السلام عليكم ور حمة الله و بركاته ..
شلونكم يالطيبات ؟ يالله لي زمآآآآآآآآآآآآآآآآآآن عن عالم حواء ! وحشتوني !
شلونكم مع الحساسية و الغبار :44:
الحساسية لي خبرة فيها .. من يوم وعمري سنتين ..!
ثم أن أهلي ما أعتنوا فيني بالمرة لأنهم يحسوبنها شي بسيط ! وهي للأسف شيء ممكن يقلب الحياة كابوس ! خصوصاً إذا أهملتوها !
أنا - محدثتكم - مصابة بالحساسية ..طبعاً الأجواء ما تساعد .. الحمدلله
وزدت الطين بله زي مايقولون وراحوا أهلي دوره عسكرية للطائف .. والطائف مدينة زراعية .. فمنتشر بها غبار الطلع فيسبب الحساسية أكثر .. فرجعت أسوأ من قبل ..
الطلع + الغبار = الله يرحم حالي أنا :44:
تدهورت عندي الحساسية .. الله يشفي الجميع ..
لكني جربت بعض الأشياء الي خلينا نقول خففت عني و ساعدتني .. فكل وحدة عندها أطفال تعبانيني أو مافيهم شي وتحب تمنع عنهم الحساسية او هي نفسها مصابة بالربو و الحساسية ممكن تستفيد ..
1- الحرص على النفسية الجيدة .. فكل مرة أغضب بها أنتهي بقسم الطوارئ و الأكسجين على وجهي !
2- الحرص على الوضوء و الإستنفار والإستنشاق جيداً .. لأنها تغسل الجيوب الأنفية و تعقمها .. ويكون الماء دافيء
3- تنقيع المرة بالموية و تستنشق زي الوضوء .. تعقم المجاري التنفسية .. وهي ممكن تنشرب فتعطي مفعول المضاد الحيوي ..
4- محاولة البعد قدر الإمكان عن الأدوية و الإلتجاء لله سبحانه ثم الأعشاب الطبيعية لأن الأدوية لها أضرار من الأضرار الي أعاني منها أمراض القلب و السمنة و الكلى .. فإبعدوا عنها ..
5- الآن و خصوصاً هذه الأيام ينتشر الغبار بشكل فضيع .. عندي لكم الطريقة التالية :
جيبي قماش قطني أبيض أو أي لون فاتح بس أنا أفضل الأبيض .. جيبيه بأمتار كبيرة يكفي أنه يغطي النافذه و باب البلكونة لو عندكم ..أي مدخل غبار غطيه ...
و حطي القماش على الدريشة و ثبتيه بشطرطون .. ثم جيبي موية و رشيها على القماش ..
بكذا منافذ الهواء ما تنسد .. وما تنكتمون
بنفس الوقت الموية و القماش راح يمسكون الغبار وراح تلاحظونه معلق عليه قبل لا يدخل
ولما تشوفون القماش صار وصخ .. فكوه وغسلوه
جداً حلوة الطريقة ذي لغرف المرضى ولغرف المواليد عشان لا ينكتمون .. للإستراحات عشان تطلعون بنفس الوقت ما تنغثون من الغبار .. صح مو 100% فعالة .. لكن تمسك الغبار بشكل وتسده عنكم !
6- في غرفة المريض لما ينكتم جيبوا قدر فيه ماء مغلي وصكوا المنافذ ولا خلوه ياخذ حمام دافيء لأن الرطوبة تندي وترطب مجاري التنفس وتوسعها
او ممكن تشترون جهاز منقي للهواء صغير هو وينباع حتى بجرير واكسترا اسمه منقي الهواء .. يشفط الغبار عنك
سعره يمكن من مية الين 300 ريال مو اكثر ولا يغلونه عليكم !
7- ممكن بعد تشترون نباتات ظل لأنها تعطي أكسجين ومافيها طلع زي النباتات العادية بس أسألوا البستاني أول ..عشان يعطيكم نوع مافيه طلع
8- فيه نوع مخدات محشوه بالمطاط وليس القطن
فايدتها أنها مطاط فتمنع تكاثر العث و حشرة الفراش المسبب الأول للربو عند الأطفال و الكبار
وفيه نوع معين للمخدات و البطانيات .. يمنع الحساسية طبي .. فأشتروه للمرضى
9- إستخدام شامبوات و صوابين خالية من العطر من ماركة بيزلين و لويس رميديرم
أسأل الله العظيم رب العرش العظيم أن يشفي كل مريض
أتمنى أني أفدتكم و الي عندها تجربة مفيدة تكتبها هنـا
بالله أدعوا لي .. مو شرط تكتبوها بس قولوها..
بالله أدعوا لي بـالتوفيق في الأمور الي أنا مقبله عليها
ويتحقق لي مرادي .. وينتقم لي من الي آذوني
و أدعوا لي بالصحة و العافية
وحسبي الله ونعم الوكيل