مساعدتكم الله يرحم والديكم/// قديم

بسم الله الرحمن الرحيم

أخواتي / إدارة و عضوات منتديات عالم حواء

السلام عليكم ورحمه الله وبركاته

أول شئ أنا ولد وخاطب ومملك

وثاني شئ أنا عارف إن المنتدى نسائي ولكن والله مجبور أبي مساعدتكم

أخواتي نحن عندنا في عاداتنا مانقدر نشوف البنت في الملكة ولا بعدها ولا نكلمها أبدا أبدا

المهم أنا ساكن في أبها وأستأجرت لي شقة وجا وقت التأثيث

بصراحه تجننت ماعرفت وش أسوي

ماعندي إلا ثنتين خوات توأم توهم صغار مايعرفون

وأمي كبيرة

ولا فيه وحده تعطيني نصايح في الإختيار أو في الألوان

المهم أنا جيت هنا وكلي أمل إنكم تكونوا خواتي وتساعدوني في إلي أطلبه منكم وتنصحوني وترشدوني

طبعاً الشقة ملكية بمعنى كلمة ملكية

من ناحية الرخام والديكورات الجبسية والأسقف والألوان والتعتيق والإنارة بصراحه شئ خيالي وجميل وإذا أردتوا إني أصورها لكم لكي تساعدوني أنا حاضر

المهم الشقة تتكون من مدخلين مدخل رجال ومدخل نساء

مدخل الرجال يفتح على مجلس رجال و مغاسل ودورة مياة وأنتم بالكرامه ومقلط رجال

ومدخل النساء على صالة البيت ومجلس نساء ومطبخ ودورة مياة وغرفتين نوم واحده من الغرف فيها دورة مياة من داخل

المهم أنا أبي أثث من أفخم الأثاث

مايهمني السعر بقدر مايهمني الجمال

المهم بصراحه أشوف عندكم أفكار حلوة وطرق حلوة وأعجبتني كثير

بس فيه حاجة حيرتني

أول شئ غرفة النوم أبي أفصلها تفصيل

يعني السرير حق النوم أبي أفصله دائري ولا عرفت كيف أفصلة أو إذا كان فيه محلات يبيعون جاهز يكون أحسن عادي بأي مدينه بالمملكة ماعندي مشكله راح أسافر له

ودولاب غرفة النوم أبي أفصلة من الخزائن المبتكرة

المهم إذا ماراح تسون حذف لعضويتي أبي أكتب لكم إستفساراتي وأنتوا جاوبوني على إلي تقدرون

وأنا والله مادخلت هنا إلا أبي المساعدة من الله ثم منكم فقط لا غير

* للمعلومية عندي رحلة عمل للرياض راح تجلس 19 ساعه وأرجع لأبها

إذا فيه شئ حلوا في الرياض تنصحوني أشوفه ياليت تكتبونه لي قبل رحلتي يوم الأربعاء الفجر

أسألتي هي كالتالي :-

1- وين ألاقي إلي يبيع الأسرة الدائرية بشكل مودرن وجميل ؟
2- إذا لايوجد بيع جاهز كيف أفصل سرير دائري بشكل مودرن ويكون ذو جوده عالية وفخامة ؟
3- أنا ناوي أغير بوية غرفة النوم وأجيب رسام يرسم فيها باللون الوردي والأبيض والموف (وش رايكم ) ؟
4- أنا ناوي يكون الفرش كله في غرفة النوم متدرج من الأبيض إلى الموف ( وش رايكم ) ؟
5- الستائر والله ما أعرف كيف أفصلها ولا شئ بس نصحوني كثير في ستائر سيدار وراح أعمل لها زيارة إذا جيت الرياض ( أنتوا وش رايكم بستائر سيدار ) ؟

بصراحه هذا إلي عندي ألحين إذا تذكرت شئ راح أكتبه

و والله مالقيت إلي أقدر أستشيرها وتفيدني والله أحترت كثير وتجننت ولا لقيت أحد يوقف معي وأتمنى إنكم توقفون معي

تحياتي لكم