مشاكل لانهائيه :(

بنات حابه اني افضفض لكم
انا بعد اخر مشكلة صارت بيني وبين زوجي وانا في بيت أهلي
زوجي تواصل معي قبل ٦ أيام وبعدها قبل أمس أول مرة أرسل لي مصروف وقال لي بخلي العاملات يجون يساعدونك وإذا احتجتي شيء يخص الي ببطنك كلميني غير كذا لا و ما أعطاني مجال أتكلم أو أتناقش معه حاولت أذكره بالمواقف اللي صارت من أمه وقدامه قال لي بكل برود فكينا ماني فاضي لك ومن بعدها ما عاد كلمني ولا حتى سأل عني المهم بعدها صارت مشكلة ثانيه وبوصلها لكم بالحرف عشان تشوفون مين الغلط فينا
قبل امس خواتي وبنات خالتي قررو نطلع مع بعض كافي وطلعت معهم بعد ماحاولوا فيني خواتي ورحت معهم ونزلت صوره عادي بالسناب وسبحان الله يابنات طول هالفتره مارسل ولا كلمني بس شافني ماسكة كوب القهوه ومنزله صوره
اعوذ بالله جن جنونه
ارسلي يقولي سبحان الله من يوم ماحملتي وانتي من ثاني شهر تصلين على كرسي والحين عند أهلك أشوفك طايره من مكان لمكان الحين شالتك رجولك
وبعدين شلون تطلعين وما تقولين لي مين سمح لكقلت له اخذت الاذن من ابوي وانا في بيته وماشوفه منطقي انك تلومني عشان مااستأذنت منك وانت أساسًا تاركني في بيت اهلي وماترد ولاتتفاهم وحتى لما أكلمك تتهرب قالي ووش المنطقي برايك
تراك زوجتي واذا عند أهلك ما يعني إنك تسوين اللي تبين شرع ربك ما عطاك الإذن تطلعين من وراي ولا تتجاوزين أمري حتى لو بيننا خلاف الطاعة واجبة عليك وامر من ربي يعني مو على حسب مزاجك ولا على حسب الزعل بيننا
قلت له انت ماترد ولا تبيني اكلمك
و ترا فيه كوفيهات جوّها حلو وتصلح للعوائل المحافظة الدعوة تغيير جو بس
قهرني يقول ايه عارفين جوها هالكوفيهات شباب وبنات يطالعون ببعض ع اساس رايحين عشان يستمتعون بكوب قهوة وروقان الاغلب يجي عشان يشبك وتجيك ايردروبات إلى بكره
وش شايفتني مادري عن اللي يصير ولازم يعني تروحين
خذي لك سفري وتقهوي في أي مكان حتى لو في السيارة المهم انه غثني بكلامه ونكد علي ساعة يهاوش بكلام يغث انا مسوي لك ركن قهوه في البيت عشان ماتروحين هالاماكن ويبربر ع راسي وكبر السالفة أكثر من اللازم وما وقف عندي راح يشتكي لأبوي إنّي طلعت بدون ما أستأذنه وان المكان مختلط وأبوي الله يهديه على الريحة نكد علينا وجلس يهاوشني ويهاوش حتى خواتي انهم هم السبب وهم مالهم دخل بشيء
المشكلة قايله له انت وافقت لي ليه الحين قلبت معه ضدي قالي وانا وش دراني انك ما اخذتي الاذن من رجلك ورايحين مكان زي ذا
المهم انقلب اليوم كله ضدي
انا ابي حل واخلص
حاولت اصلح العلاقه لكن هو عنيد وانا لي حدود وكرامه انا والله احبه لكن تعبت احس ماعاد لي قدره لأي شيءوماعاد ادري شالحل معاه المشاكل تكبر بيننا وش تنصحووني اسوي معه يابنات كل شيء بيني وبينه معلق
وسالفة المقهى انا ماشوف نفسي غلطت لانه سافهني ويبيني استأذن منه؟ خيير ؟ !
استغفر الله بس