.
.
.
|| أكتب لكم الآن وانا ابقطع جديلتي من القهر اجل كتبت موضوع ومابقي الا ارسله ويعلق ويروح
<< الزبـده تبي تعلمكم انها غيرت اللوك حقها وسوت جديله واهلها يقولون مات اللي يسوي جديله
لانه جديلتها ماتتعدى كتوفها
||.
.
.
{ مشــاهد يوميــه }
1-
امس قررت انا واختي نروح نلعب بناتها بتولان ..
بس العصر يعني يوسعون صدروهم شوي ..
رحنا يلعبون واختي الا تمر سوقهم تشوفه ..
المهم تتفرج وهذيك ترش علينا العطور وهذا حلو وهذا يهبل ..
المهم اخذت اختي لها كم عطر
وطلعنا ..والا حول ماياذن واختي صايمه ..
قالت لاخوي مر كريسبي والا بيت الدونات واشتر لي ابفطر ..
يوم شفت بودي شوب بجنب محل الدونات قلت فرصه انزل اشتري اللي ابغاه ..
_ ترقبوه في قسم البشره << دعايه مدفوعه الثمن
المهم الا السكيورتي يقفل الباب يوم شافنا فتح لنا الباب وقال بسرعه قبل ياذن ..
ودخلت اخذت حاجتي وطلعت ..
الا اختي تقول ..
غلو ..ترانا مليانين عطور بعد ماعطرتنا هذيك ..
وانا تطير عيوني ..والله ناسيه ورايح عن بالي ..
واقول لاختي ورى ماذكرتينا قالت ناسيه ماذكرت الا يوم مرينا من عند الرجال ..
الله يعفو عنا ..
*الشـاهـد *
.
لازم يابنات ننتبه لسالفه العطور ..
لازم تتاكدين انه مارح تمرين على رجال بعد ماترشين العطر ..
والله مشكله العطر مشكله ..
احنا واحنا بنات وتمر وحده راشه عطر يهبل نروح فيها ..
كيف الرجال اللي مايشوف البنت كيف شكلها ..
وش يصير فيه ..
والله يوم تعطرنا ماكنا ناوين نمر على احد ..
حتى وهي ترش علي اروح امسحه ببنت اختي ..
الله يعفو عنا ..
ترى هالنقطه مهمه مااره مااره ..
2-
ترن ترن ..طوط طوط << تلفونا يجمع بين الرنه والهرن او البوري ..
غلا : الو
الحرمه : الو السلام عليكم بيت فلان ..
غلو : ايه << اسلوب وذرابه
الحرمه : عطيني ام فلان ..
غلو : يمه يمه ..حرمه تبيك ..ترى رقمها غريب ..وصوتها عجوز ..
<< يعني تراها تبي تخطبني ..
امها : طيب طسي مناك خليني اكلم المره
<< كانت غلو لاصقه بالسماعه وتقول لامها قولي الو وانا اسمع وش تقول .
.
طست غلا فوق ..
وقررت تستخير ..وقررت تحط شروط ..
ايه ياحبيبتي ..السالفه زواج مو لعبه ..
لازم اشرط واقرر...
ماعاد نقصني الا فستان العرس ..
المهم وهي في خضم التفكير ..
تاخرت امها ماجات تقول ها شئ ولا تشاورها ..
قررت تنزل وتقول وافقت خلاص..
يوم سألت امها مين اللي داق ..
قالت ..ام جيرنا الجدد تبينا نتعارف ونزور بعض ..
<< بالله ماودكم تشوفون وجه غلو ^-^
القصه خيال ..بس يعني هو واقع بعض الشئ
* التعليق على المشهد * ..
.
معليش يعني بشويش ..
وين يالخيال ..من دق رقم غريب قلتي خطآب ..
عسى ماشر..
والمشكله اللي تقهر ..تتحطم ..
بالله احد قالك انها تبي تخطبك ..!! انتي اللي سنعتِ السالفه ..
وتحطمتِ بعد ..
يعني لو قلت لك .. يافلانه زواجك راح يكون السنه الجايه في اليوم الفلاني ..
والله لو يتقطع التلفون ..تبين تصيرين واثقه انه مو لك ..
وراح تكونين مرتاحه ..
طيب ليش كل هاالهم اوالضيقه ..
مكتوب لك اليوم اللي تبين تتزوجين فيه ..والفلان اللي راح تاخذين ..
ليش كل الهم ..
لو كنتِ بالموقف الاول راح تنتظرين السنه وانتي مستانسه ..ومرتاحه ..
ومستعده ..
طيب اعتبري الموقف الاول مثل الثاني ..
وانتظري وانتي مستانسه ومرتاحه ..ومستعده ..
وكلش مكتوب ومقدر ..
3-
هذاك اليوم تجمعنا احنا وعمامي ..
ووناسه ..وننتظر هاليوم ..
بس عارفين انه الوناسه ماراح تكمل ..
لانه فيه تعصب ..
عندنا بنت عمي هلاليه ..
من تدخل لين تطلع وهي تسولف بالمباره ..
والحكام ..والمحترفين ..ووو ..
مانقدر نسكتها ..
بعدها تشب حريقه بين الهلاليه والنصراويه ..
وياليل مااطولك ..
ونطلع ماطلعنا من العزيمه الا بالحقد على الفريق المنافس
ولا حسينا بمتعه الجلسه ..
ومهما حاولنا نغير السوالف ترجع للكوره ..
لان البنت ميولها كرويه ..
* التعليق *
كلنا لنا اهتمامات ..
وكلنا لنا ميول ..
لكن مو كل من يجلس معك يكون له نفس ميولك ..
لو جاملك اليوم وبكره ..بعده ماراح يجامل ..
الواحد المفروض يتنوع بالسوالف ..
فيه اشخاص مايسولفون الا عن الازياء بس ..
وفيه من يسولف عن المطبخ والحلويات بس ..
وفيه من يسولف عن الكوره وبس ..
فيه من فقط ينصح ..ويسكت ..بس ..
وكل هذولا نادر تلقين لهم اصدقاء ..
الحلو انه الشخص يتنوع بحديثه ..
بكلامه .. مو حلو ابد الشخص يكون كلامه محدد بشئ معين ..
احنا مو في حصه ..مانحكي الا شئ معين ..
فيه ناس اذا جلست معهم يمتعونك ..
مره بالطبخ ..وحركاته ..ومره باخر الازياء ..
مره بااحدث العطور ..مره بسوالف العرس ..مره .ومره ..
مانطلع من المجلس الا واحنا طالعين بميه فائده ..
واذا غاب هالشخص عن المجلس الكل يفقده ..
اما اللي يحكي عن شئ معين ..مااظن ينفقد ..
عشان كذا ..خلونا نحاول نغير في احاديثنا ..
نحرك المجلس ..ومانطلع الا واحنا مخلين غيرنا يستفيد ..
راح يكون لحضورك رونق خاص ..
وغيابك ماراح يكون بسيط ..
..
.
.
اعتذر لاني ماقدرت اتذكر وش كنت كاتبه اول ..
انا ماادري كيف انحذف الكلام ..
يعني معقوله تكون بنت عمو دخلت وحذفت اللي يخصها ..
هذا عمل طلق اربع ساعات تعظمت السالفه وراحت كلها
معليش اعذروني ...
وقسم اكتب وفيني غلقه وحاولت انكت ..
فتقبلوا ثقاله الطينه ..
*-*
