مسافرة مع طفلين صغاااااااار ساعدوني بخبراتكم

السلام عليكم ورحمة الله وبركاته

اخواتي ان شاء الله نوينا نسافر الأسبوع الجاي على تركيا لمدة أسبوع و المشكلة انه عندي طفلين .. بنت سنتين ونص وولد عمره لما نسافر بيكون 50 يوم :) البنت ما شاء الله مو مغلبتني بشي ولا بتنكد .. والبيبي بيرضع صناعي و طبيعي ونومه لسه مو منتظم كتير.
المهم انها هاي اول سفرة لي مع اطفال دايما بكون سفري لشغل و ما بهتم لتفاصيل كتيرة.. المرة هاي حابة اعرف تجاربكم بالسفر مع اطفال من النقاط التالية و أي نقاط بتضيفوها ممكن تفيدني او تفيد غيري من اللي بيطلعوا على الموضوع يا ريت تحطوها مشكورين.

* موضوع غلي الماء و تسخينه لرضعات البيبي: كيف ممكن أعملها بالفندق.. أطلب من خدمة الغرف يسخنولي الرضعة؟ أعتقد الغلاية الكهربائية اللي بالغرفة ما بتصلح .. شو بتعملوا انتو؟
* بالنسبة للبنت .. لما تكون في رحلات خارجية سهل الواحد يلاقي مكان في حمام اذا انزنقت؟ وكيف اخد احتياطي .. بخاف اقلل لها من السوائل والدنيا بتكون حر اكيد..
* حاليا ما حد منهم الاتنين بنستخدم له العرباية.. لانه البنت بتمشي و البيبي بحطه بالحمالة على صدري و بحس العرباية ممكن تغلبنا. برأيكم ناخدها احتياط ولا بينفع بدونها؟ بتوقع لازمتنا عشان لو نامت البنت او تعبت.. ولا شو رأيكم .
* ناوية اخد معي حفاضات البيبي و حليب كمية تكفي اسبوعين مو بس أسبوع وغيارات طبعا للتنين كمية كبيرة عشان ما في هناك غسيل و لاشي . بس بخصوص أكل البنت عادي تاكل متلنا ولا اخد لها معي شغلات خفيفة من هون؟ هي معظم أكلها جبنة ولبنة وبيض ولبن بالفواكه و حليب.. بتوقع هاي الأشياء متوفرة بكل مكان و ما بتخوف.. بس حابة اعرف انتو رأيكم لاني ما بعرف حدا سافر سياحة مع أطفال.
*أدوية الأطفال طبعا رح أخد معي كل الأساسيات و محارم الديتول وأدوات اسعاف بسيطة وان شاء الله ما نحتاجها
*بخصوص ضغط الطيارة كيف ممكن نخففه عليهم وقت الاقلاع والهبوط؟

الله يسعدكم يا رب رح أكون ممنونة لأي معلومة تعطوني ياها .. :)