مستجداتي

السلام عليكم ورحمة الله
اليوم وصلو اهلي ( ابوي وثلاث من اخواني ) واتصلو فيني مايبغون يرنون الجرس يبغونه نايم وصلو الساعه ٨ الصباح
اخوي اللي كلمته بلغ والدي وبلغ اخواني الثلاث اللي اكبر منه ووالدي يوم عرف بالموضوع قال شغلو السياره ومشينا ولا تعلمونها احنا جايين عشان ماتقول له جايين اهلي ثم يهرب برا البيت وماعلموني الين وصلو لباب بيتي اتصلو وفتحت الباب شفت والدي وانهرت ابكي لدرجه ماني قادره افهمهم كلامي وهم يقولون هدي اذكري الله ويمسكوني واصعدهم معي قالو وينه قلت بمجلس الرجال قالو بنروح مجلس او صاله ماتكون قريبه منه مانبيه يحس ووديتهم وجلسو يفهمون الموضوع مني وانا قلت لهم كل يوم انام على ضرب وقل احترام ويشتمك يا ابوي ويقول عني يابنت ... ويا ويا ويا واخوي الكبير اشوف نظراته حسيته انكتم وعيونه شرار ومركز علي وقلت عن ان ابو زوجي جاني وجلس يهددني بالضرب وان ولده احسن الرجال ومحد مثله واني انا ساس الشر والمشاكل
وقلت لوالدي انه هاجرني وانا ما ابغاه قلعته لكن لا يستغل جلوسي عشان اطفالي ويجلس يهيني انتم عزوتي ياسندي لاتتركون حقي انا بداخلي غبنه انا ماتعديتكم ولا رحت للشرطه عطيتكم الموضوع تراني اتعذب وانضرب وعيالي عيالكم من لحم بنتكم وسو اللي تبغون فيه لكن شرطي ان بغيتم تاخذوني اطفالي معي قالو لاتشيلين هم
والدي اتصل بابو زوجي وقاله وينك يا ابو فلان قال عند حلالي قاال تعال سير علينا نبغاك بيت ولدك قال لا ما اقدر اجي قال لا بتجي وانت رجال طيب وان ماجيت جيناك قال انت ومين معك عشان تجوني قال والدي بينا تقابل ان شاءالله وقفل منه


وقام والدي واخواني للمجلس وحاولو يفتحون الباب مقفل وضربو الباب ونايم ضربوه قوه لين صحى قال مين قال والدي افتح الباب وفتح الباب وشفته وجهه مصدوم يطالع فيهم وفيني ويبي يقلطهم بمجلس الرجال وهو لابس فنيله وسروال
قال والدي تبي تقلطنا عند عفشك ولا بلبسك ذا
مرتبك هو قال لا لا ويجلس يبي يجمع فرشه دخلو هم وانا بغيت ادخل رفضو طلعوني قدامهم قالو روحي لورعانك


وانا رحت واسمع صراخ وضرب خفت واسمعه يهددهم بالشرطه وانكم منتم رجال متجمعين علي واسمع اخوي يشتمه ويضربه اسمع صوت هواء العقال اللي مدري كيف اشرحه لكم ابي الوقت يمر ابي ادخل اشوف ما اقدر خفت منهم


شوي جا ابو زوجي وهو يبي يدخل شافني قال بنت ابليس هنا ويشتم ويدخل عليهم واسمعه يهدي الوضع ويقول لا اله الا الله ويحلف ويحرم ويطلق على والدي عشان يسمعه


وصار بينهم نقاش زبدته ان ماتمد يدك والله نكسرها تجلس بيتها وانت تطلع يا خنزيير وخلها تشتكي منك والله ندخل فيك قصاص
وابو زوجي يقول مالها الا اللي يرضيها وان تعرضها بوجهي
وقال اخوي طلقها ماتبغاها طلقها انا ازوجها سيد سيدك قال لا ابغاها هي ماتبغاني هي هاجرتني قال اخوي واضح من شاف فراشك بالمجلس تلقف ابو زوجي يدافع عن ولده يقول هي تقول انا ما ابغاه وانه راعي حريم قال ابوي وانت يخفاك انه راعي حريم ترا ريحته فاحت وابو زوجي يهدي الوضع يقول والله ان مالكم الا طيب خاطر واجلسو والله ان اليوم غداكم عندي ورفض ابوي قال كف شرك انت وولدك والا والله اخليك فرجه للرايح والجاي
وزوجي مغبون جالس يقول لا اشتكيهم لا اخذ حقي تقاوو علي ما اسكت عنهم ويزابد وابوه يهديه ويحاول يسكته


ناداني ابوي وقال اسمعي بينا وبينك اتصال لاصار شي بس ارفعي السماعه لايردك الا لسانك
ولف ابوي وجهه على ابو زوجي وقال يابو فلان شفت هالمره جبت اخوانها الثلاث المره الجايه اخوانها السبعه ( لان انا وانا اصبح قلت لوالدي اخواني سبعه وانضرب ولا احد فيهم فكني منه ) صارت بقلب والدي وقالها لابو زوجي
وقال والدي لهم انا اقدر اخذها واشتكيك لكن حقها اخذته بيدي وتركتها بيتها عشان مدارس اطفالها ولا كان اخذتها معي واعلنتها حرب


وبس هذا اللي صار طلعم اهلي من غير ما اضيفهم ومشوو بس اخوي الله يسعده عطاني الفين وقال ان بغيتي شي كلميني
وهو وابوه اخذه معه وقالي ابوه البيت اللي انتي فيه ينعاف وطلعو


الله يفكني من شره