أسمع عن أهلها وأعرف بنات هناك وكثير مرتاحين

الحصاة عاد هذي اللي الناس تخاف منها صح بعيدة أكثر من 300 كيلو من الرياض بس الوضع تغير الآن صار في شركات تنقل لها يوميا
في منطقة خامسة اللي هي الجلة وتبراكك هذي ما يجي فيها تعيين يكتفون بالمنقولين لها

متى نطلع أبكر شي الحصاة يطلعون من الرياض 3.30 أو 3.45 اللي بالرين والقويية والرويضة ممكن يطلعون 4.30

نوصل الظهر 2 أو 2.30 بالكثير طبعا كل ما كان بيتك أقرب لغرب الرياض أفضل اللي يطلعون بدري ويوصلون متأخر هم اللي بشرق الرياض أو شمالها لأنهم وهم راجعين يدخلون بزحمة الرياض

اللحين أتمنى أني وضحت شي بسيط عن المناطق وأنا أنصح كل وحدة تدخل منتدى التربية والتعليم بموقع القويعية أرض الذهب وتشوف المناطق موضحه بتفاصيل أكثر

بخصوص المقابلة الآن بتتوجهون للإدارة وبتصلحون المقابلة واللي الهدف منها قياس سلامة الحواس والشخصية بشكل عام فقققققط ولا لها أي علاقة بالتوظيف أسئلة عامه ثقافية كم سؤال بسيط بالتخصص تسألك عن طرق التدريس وأقرأوا عنها مثل القبعات الست التعليم التعاوني استخدام الحاسب وهالأشياء بس عشان تثبتين أنك فاهمه ومتحمسة للمهنه في أسأله ثانية تقيس الشخصية مثل رأيك بالإعجاب كيف تتصرفين لو طالبة أعجبت فيك

تطلعين من لجنة المقابلة وتتوجهين لمسوغات التعيين تعطينهم صور شهاداتك ويعطونك الكشف الطبي تصلحينه بمستشفى القويعية تحليل دم بس وبيشوفك الدكتور عشان النظر والسمع والعظام أصلا ما يكشف عليك وانتي جالسه يعبيه وبعد أسبوع تأخذينه من المستشفى وتعطينه الإدارة اللي أجريتي فيها المقابلة

بعدها يمكن بشهر يستدعونك لتعبئة المدارس الموظفة تعطيك الخيارات اللي فيها تخصصك وتعبينها وتباشرين بأول يوم بإذن الله

أنصح نفسي والجميع بالأخلاق العاليه والتعاون لأنك بديرة مو ديرتك أحرصي أنك تعكسين صور مشرفة عن قبيلتك ومنطقتك

بشكل عام انصح اللي بالرياض ما يسكنون بالقويعية المنطقة قريبه وفي فانات تنقل يوميا وقيمة النقل 1500 إلى 1800 شهريا

أسمع أن السكن بسكن المعلمات كويس
واللي تقول أنها من الطايف تحط رغباتها الخاصرة وحلبان تقريبا 200 كيلو عن الطايف والإدارات بالهجر والقرى متساهله لأن أعداد الطالبات قليلة

أتمنى للجميع التوفيق وبإذن الله راح أكون موجوده وأجاوب على الاستفسارات اللي أعرفها واللي تبي أرقام فانات بأعطيها إن شاء الله بس أعذروني هالأسبوعين لو تأخرت لأن عندي ظروف بس إن شاء الله أرد أول بأول دعواتي للجميع بالتوفيق

جزاك الله خير ياعسل طيب فيه بنات من مكه