مشكلة أخوي ما يعيبه شيء بس كل ما خطبنا له وحده رفضوا

السلام عليكم
بدخل في الموضوع على طول وباخذ رايكم في مشكلة أخوي

أخوي عمرة تقريبا 29 موظف ومحافظ وعاقل وشكله حلو وجذاب ما شاء الله عليه و أخلاقه عاليه والكل يحبه ويمدحه بس أذا خطبنا له أحد رفضوا أهلها أو هي اللي ترفض

والسبب أنه قبل 4 سنوات تقريبا أستعجل وضغط علينا عشان يتزوج واختار وحده أكبر منه بـ 13 سنة من قرايبنا
خطبناها ووافقت وتم الزواج مع أن كثير من الناس عارضوا وأنتقدوا بس هو الله يهديه كان يبي يتزوج بأي وسيله
وحنا ما قلنا شيء لأننا نعرف أخلاقها زين وحتى شكلها مقبول بس عيبها الوحيد أنها أكبر منه وهي تفكيرها يختلف عن تفكيره ويوم تزوج عاملها بالحسنى بس هي الله يهديها صارت تتكلم علينا وتقول أنا أغار من خواتك لا تمدحهم عندي ومره عطى أمي مبلغ بسيط ما يتجاوز 200 ريال وزعلت وسوت مشكله ودايم تذكره بالموت وعقوبة اللي يتزوج بأكثر من وحده ولا يعدل وأخوي تعقد منها لأن سوالف مثل هذي تأثر فيه وحملت بعد كم شهر واهتم فيها اخوي وجاها سكر حمل وصار هو اللي ينظم لها وجباتها ويتابع أكلها ويوفر لها كل أكلات الحميه حفاظا على صحتها وصحة الجنين وبعد ما ولدت وجابت بنت طلعت منغوليه ( متلازمة داون ) كبر هم أخوي وصار حزين وحالتة النفسية سيئة وخايف على بنته وكثرت المشاكل بينهم وهي بس تعانده وترفع ضغطه وتزيد همه ورمضان قبل اللي فات قرر أنه ياخذ أجازه ويجي عندنا وهي يخليها عند أهلها وأول ما حطها عند أهلها تعبت ودخلت في غيبوبه ونومت في المستشفى أكثر من شهر والله أن أخوي عندها ولا تركها وهي تغير شكلها وبعد ما طلعت من المستشفى راحت لاهلها وجلست عندهم لانها ما عاد تتحمل شيء واخوي قال بشتريلك بيت عند اهلك وخيرها بين الطلاق او يتزوج عليها لان حالتها ماعاد تسمح تعيش لحالها بس رفضت وقالت طلقني ووالله لادعي عليك وطلقها من أكثر من سنة

وطول هذي السنه وحنا نحاول نخطب له بس الكل يرفض عشانة مطلق وعنده بنت

توقعون أن اخوي ظلمها او حنا ظلمناها يوم خطبناها لاخوي ولا حظ أخوي كذا ونصيبه هو يبي الزواج والاستقرار وحنا عجزنا نلقى له وحده تناسبه

وش الحل بنظركم

انتظر ردودكم وتعليقاتكم