- ELHAM - @elham_6

محررة ذهبية

مسلسل : انا ضحيت - الحلقة الاخيرة

صباحكم سكر ..

معروف دايما ان الي تضحي عشان زوجها هذي بنت اصول وحريصة على حياتها الزوجية ..
لكن !
ليش باوقات كثير هالتضحية ما تجيب نتيجة ؟ ولا تبين بعيون الرجال؟

لانها تضحية لا متناهية بشكل اعمى .. لان التضحية نوعين :

- تضحية تكبرك بعيون زوجك وعيون الناس

- تضحية تصغرك وتخلي مقامك صفر عند زوجك وعند الناس

لما تضحين وما يبين بعيون زوجك هذا مو معناه دايما ان الرجل ناكر معروف ، معناه الثاني ان تضحيتك صايرة بشكل غلط هز صورتك بعينه فما عاد لك مقام ، مشاعره هذي تطلع باسلوب تعامل معين بحيث لو هو رجل اصله كويس ومحترم فما راح يحس انه منشد مررة لك يعني بتلاحظين انه مو مررة متاثر ومقدر بقوووة تضحياتك (لاحظو هذا الكويس ) ولو هو اصله ردي وقليل ادب فبيعاملك تعامل مهين (طبعا هالنوع من الرجال بكل الاحوال معاملته لك بتكون فيها شي من قلة الاحترام لان اصله كذا لكن مع تضحياتك الغلط بياخذ راااااااااحته لان تضحيتك الي بغير محلها اعطته احساس انك راضية بهالمعاملة المهينة ) ..

التضحية الصحيحة تكون بمقدار ولا تمس هالحاجتين :
- كرامتك
- راحة جسمك وبالك

التضحية الغلط هي الي تكون مستمرة دايم وعلى حساب كرامتك وعلى حقك كانسانة بالراحة ..

مثال :

انك تقومين الصبح تسوين لزوجك فطور اوكي ماشية صح ، لكن انك تقومين تسوين فطور حتى وانتي ما نمتي كويس بالليل ! او تعبانة ! هنا انتي وصلتي لزوجك رسالة ان راحة جسمك مو مهمة قدام راحته ..

مثال ثاني :

زوجك ظروفه صعبة وانت تتصرفين زي اي بنت اصول تخلين صرفياتك بحدود طاقته وكذا ماشية صح، لكن انك تظلين على نفس مستوى الصرفية لما تتحسن ماديته بحجة ماتبين تزعلينه ما تبين تضغطين عليه ! هنا تحسسينه انك عادي تحرمين نفسك من شي موجود بس لا يزعل !

مثال ثالث :

انك تسكتين لما زوجك يكون معصب وواصلة معه وصوته عالي (بدون سب وشتم ) على مشكلة صارت هذا صح وعين العقل انك ماتناقشين وهو بهالحالة ، لكن انك تسكتين لمن يسبك ويشتمك ويشتم اهلك بدل ما تطلعين من المكان الي هو فيه ! هنا وصلتي له رسالة ان مقامك كانسانة ومقام اهلك ولا شي عندك والدليل ماتاثرتي ابدا ، بينما لو طلعتي وتركتي له المكان توصلين له رسالة انك ما اعجبك الكلام الي سمعتيه ..

مثال رابع :

انك تراضين زوجك وهو الي غلط عليك هنا ماشية صح وعين العقل والحكمة ، لكن انك بكل مرة يزعل انتي تراضين مصيبة على راسك لانك تكبرين راسه عليك ، وانك تراضينه لمن يسب ويشتم هنا ام المصايب على راسك لانك محيتي احترامك كامل مكمل من جواته حسستيه انك فعلا مالك مقام وانسانيتك مداس ..

