مزرعتي بعد ٢٠ سنه

السلام عليكم ورحمة الله وبركااته
هذي قصتي
تزوجت قبل ٢٠ سنه ووهبني ربي مزرعة كبيره ..فرحت فيها كثير ...كنت اقعد من اليوم كله افكر وافكر كيف اخليها جنه ...كنت اخطط وارسم وامسح وارجع اخطط وارسم ...كان كل همي انها تكون احسن مزرعه بهاالدنيا كلها ....
وبعدها قررت اني لازم اشتغل فيها وأبدأ اليوم قبل بكره ..حتى تنتج احلى الثمار واجملها .
بديت بالشغل كانت ارض فاضيه خاليه ..بديت احرثها بيديني ..وبعدها قررت اني اشتري احسن البذور وافضلها مهما كانت التكلفه حتى يطلع محصولي افضل محصول ..
لكن لما جيت اشتري البذور نقصت فلوسي فقررت ابيع ذهبي ع شانها ...بعت ذهبي وشريت البذور بكل ماأملك وبعده بديت بالزراعه ...وكنت اجهل امور كثيره بس ماأستسلمت كنت اي شي ماأعرفه اروح اقرأ واستشير واتأكد وبعدها اطبق .
قعدت احرث وازرع كل يوم من طلعة الشمس حتى الغروب كان مايجي نهاية يومي الا وانا متعبه بس مع ذلك مبسوطه ...كنت لما أتعب اتخيل شكل الثمر والفواكه وطعمها ..وبعده انسى التعب على طول .
انقطعت عن الناس ونسيت نفسي ..كان كل همي مزرعتي وبس ...بدت البذور تنبت وتطلع ..فرحت كثير ...يوه احس اني انجزت شي كبير ...
تحمست اكثر وبديت اعطي اكثر ...وصار كل وقتي بالمزرعه ..من الصبح لليل ..ومن الليل للصبح ...اشتغل واحرث واسقي ...واذا نقص ماء اسقيتها بدمي ..اهم شي محصولي ...
استمريت واستمريت سنوات وسنوات وانا أحرث وازرع واسقي ....واذا هبت عاصفه قويه على مزرعتي وقفت امامها بكل شجاعه وصمود ....حتى لو تقتلع جزء مني مايهمني ...اهم شي محصولي مايجيه شي ..
رفضت اجيب احد يساعدني بمزرعتي خفت عليها كنت اقول ماراح احد يخلص فيها كثري .
ولما اتعب اتذكر وقت الحصاد وكيف اني راح انسى التعب كله ...
مررت سنوات وسنوات ...شاب فيها راسي ..ومرض جسمي ..وتعبت روحي ..وفقدت قوتي ....بس كنت احتسب كل هذا عن الله


وجاء وقت الحصاد ..الوقت اللي كنت اقول ابضحك فيه كثير ...الوقت اللي بنسى فيه كل هالتعب ...الوقت اللي بفتخر فيه عند كل الناس .........جاء الوقت اللي خلاص لازم الناس تشوف فيه مزرعتي كيف صارت بعد كل هالتضحيات ......


رحت اركض واركض واركض ...نسيت آلامي ..رميت كل شي بيدي ...
وجيت اشوف مزرعتي ...جيت اشوف احلامي
دخلت مزرعتي واحلامي تتراقص امامي ..وسلتي بيدي ..ابي اجمع من الثمار قد ماأقدر ....ابي آكل حتى اشبع ..
لكن دخلت وطلعت احلامي مبدده وسلتي فاضيه ..
مزرعتي ياعالم بعد ٢٠ سنه ماأنتجت
اشجاري ماأثمرت ...زهوري مافتحت
وأكثر بذوري ماتت وهي صغيره ..قعدت ابحث وابحث عن ثمر طالع ابي أكل حاجه تنسيني تعب هالسنين بس للاسف مالقيت ...بعد تعب وجدت شجره وحيده مثمره بس للحين مانضج ثمرها ....بعد محتاج للحين مني سنين من التعب .
نزلت دموعي غصب عني ...رجع بي شريط الذكريات لوراء ...ل قبل ٢٠ سنه
لتعبي ..لسهري ..لدموعي ..وسألت نفسي هل ياترى هالمزرعه تحتاج من كل هالجهد ..
قعدت اتذكر واتذكر حتى احتمت الشمس فوق راسي ...وقعدت ادور شجره ورقها يحميني من اشعة الشمس بس مالقيت ..ورجعت لبيتي خالية اليدين ومكسورة القلب .


مزرعتي = اولادي
بذوري = النصائح