مساعدتكم بسالفة خطوبتي ..

الســلام عليكم ورحمة الله وبركآته ..

كيفكم بنآت !!؟

بقولكم قصتي ..

واتمنى الموضوع مو مخآلف ..

وغير كذا أنآ ابي مسآعدتكم وأرائكم ..

يوم كنت في أول ثآنوي خطبني ولد خآلتي ووافقت

وبعد شهر من الخطوبه كنا مسافرين والدبله بالشنطه

وقفنا نصلي ومدري كيف الشنطه ضاعت علي هناك

مانتبهت الا بعد مامشينا مسافه .. المهم مرت سنه وصارت مشاكل
بخصوص المهر .. وانا حسيت انه مو مناسب لانه ترك وظيفته

وبعدها فصخنا الخطوبه .. بعد فتره ولد عمي خطبني بس

مو خطبه رسميه كلام حريم وانا رفضت

بعد 3 سنوات خطبني واحد ووافقت عليه

بس بعد 3 شهور من الخطوبه تقريبا

قال انه عنده ( دوالي ) ومايقدر يجيب عيال

انا الصراحه تعلقت فيه وكنت اقول اني ابيه

بس اهلي رفضوه .. لااني وقتها كان عمري 20 وهو اكبر مني ب 12 سنه

ومرت سنه وولد عمي تقدم لي رسمي وتمت الموافقه

ونفس الشيء الدبله حقتي ضاعت

وربي كنت حاطتها بالدرج حق الاكسسوارات بالبيت

وكل الاغراض الموجوده مااختفت الا هو

قلت يمكن طاح واحد لعب فيه وضيعه

ولد عمي اتفق مع ابوي

انه بعد سنه يكمل الزواج . بعد سنه بالضبط طنش الموضوع
وما اعتذر من ابوي وطلب منه تمديد .الين يضبط اوضاعه

ابوي تناقش معه وقام ولد عمي وزعل وقال انا طاب خاطري

وراح اخلي اهلي يكلمونكم

من ايام شهر 10 الى الحين عمي مادق على ابوي ينهي الموضوع

وانا بنظر كل الناس مخطوبه

وحتى قبل فتره كانو فيه ناس يبون يخطبوني بس قالو لهم ان ولد عمي يبيني

وانا بصراحه .. ماني مقتنعه مره

تفكيره ومستواه التعليمي والوظيفي انا ماقدر اتقبله

حتى ماما تقول انه من ناحية تفكيره مايناسبني

انا الحين صار عمري 23

وأملي بالله كبير

لكن خايفه انه مالي نصيب بالزواج

واخاف اذا تركت ولد عمي .. محد يجيني

خصوصا انه اغلب الناس اذا بيخطبون يدورون البيضاء

وانا لون بشرتي تقريباا برونزي
ويبون البنت الصغيره
انا اتكلم عن اللي حولي بالمجتمع اللي انا فيه
يعني الواحد عمره 28 ياخذ عمرها 17 او 16

المهم انا ابي رايكم بسألفتي
وهل اوافق على ولد عمي بالعلم اني مو مرتاحه له
ابداَ وحتى يوم اصلي إستخاره ما احس بشيء ابد ابد
والحمد لله دعاء واستغفار دايما استغفر
أستغفر الله العظيم
استغفر الله واتوب اليه