يعني رجل قدامه بنت تخدمه حتى وهي مريضة ، يسبها وتجي تراضيه ، ما تطلب الفلوس الي تكفيها ولا تدلع نفسها بس عشان ما يزعل ، وش بتكون نظرة الرجال لها ؟

لكن رجل قدامه بنت تخدمه لكن وقت تكون تعبانة تطيب خاطره بكلمتين وتسحب ، يسبها تطلع وتخلي له المكان وتجلس زعلانة وساحبة عليه لين يراضيها ، يسب اهلها تمشيها له اول مرة ثاني مرة تعلم ابوها او اخوها يكونون شاهدين يتولونه ويادبونه ، تطلب كل ما تشتهي بس تبدا تطلب الامور البسيطة مثلا كوفي لما يطلعون يتمشون او مقهى تتقهوى فيه لما يدفع شوي شوي تطلب الاغلى لين توصل المستوى الي يرضيها وهو يقدر عليه .. هذي كيف بتكون نظرة الرجل لها ؟

شفتو كيف التضحية ممكن تنقلب على روسنا بدل ما تخدمنا ؟

شوفو احنا كبشر نحب الجمال ، الجاذبية ، القوة ، باختصار نحب كل شي ايجابي وننجذب له ومن ذلك نحب الشخص الايجابي القوي الي ما يسمح لاحد يتعدى عليه وبما ان الرجل عنده نفس الشعور ونفس الاحساس الغريزي فكيف تتوقعون يحب بنت حاقرة نفسها ؟ هذي تذكره بالضعف والسلبية والانهزام وكل شي هو ما يحبه واي بشر ما يحبه، هذي البنت بعيونه تشبه البنت الي تطلع بملابس مخيسة قدام الناس .. تشبهها من ناحية انها طالعة بمنظر مو كويس قدامه ..

مثل ما احنا كبشر نحب الشخص الي خارجيا نظيف مرتب انيق لبق بكلامه ، اكيد نحب الي كويس داخليا بحيث جماله الداخلي يطلع على شكل ثقة بالنفس وهيبة محد يتعداها ، كذلك الرجال ..

مثل ما احنا كبشر ما نحب الشخص الي مو نظيف وننفر منه ، بعد ما نحب الشخص الي من تصرفاته نحس مهزوز ماله راي ولا يعرف يفرض شخصية وهيبة عند الناس ، نصير ما نحاسب على كلامنا معه ولا تصرفاتنا ، وكذلك الرجال ..

اذا انتي اعطيك ملابس مهي كويسة خرابيط اقول لك البسيها قدام زوجك تقولين لا لانك عارفة ان هالملابس تطلعك بشكل مخيس قدامه ، فكيف طيب ترضين تطلعين قدامه بشخصية مو حلوة وتتوقعين يحبك ويقدرك ؟

ان شاء الله وضحت الفكرة من موضوعي هذا ..

ممكن هالموضوع يكون فرصة لكل بنت تعرف وش التصرف الصحيح باي موقف يخطر ببالها ، لذلك الي حابة تضيف موقف تتفضل عشان كلنا نتنور ونعرف كيف نتصرف صح بدون ما نقلل من قيمة انفسنا ..

حياكم :)

يلزم عليك تسجيل الدخول أولًا لكتابة تعليق.

تسجيل دخول

حبيبت سعودها • 10 سنوات

يووه احس اني بدرس عطينا الزبده

ميوووش*** • 10 سنوات

حبيبتي بعض الرجال وبعرفهم ..كان اكبر سكرجي مرتو لانها بنت رجال كانت تحبسه بالبيت ووقفت معاه الين ربي ماكتب له الشفااء

تعرفي زوجها يحلف بالله مايجرحها وياخد من لحمه ويديهاا ويموت على الارض اللي تمشي عليهاا

الرجال معاادن ..لكن النذل نذل مهما ضحيتي يلعب من وراك واللي يغدر فيك باي وقت ....

طيبة الحجازي • 10 سنوات

يارب بتكون الحلقة الاخيره
و تخلص كل الأجزاء التسعة و التسعين
و محد يضحي تضحية ماسخة

- ELHAM - • 10 سنوات

تغريد الصبحي :

لا يمكنك مشاهدة هذا التعليق لانتهاكه شروط الاستخدام.

هذي ما سكتت وحط يد على خد وانتظرت متى يصحى ، تصرفت تصرف
بعد ارادة الله كان سبب انه يتعدل معها ...

لكن النذل على الاقل لو ضحيتي صح معه ولعب من وراك ما ياكلك قلبك
كثير لانك ماوصلتي مرحلة اهانة النفس عشانه ، وطالما ماوصلتيها فانتي بخير

حياك ميوش :26:

ان شالله هههههههههههه

كلام يدعمه واقع ، ما وضحتي الغلط فيه !

حياك الله :26:

آحسَاس أنثى • 10 سنوات

مكرر