والسلام عليكم ورحمة الله وبركاته
والحمدلله على فضله ومنه وكرمه
كما تعلمون اني الحمد لله كنت بين قوافل الحجيج هذي السنة 1434ه
لم اخطط للحج جاء صدفة ليلة عرفة وحجيت من غير تخطيط وكانت اجمل صدفة ..
حتى النوم مانمت ليلة عرفة وقاومت النوم الى الساعة الثانية والنصف ظهرا وانا في عرفات استسلمت للنوم اخذت لي ساعة وصحيت ..
في الحقيقة لفتت نظري عدة صور او اشياء لاحظتها منها ما ازعجني ومنها ما افرحني بسردها لكم على شكل نقاط ..
* الحمدلله دخلنا عرفات بكل يسر وسهولة ربما لان عدد الحجاج قليل هذه السنة من بيتنا الى مقر الخيام في عرفات ما وقف باصنا لكن حزنت على منظر الحجاج المخالفين لانظمة الحج صراحة المنظر يثير الحزن وهم ينزلون من السيارات والباصات الصغيرة طبعا منعوا السيارات من الدخول لكن الناس ما هونو عن الحج صاروا يمشون تخيلوا من العزيزية الى عرفات مشي باصنا يمشي وانا اشوف الناس عن يميننا وعن شمالنا الكبير والمنحني ظهره والصغير والشاب والنساء الكل يمشي المسافة جامدة اتوقع مو اقل من 10 كيلو
* وصلنا عرفات بفضل الله ودخلنا المخيم انشغلت بتختيم القران والدعاء لكم دعيت اكثر من دعائي لنفسي في يوم عرفة حاولت قدر الامكان اني ما احتاج دورات المياة لعلمي مسبقا بحالها انتظرت الى صلاة الظهر والعصر صلينا جماعة جابوا الغداء مالي نفس ماتغديت نمت الى 3 ونصف بعدها امضيت وقتي في الدعاء والاستغفار والتسبيح
اضطررت ان اذهب لاجدد وضوئي وسائني المنظر علما انه هو نفس المنظر اللي انا خابرته في حجاتي السابقة ولم يتغير شئ الصراحة عار علينا نفسد على الناس حجهم ونخليهم في صراع على دورات المياة
والموضوع سهل وبسيط
1-تكثيف عدد دورات المياة الى الضعف في عرفات
2- بنائها على نفس نظام دورات المياة في منى ومزدلفة فمالمانع انهم يبنون شئ يليق بالمسلمين
خاصة ان الميزانية كبيرة اللي تصرف لمكة لو بطول في هالموضوع بتعبكم نفسيا وبتعب انا :44:
*وقت النفرة الى مزدلفة وقتها القلب خاشع واستشعار تام وانغلاق على النفس ما ابغى احد يكلمني ويقطع علي خلوتي بنفسي قلبي يخفق وتنزل دموعي تحت الغطا في جو ايماني روحاني مقدر اوصفه لكن واه من لكن ...
طول مسافة المشي من المخيم الى الباص وانا ادوس على النعمة باقدامي تخيلو ياجماعة الفواكه مرمية عالاسفلت والرصيف ماتلقون موضع لموطأ القدم وزحام شديد وقت النفرة لدرجة اني امشي مقدر اوقف خايفة من الدهس الناس في حالة استنفار لامجال ابدا للوقوف وانا امشي مسرعة ورى ابوي واطالع في الارض خوفا من اني ادعس الاكل شفت صحن قصدير مليان ارز ودجاج مغلف ودعست عليه احدى الحاجات بقدمها الحاجة ماتدري تمشي مافي مجال تطالع تحتها اصلا انا عاذرتها بس قلبي عورني فعلا واحنا بهذا الموقف المهيب وكيف ندوس على النعمة تحت رجولنا والله شفت الرز وهو يتغفص وطالع من الصحن شئ يقهر
الحل في نظري : ليه مايكون فيه توعية للحجاج من بلدانهم ولمن يجونا ليش مانزورهم في مقرات حملاتهم ونعلمهم احترام النعمة
او اقل شئ الاكتفاء باللي عنده
اهل الخير ماقصروا والكل يتسابق لاطعام الحجاج ولكن الحجاج يأخذون كل مايعرض عليهم بل ويفيض عن حاجتهم ثم يقومون ويخلون الاكل مرمي على الارض عرضة للدعس بالاقدام وهذا اهانة وعدم تقدير للنعمة
* خرجنا من عرفات الى مزدلفة وفي مزدلفة خرجنا من الحملة اللي كنا معهم ورحنا لحالنا التقطنا الاحجار وجلسنا بالقرب من طريق المشاة مزدلفة /منى فرشنا فرشتنا وجلسنا نسولف مع حبيبي ابوي الغالي انتصف الليل وبعده هممنا بالمشي المسافة بين مزدلفة ومنى 6 ك مشيناها على الاقدام وماقصروا حكومتنا على طول الطريق برادات الموية واحنا نعبي ونشرب وطبعا دورات المياة حلوة وباين نظيفة لكن الحمدلله ما احتجناها بس واضح شغل متعوب عليه افضل من عرفات بمراحل
طبعا لاتسألوني عن تعب المشي احتسبه بيني وبين الله لكنه متعة فعلا التعب في طاعة الله لايعادله متعة ..
