بسم الله الرحمن الرحيم
اخواتي اكتب لكم قصه صديقتي الغاليه
البنت متزوجه من 13 سنه عندها ولدين وبنت
ماعاد باقي لها الا طلقه وحده وماعاد فيها لعب
وتبي نصياحكم وهذي قصتها
البنت حميله ماعليها كلام وذكيه ووالله يا اخواتي اقولها وانا صادقه انها حسافه عليه
تزوجت من صديق اخوها من عائله جدا كبيره ابوه متزوج اربع
ام زوجها تعتبر الزوجه الثالثه لكنها الزوجه المنسيه الي زوجها هاجرهم ولايعترف فيهم
هو واخوانه ابوهم من اثرياء المملكه
لكن هم منتفين والبنت تزوجت كانت بتفتك من اخوها المتخلف الي مايعرف الا التسلط والقهر
قالت بنفسها ولد عائله كبيره وان شاء الله مو مقصر عليها
اول 7 سنوات زواج كانت زي الخدامه تبي بس ترضيه وتبي بس تسعده وهو طول الوقت مكشر
مايعرف يتكلم ان لبست له اهانها وان مالبست له راح وتشكى عند اخوياه واخوانه
البنت فبيت اهلها ماتعرف تصلح شاهي ومدلعه ماديا لكن الصدق ان اهلها مقفلين عليها مالها صديقات ولاعلاقات بس كانت تكتب في الجريده وممتازه بالجامعه وعشانه صارت طباخه حرمها من الكتابه والجامعه مامنعها منها بس صار يضيق عليها عشان ماتقدر تدرس ولا يوديها اهلها هم الي يودونها ولو سواق اهلها ماجاها مايوديها مع انه لاهو موظف ولا شي بس مقابل شاشه الاسهم
اخوه الكبير متزوج من وحده ماتخاف الله تحط بالعرض ولايهمها وهو زي التيس لو تقوله طب فالنار طب
حسبي الله عليهم اثنينهم زوجها مره يتأثر بكلام اخوه وزوجته مع انه يدري ان زوجه اخوه من دخلت هالبنت وهي حاطه عليها مع العلم انها في البدايه حاولت تكسبها
والقهر ان كل حمولتها يخافون منها ويضربون لزوجه اخوه الف سلام
والقهر انهم يمثلون انهم ملتزمين هالحموله وزوجه ولدهم باكبر المجالس تحكي وتقول انا بالميوه على البحر اجلس عشان اسوي تان
تحسبون يقولون لها عيب حرام لا صاروا حتى هم يتفاخرون فيها فلانه هي وزوجها مسافرين لاروبا وجت وحده سألتهم يقولون صدق انها بهالمايوه على البحر قدامن خلق الله يقولون ايه وش فيها
وذيك الضعيفه صديقتي يستقعدون لها لو تلبس جينز عند الحريم مع العلم البنت حتى بالخارج محافظه على عبايتها وغطاها
زوج صديقتي بعد مرور سبع سنوات ابوه اشترالهم بيت طبعا كانت هي الي تدق على ابوه كل يوم الصباح وتصبح عليه
وتسلم عليه وتقوله ياعم خيرك واصل اخر الدنيا منتب عجزان عن عيالك فيهم اجر ووالله من كلامها العسل
اشترى لهم بيت واشترى لاخوانه واشترى حتى للبنت شقيقتهم بيت
يعني لولا هالبنت كان كلهم بيوت ايجار شقق وادوار
وكلمت ابو زوجها يعطيهم مبالغ يمشون حالهم فيها يفتحون مشاريع وفعلا ماقصر عطى كل واحد 500 الف ريال
يبدون فيها زوجها حطهم بهالاسهم وكل واحد بدا يشتغل بعد فقر مدقع كانوا فيه هالبنت والله كانت هي همزه الوصل بينهم وبين ابوهم الي مايواطنهم..
وكانت دايما تنصح زوجها تقوله رح لابوك وزوره بيحبكم انتم ماتروحون له الا اذا بغيتو شي منه واكيد طول ماهو يحس انكم معتبرينه بنك بس ماراح يحبكم تقربوا منه
المهم مالكم بالطويله.
البنت بعد ما اشتروا البت الملك كان ابوها توه متوفي وجاها مبلغ حطته بتاثيث للبيت على اساس بيت العمر
والظلم حرام حتى زوجها حط والله بس هو بعيد عنها كانت تلاحقه تقوله عطني وجه وهو ولا هامه
البنت جابت سواق وشغاله اخذت لها دبلوم تصميم
وتعرفت على بنات ولهت عن زوجها زي ماهو لاهي عنها
وصارت تعوض نقص وجوده بصديقاتها يجونها تروح لهم
وبعد مرور سنه صار زوجها يشك يها عشان طلعاتها كثرت والبنت والله مالها بالخربطه اعرفها زين
وصار يسأل السواق وزوجه السواق الشغاله وين تروح وين تجي
ومن كثر الزن صار السواق والشغاله بعد يشككونه فيها لحد ما صار يعلنها علني
رجعت مره ودخل عليها وقالها يا (*****) يعني يا غانيه
وطلقها ورمى ملابسها وراح لهلها وقال بنتكم فاجره تعرف وتسوي وتحط ويقول لاهلها ان عياله مو عياله
وانه شاك والبنت اهلها لعنوها لعن..
