من زمان مانزلت طبخاتي رغم اني دايم مسنتره بقسم الطبخ
اليوم جبت لكم مرقوقي اللذيذ
المقادير /
خمس رقاق بر خاصه بالمرقوق من محلات القرصان امي الله يسعد قلبها تقول هذا مرقوق الرفلات لانها هي تعجنه وترقه بيدها ماشاء الله بس ماوصلت لمهارتها ..
ملح وبهارك المطحون مقدار ملعقه صغيره وعودين قرفه ولومي اسود حبه وقرنين فلفل اخضر وشوي كركم وشوي زيت لحمس البصل
خضار مشكله قرع اصفر او اخضر باذنجان جزر فاصوليا
حبتين طماطم وبصله مفرومين
احمسي البصل والطماطم بالزيت لين يذبلون ضيفي الفلفل وبهاراتك العدله والمطحونه وملحيهم وضيفي قطع لحم مقطعه حجم مناسب انا احبها صغار عشان تنوكل مع اللقمه
ضيفي شوي صلصه وشوي كركم وقلبيهم وضيفي الماء المغلي عليهم لين يستوي اللحم ضيفي الخضار الي تطول بالاستواء واذا استوت نص استواء ضيفي الرقاق بعد تقطيعها وقصري النار وانتي تضيفين الرقاق حركي عشان ماتلزق ببعض
قلبيهم وضيفي باقي خضارك الي تستتوي بسرعه وقصري عليه النار لين يستوي
واخيراً قدميه ورشي عليه سمنه وفلفل اسود وعوافي عليكم .....
لكل ديره طريقه بعضهم يسويه بدجاج وبعضهم يفرد العجينه ويقطعه مربعات وبعضهم يخلط البر بدقيق بس احنا هذي طريقتنا