* وصلنا الجمرات ورمينا جمرة العقبة بعدها قررنا النزول الى بيتنا وعدم الذهاب لطواف الافاضة والسعي كنا منهكين جدا البيت قريب جدا من منى دخلنا وهات يا احضان وسلامات ودش ساخن ونووووم
*يوم العيد قضيناه في البيت وصلينا المغرب وصعدنا الى منى وجلسنا وانقهرت لان جنبنا حاجيتين واحدة من مصر والثانية من باكستان وكلهم ضايعات انقهرت عليهم المصرية تقول انا من امس مضيعة زوجي وعمره 70 والمطوف حقهم يقهههههر وهذي عادة اغلب المطوفين اهمال تام بالحجاج والشئ اللي يقهر ان جنبنا سعودي حب يساعد اخذ الارقام من البطاقات المعلقة على رقبة الحاجة المصرية ويتصل على ارقام المطوف والمطوف مقفل كل ارقامه يعني لا انسانية ولا ضمير ولا شئ ..
اخر شئ استعانوا بالشرطة والكشافة وقمنا رحنا ولا ادري ايش وضعها ايضا الباكستانية ضايعة وجالسة والتفاهم صعب لانها ماتعرف عربي وكل مامروا حجاج باكستانين كلموها بعدين اخذوها الكشافة
* رجال الامن الصراحة بيضوا الوجه وماقصروا من يوم عرفة وانا ما اشوف الا حنية في التعامل مع الحجيج وادب واحترام هذي السنة تميزوا مرة ويرفعون الراس ويحق لنا نفخر بهم
وايضا الكشافة جهدهم واضح في ارشاد التائهين ماقصروا الله يجزاهم خير
* لفت نظري كثير من حاجات الهند وباكستان مغطين وجوههم ومتنقبين مثلنا سبحان الله بالعادة مايتغطون لكن ملاحظة انا هالشئ من شوال اعتمرت وشفتهم في الحرم متغطين وجايين حملات يعني واضح انهم مو من المقيمين هنا والله منظرهم يشرح الصدر..
*طفت الافاضة وسعيت في ثاني ايام العيد طفت من المطاف الجديد اللي في صحن الطواف خلصت بسرعة واتجهت للمسعى في الدور الثاني وكان تقريبا مثل الايام العادية مافي زحام الوضع عادي هذا الكلام ثاني يوم بالعيد
*نفرنا متعجلين في يومين وخرجنا من بيتنا متأخر وكنا في سباق مع الزمن نبغى نوصل الجمرات بدري عشان يمدينا نرمي قبل الغروب والحمدلله وصلنا بالوقت المناسب وانتهينا
* منظر المتسولين في الجمرات منظر غير حضاري نتمنى ايقاف هذي الظاهرة اللي تشوه صورتنا امام العالم في هذا المحفل الديني الكبير...
صور من منى..
صور من يوم نفرتنا من منى وغروب الشمس
اما موضوع دورات المياه ما اقول الا حسبي الله ونعم الوكيل فيمن ضيع الامانه من زمان والسعوديه في خير ولا اشتغلت في هذا الموضوع