ومستشفى العسكري بجده كيييييييييييف يدي على قلبي منهم

انا لي تجربة في مستشفى الرياض العسكري قبل خمس سنين عادة تكون المراجعات باول اربع شهور بعيادات عامة وبعدها من الخامس الى نهاية الثامن بقسم النساء والولادة نظامهم كان يعجبني مرتب ما تنحاسين هذا غير النظافة الا انه كل مرة تدخلين على طبيبة غير لو ما فيه مشاكل بالحمل يعني الجنين وضعه طيب الضغط كويس وما الى ذلك .. طبعا قسم النساء والولادة قسم مستقل تماما ما يدخلون زوجك الا اذا كان الدكتور رجل فقط عند الكشف طبعا ..
بالنسبة لتجربتي فيه سألت عنه وسمعت اشياء كثير خوفتني اللي تقول ولدت وانا قاعدة على الكرسي ما انتبهوا لي .. واللي تقول نزلت علي الموية وانا عندهم وفي النهاية عملوا لي عملية و و و و والله انجنيت لكن زوجي رفض يوديني مستشفى ثاني ..
فتوكلت على الله واستمريت لكن في كل مره اروح لمراجعة ادخل خايفة واخرج مبسووووووووووطة ومرتاحة على نهاية الثامن كانت رجولي متورمة بشكل فضيع وضغطي مرتفع جدا فكان موعد مراجعة وطبعا لان عندي ضغط عالي حولوا ملفي على دكتور استشاري وبمجرد شاف الملف رجع قاس الضغط بنفسه وطلعني تنويم واعطوني طلق صناعي كانت الغرفة كبيرة ومرتبة لكل مريضة دولاب خاص فيها طبعا بالغرفة سريرين واحد ولادة طبيعية والثاني للعملية وبصراحة الغرف رائعة ونظيفة ومريحة اهتمام الممرضات كويس الله يعزكم الحمامات اكبر هاجس عندي لكنها نظييييييييفة ومرتبة ... وطبعا تعرفت على جاراتي بقسم التنويم والله تقولي قاعدات بفندق مو مستشفى حكومي بعضهم ماخذين غرف خاصة انا دخلت اخر وحدة وخرجت اول وحدة ..
طبعا في الولادة غرفه لحالك ما فيها غيرك سرير واحد بس اللي يعجبني فيها الاجهزة كلها مطورة ما تحتاجين الممرضات على راسك .. اللي ولدني طبيبة وممرضات والدكتور بغرفة قريبة للطواري لانهم كانوا متوقعين راح يجيني نزيف او يصير مشاكل لكن الحمد لله واللي خيطني فلبينيات وخياطتهم نظيفة وروعة ... طبعا بعد الولادة يشيلوك على كرسي متحرك وطبعا بعد ما غسلوا بنتي ولبسوها حطوها بحضني وانا طالعة ومعاي شنطتي وهذا الشي ضايقني مرة .. لكن بعد ما طلعت غرفة التنويم اخذوها مره ثانية ويرجعوها بس وقت الرضاعة وبعد كذا كان كل شي تمام ...

لكن وحدة ثانية معرفة راحت المستشفى عندها ولادة والموية قاعدة تنزل لها يومين وكان زحمة مرة وهي مسكينة تتالم وقاعدة على كرسي عادي ولما جاء دورها حولواها على غرفة العمليات لان الموية جفت على الجنين ... فاحسه يا تصيب يا تخيب