البنت مسكت سجادتها من الظلم الي شافته انتهت نحفت وتعبت وانكسرت كسره مايعلم فيها الا الله
والزوج راح اخذ السواق والشغاله وجلس برضوا يحقق معهم يبي يعرف اكثر وهذولاك طبعا بعد ماعشمهم الزوج انه بيعطيهم 20 الف ريال لو قالو له عن اي شي كانت تسويه وهم يوم شافوه مستذبح يبي اي تهمه عليها
صاروا يعطونه من الافلام ووقتها هو تخيلوا دخل اصدقائه غرفه زوجته يفتشون عن اي شي يوصلهم لصدق كلام السواق والشغاله
الا واحد من اصدقائه قاله انت ماتخاف الله زوجتك بنت عايله معروفه واهلها مربينها ونعم التربيه وتراهم جيرانا من انولدت زوجتك ماعمرنا شفنا ضفرها,,
وقال انا الي بحقق مع السواق والشغاله وجاب الهيئه وخلى الهيئه تفتش اغراض السواق والشغاله
واكتشفوا انهم لهم بالسحر والدجل وصفقوهم الهيئه واعترفوا قالوا هو يسألنا واغرتنا الفلوس ولزقنا التهم فيها
الزوج انهبل جا يركض يبي يرجعها بس وقتها كانت عدتها انتهت لانها كانت حامل ومن هول الصدمه سقطت وانتهت عدتها
ولازم عقد جديد وصار يصيح عند اهلها عشان يرجعها ..
البنت قالت سبحان الله يعني مصدقين اندنوسي واندونوسيه ولا تصدقون بنتكم قدام عينكم سنين ماشفتوا عليها زله
والاهل صاروا يقنعونها ترجع عشان يثبتون للناس بس انه كذاب لانه فضحها بكل مكان وكانت نظريتهم انه مجرد انه يرجعك دليل قاطع على كذب الكلام الي طلع
وهي من الضعف الي فيها رجعت بس عشان ترتاح من الكلام واخوه وزوجته بعد مجرد معرفوا الكلام الي طلع عنها راحوا لزوجها وقالوا له ترى فلانه عرفنا عنها من ناس انها سحاقيه وراعيه بنات طبعا هذا اول ماعرفوا انه طلقها
بس مجرد ماسمعوا انه رجعها قالوا ترى الكلام مو مننا جاينا من وحده تعرف زوجتك.. وزوجها حسبي الله عليها مخليه هالحرمه ملطشه
وقدر الله واول مارجعت حملت وقتها زوجها كان مفلس ولا يملك ولا ريال لانه خسر كل فلوسه وفلوسها هي بعد بالاسهم
البنت كانت تحاول فيه تقوله الشغل مو عيب وعندنا اطفال تعبت منه
صارت تشتغل هي وتصلح سمبوسه وكبه واكلات وتبيع على جيرانها واهلها وصديقاتها عشان تصرف على البيت
جلست سنه على هالحال تعبت طفح الكيل عندها مو معقوله هي الي تصرف وهو جالس مقابل التلفزيون راحت لبيت اهلها وطلبت الطلاق وهو مايبي يطلق وللاسف اخوانها يتهربون ومرت عليها سنه ونص وهي برضوا الي تصرف
حاولت كم مره تدبر له شغلات يشتغل فيها عشان ترجع له لكن لاحياه لمن تنادي
وبعد هالصبر والبهذله توفى ابوه وصار زوجها مليونير بدال مايرجعها ويرضيها صار يقولها اذا بترجعين لازم تحطين فبالك مالك مصاريف وانا تغيرت وانتي فيك وفيك وفيك
بعدين حاولت تسايره وتفهمه انها هي ماقصرت بس اخته واخوه صاروا يقولون له تتذكر يوم انك مفلس تركتك طيب حسبي الله عليكم تركته لانه مايبي يسوي شي وهي الي تشتغل حتى فاتوره جواله كانت تسدده
البنت قالت له لا طلقني انت مامنك نفع لا انت فقير ولا وانت غني
جا لعب عليه وقالها خلاص يابنت الحلال ارجعي وابشري بسعدك البنت انبسطت وقالت الحمد لله الي اصلحه وصار يعرف اني ماقصرت ..
