مزحة لئيمة، او خبث او قلة سنع؟ اخت زوجي

يا بنات انا وزوجي تونا جايين من مكة لنا يومين، ومرينا على الطايف. وحنا فيها وقفنا عند مطعم وقال زوجي وش رايك نجرب المنتو؟ قلت له والله المطعم شكله ما يطمن (كله عمال ومو نظيف) وكان قصدي ان اكيد فيه مطاعم انظف منه بالطايف ناخذ منها منتو. وانا دايم حريصة على نظافة المطعم بالسفر اخاف من التسمم والامراض خصوصاً اننا جايين نتونس مو نشقى ونتعب. وبعض المطاعم الي مو نظيفك ممكن للي مسافر تبدو نظيفة فيتورط. عشان كذا بالسفر اتنقى الانظف والافضل سمعة. بعدها نسى سالفة المنتو وطلعنا من الطايف وهو ما ذاقه.


المهم ما لكم بالطويلة زوجي متعود على طبعي هذا حتى صار بالسفر يراعي هالنقطة. وقبل يومين رحنا لاهله بنسلم عليهم ودخل زوجي قبلي ويوم جاء لقاهم طالبين منتو ويغمش من وحدة بخارية بالحي. وانا عند المدخل افسخ عبايتي ونقابي وسمعته يقول يووه المنتو والله من اول ودي اجربه. قالت امه وانت توك جاي من الطايف منبع المنتو ليه ما جربته. قال والله جيت بجربه بس فلانه (انا) تخاف تجرب المطاعم بالسفر مره ونسيت امر وآخذ لي من عندهم.


شوي قالت اخته يا ويلي وش هالوسواس كيف صابر عليها انا لو منك اوديها خرخير حتى قرود الطايف كثير عليها ههههه. وعم الصمت بينهم.


المهم انا يوم سمعتها ما بغيت احرجها فلبست نقابي وشلت سلة القهوة وسويت نفسي توي داخله مع الباب ولقيته يطل علي مع باب المجلس يقول وينك من اليوم قلت نسيت القهوة بالسيارة.


وش رايكم يا بنات؟ هي مزحة بينها وبين اخوها والا قلة حيا والا وشش؟؟ هذي بعد قبل الزواج زوجي مرسل لها وهو يأثث محل اثاث اسمه مثل اسمي، وكتبت له هههههههه لا تقربه.


انا مدري صراحة وش سبب هالكلام يمكن عادي بين الاخ واحته؟ عشان كذا ما بغيت احرجها بس زوجي ١٠٠٪؜ بواجهه بالكلام الي سمعت.