خواتي واللي يعافيكم
أنا ناوية أشتري ماكينة خياطه ، بس ما أبيها محترفه
أبيها بس تخيط عدل وتكون صغيرة حيل مثل هذي
فحبيت أخذ رايكم
اللي جربت الماكينة الصغيرة ، أشلون أستعمالها ؟؟
ووين ممكن ألقاها بالكويت وسعرها بحدود جم ؟؟
أنا لقيتها بموقع أمازون ، وممكن أشتريها ، بس سعرها مع الشحن يطلع علي 13 دينار !!
مع أني سامعه أنها أرخص بوايد عندنا
بس مادري وين يبيعونها بالكويت ؟
وبالنسبه لأستعمالي لها ، راح يكون خياطة ألعاب وشغلات بسيطة وترقيع وتقصير ملابس مثلاً ، يعني مو تفصيل وخياطة ملابس
يا ليت اللي عندها راي ، يهمني رايها ، واللي تعرف معلومات عن هالمكينه يا ليت تفيدني
ومشكورين يا الغوالي
الماكينة نفس اللي في الصورة بس ماركة ثانية بحدود 10 دنانير ونصف في ارض المعارض
وقت يفتح السوري والمصري يكون فيه محلات يابان وصين يبيعون قطاعات وفناتق اهيه تكون عندهم....
بس للأمانه مو شي للترقيع أو تقصير يعني يادوب خياطة خط مستقيم وصعبه ،كل شوي تقطع الخيط ...أنا شريتها وتحسفت.
بس انصحك بماكينة صغيرة وخفيفة ماركة جانوم اخذيها ب8اشكال تطريز وسعرها اقل من 50دينار لها اكثر من 10 سنوات معي اخيط فيها كل شي .
صدقيني لو تشترينها ماراح تندمين وممتع الشغل عليها وتقدرين تدعسينها باي زاوية وخفيفة تنشال بيد واحده.
موجدوده بالفحيحيل عندالمحل اللي بالزاوية بجنب أجمل في عمارةمطعم القيصر.
وبالمباركية صوب حديقة البلدية المحلات اللي يبيعون بطانيات في ظهرهم اش كثر محلات عندهم.
اتمنى اني افدتك.........