واول يوم انا اخذت لهم ليله بفندق هديه مني لهم بفرحتي لرجعتهم
وفعلا راحوا للفندق وانبسطت هذاك اليوم وجالس يمنيها بالحياه الكريمه بعد التعب الي شافته معه
بعد ماخلص من الي براسه ونزلها عند اهلها على اساس بيجي بكره بيجيب شركه تنظف البيت مع العلم الفتره الي فاتت كانت هي الي تدافع راتب الشغاله وترسل الشغاله كل جمعه تنظف البيت له..
من بكره جى ورجع بكل وعوده..
ولا عطى عياله مصاريف وصار يقولها انا اخوي فلان يقولي لو هذي زوجتي كان دعستها دعس واهنتها الي تركتك يوم افتقرت واخته تقول خذ عيالها منها وتزوج وانا اربيهم لك,,يعني يساعدونه على تشريد عيله جعلهم يذوفون ماذاقت يالله ياكريم وفعلا اخذ الولدين والبنت الصغيره رفضت تخليهم ياخذونها
والولد الكبير اول يوم تحمل فبيت عمته ثاني يوم هرب من المدرسه رجليه لبيت امه يقول يمه ابيك لو مانلقى ناكل
والبنت فعلا ماعاد عندها فلوسها وخلصت ومحد يعطيهاشي وحاولت تتوظف مالقت من يوظفها قام رجع العيال لها وبدون مصاريف ويقولها ارجعي لبيتك بس هي ماعاد تحس بالامان ماعاد باقي الا طلقه وتحس ان هالطلقه جايه جايه
خاصه بوجود اخته واخوه وزوجه اخوه.. واما امه فالله وكيلها اتهمتها بالسحر الحمد لله والشكر ساحره ولدها
اجل ساحرته ومسوي فيها كذا اجل لو ماسحرته وش كان سوا..؟؟
البنت من القهر قبل امس لقوها طايحه بالحمام متشنجه وجات الاسعاف شالوها وقالوا صدمه نفسيه وهي للحين منهاره
واخوانها بعد ماشافوها بهالحاله خافوا ان اختهم تفقد عقلها فعلا البنت مخطور عليها تفقد عقلها
مابين نارين نار انها ترجع عشان تلم عيالها ونار انها تحس انه مامنه امل
قرروا اخونها يجلسون معه وقالوا لها علمينا وش تبين نقوله ونقول.. بس هي ماتدري وش تسوي تعبت ماعاد قدرت حتى تاخذ قرارات
تخاف تطلب الطلاق وهالعيال مايطولهم الا البهذله لانه حقود حتى على عياله اذا شافهم يحبون امهم اكثر..
انصحوها اخواتي وعلمونا وش مفروض يصير بالنقاش وادعوا لها ان ربي ينصرها..
حسبي الله ونعم الوكيل كنت عندها اليوم الصباح مكسوره مقهوره حاله اكتئاب شديده دموعها ماتوقف وعلى سجادتها مسنسدحه تقول وش عاد بقى تتمنى تموت وتقول يارب بس خذ روحي وانا ساجده عشان ما احس بالغبن ولا احس اذا اخذ عيالي مع انها متأكده انه ماراح ياخذ العيال بس ماعندها تصرف عليهم ولا عاد فيها حيل تلف سمبوسه وتبيع وعيالها الثنين كبروا والكبير مايسمع كلامها مهمل بدراسته نفسيته تعبانه وتقول ان خليته عندي اخاف ما اعرف له عمره 12 واخاف اخليه ياخذه يسوي فيه عاهه لان زوجها اصلا يضرب ضرب مو طبيعي
دعوه شخصيه @daaoh_shkhsyh
محررة ذهبية
يلزم عليك تسجيل الدخول أولًا لكتابة تعليق.
دعوه شخصيه
•
عجلوا يابنات بالرد لان اخوانها بيجلسون معه بعد 3 ايام
الله يفرج همها ومصير الحق راح يبااان وحسبي الله ونعم الوكيل على كل ظالم
لاتنسى الدعاء والاستغفااار
وحرام العيال يتشتتون
يعني انا رائيي اهم شي الوحدة عيالها تقعد عندهم وتتحمل لين ربي يفرج لها وكل شي يهوون
لاتنسى الدعاء والاستغفااار
وحرام العيال يتشتتون
يعني انا رائيي اهم شي الوحدة عيالها تقعد عندهم وتتحمل لين ربي يفرج لها وكل شي يهوون
الله يفرج همها ومصير الحق راح يبااان وحسبي الله ونعم الوكيل على كل ظالم
لاتنسى الدعاء والاستغفااار
وحرام العيال يتشتتون
الله يكون بعونها
لاتنسى الدعاء والاستغفااار
وحرام العيال يتشتتون
الله يكون بعونها
الصفحة الأخيرة