مشاعر بنات الناس مو لعبه عندكم

السلام عليكم ورحمة الله وبركاته
مساه الخير انا حبيت اليوم افتح معاكم موضوع بس رجاء من دون ردود استفزازيه او عصيب ترانا نناقش موضوع كل البنات مروا فيه واولهم اللي بترد هالرد فرجاء كل وحده تحط نفسها بمكان البنت هذي
وانا اعرف ان هالموضوع انفتح بالمنتدى اكثر من مره وصايحوا العضوات وقالوا حرام خافوا الله بمشاعر البنات ولكن لا حياة لمن تنادي

هذا الله يسلمكم ويخليكم انا عندي صديقه ماشاء الله جميله وحلوه واخلاق ومثقفه وطموحه وذوق وتربيه كامله والكمال لله ماشاء الله تبارك الله
يجونها خطاب يدقون نبي نجي نشوف بنتكم ترحب امها بهم وهلا ومرحبا وتسال الابو موافق وكل شيء تمام يجون الحريم يشفونها تقوم الام وما يبقى شيء ما تحطه لهم من الضيافه من حلويات من المحلات الراقيه وموالح ومعجنات وووووو
وتدخل البنت عليهم وكل البيت يدرون ان بنتهم جاي لها خطاب ويفرحون وبالاخير يطلعون وما يتكلمون ولا كلمه


حلفتكم بالله وش موقف البنت وقتها وياليتها مره مرتين ثلاث لا اكثر تقولي صديقتي افتشل من اهلي لدرجه صارت ثقتي بنفسي عدم لدرجه اني صرت اشك اني مو حلوه او ان فيني شيء
حرام عليكم ليش تحطون البنت بهالموقف يالييت اللي حاكتني بهالموضوع وحده او ثنتين لا اكثر من صديقه فتحنا هالموضوع واحنا بالجامعه والله كل البنات يعانون من هالموضوع جيتهم ما فيها اي ايجابيه ما فيها الا خسروا على المساكين فلوس وانتوا عارفين كم صينيه الشوكولاته والموالح
احرجو البنت هزوا ثقتها بنفسها وعلى فكره ترى عيب اذا البنت تدخل على ناس كثير عند القبايل :mad:
وانتوا تكونون بموقف مو حلو اذا طلعتوا انا عني لو بمكان اهل العريس بفتشل ويمكن من الاحراج اروح ادور لها رجل اذا ما عجبتني لاخوي
والناس صارت عندهم مناعه للاحراج تدخل وتاكل من خير الناس وتتفرج وتطلع عادي وش فيها
طيب قبل دقوا وسالوا وش مواصفات البنت
انتوا برايكم وش الحل لهاالوضع وش يسوون اهل العريس عشان يبعدون عن البنت الاحراج وما ينحطون بهالموقف
وانتو وش رايك باللي قاعد يصير بصراحه ولو سمحتوا ما اراح ارضى انو عضوه تغلط على عضوه ثانيه مثل ما نشوف ببعض المواضيع انا حطيت هالموضوع بهالوقت لاني اعرف انه موسم خطبه وزواجات

اول اشكر كل رد على موضوعي ( رفقا بالعذارى رفقا) من ناحية تعليقكم على الصواني فينه ناس يحبون يضيفون ضيوفهم احسن ضيافه
وبعض اهل العريس الله يهديهم انا سمعتها باذني قالت بنتها لها انهم مو كشخه لانهم حاطين حلى شغل البيت ومعجنات كانهم برمضان وموالح مالها داعي الحمد له والشكر ما يدرون ان فيه ناس مو لاقيه تاكل وانهم يحكمون على اهل البنت من ناحية الكشخه والذوق من تقديمهم والحلويات ووووو لا تتوقعون انها قدمت ضيافه فخمه لا صينيه شوكولاته ومعجنا موالح من الصواني البسيطه من اباتشي من هالمحلات بس