مشكلة اخويا

اهلين بنات انا اول مره اسجل واكتب بالمنتدى دا بس من زمان متابعتو
ابغاكم تساعدوني الله يخليكم لاني مو عارفه ايش اسوي
عندي اخو اكبر مني بسنتين عمرو 26 وهوا اخويا الوحيد وعندي 3 اخوات كلهم اكبر منناوانا اصغر وحده
اخويا هذا قصته انو لما كان صغير كانت امي وابويا قاسيين عليه مرره كانت امي دايما تحرجو بمواقف هوا مالو دخل فيها
وابويا يضربو ضرب مو طبيعي حتى مره كسر خشمو لما اعطالو كف
اخواتي الكبار الله يسامحهم كانو كمان قاسيين عليه انا كنت الوحيده اللي العب معاه ودايما مع بعض
كانو كل ماجا يبا يلعب معاهم يطردوه برا وحتى مره جاتلو عيديه من عمتي ولما جا نام اخواتي اخدوها وقعد يبكي يومين ومحد عبره ولا رجعوله هيا
طبعا الموضوع تازم ولما كان بالثانوي صار موقف بينو وبين اخواتي وحلف انه ماعد يتكلم معاهم ابدا
والله يابنات محد عبرو انا كنت هبله ما اعرف ايش اسوي كنت مع اخواتي وساكته
من يومها تغير مررررررره الين اليوم ماصار يتكلم معانا بس اذا كنا نبغا حاجه من برى نطلبه ويجيبها
قبل 6 سنوات ابويا توفى الله يرحمه يارب
واخويا صار يتكلم شويا يجي يطل علينا ويسالنا ايش تبغو وكده
احنا غرفنا كلها جنب بعض وبراتها صاله اللي دايما نجلس فيها وهو غرفته بعيده في حافة البيت
والله ماحد يسال عنو ولا احد يساعدو هوا يغسل ملابسو وهوا يطبخ لنفسو انا احيانا اساعدو لكن مايرضى
ماحد يتكلم معاه انا حاولت اتكلم معاه كلمه ورد غطاها والله حتى انا صرت استحي منو واتركو
مره تعب مررره وكان بغرفتو يومين ماندري عنو الا لما شافتو امي مصخن ووجهو مصفررر والله ماندري عنو ولا يقولنا وامي اخذته للدكتور طلع كان عندو تسمم وما اكل من يومين واعطوه مغذيات وضغطه منخفض مره
اما هوا ياقلبي مايخرج من البيت الا يمر علينا وحده وحده تبغو شي
ولما يجيب اكل ماياكل معانا يحطلنا الأكل بالصاله ويروح ولما نخلص نحط الباقي بالمطبخ بعدين يجي هوا ياكل من البواقي
اختي المتزوجه كانت اقرب وحده لو وكانو يتكلمو بالواتس مره قالها انا يمكن اسافر عند صاحبي ببريطانيا اقعد اسبوع
وكان يبغاها تجي هي وزوجها يجلسو عندنا عشان مايقدر يخلينا لوحدنا راحت قالت لأمي اخويا شكلو يبغا يدرس بره عند صاحبو
ودريت اختي الكبيره وجات تعاتبو تقولو انتا بتروح وتخلينا وهوا يقول مين قال الكلام دا انا كنت ابزور صاحبي وبطل من السفره
وصار ماعد يكلم اختي المتزوجه زي اول قلتلها اعتذريلو وهيا مطنشه ماهمها
انا كنت احسبو مكتئب لكن مره شفتو من الشباك جالس مع اصحابو والله يابنات انسان ثاني يضحك ويمزح ومبسوط مرره
والله قعدت ابكي ليش مايصير كدا بالبيت وهوا صار زي ابونا دحين بس والله مايقصر باي شي كل شي نطلبه يجيبه ولو محتاجين فلوس يعطينا
كلمت اخواتي عشان يتقربو منو ماحد يبغا يقولو مكتئب ايش نسويلو واختي الكبيره اسلوبها قاسي مره راحت زعقت عليه تقولو متى بتتكلم وتضحك معانا لما تتزوج ؟ وهوا ساكت مارد عليها احسه مكسور
كلمت ماما عشان تجلس معاه وتشوف ايش مزعله لانو يحبها مره حتى كل صباح يجيبلها فطور قبل مايروح الشغل لكن تقولي يابنتي سيبيه براحته
ايش اقدر اسوي عشان ارجعو زي زمان نفسي اجلس معاه وافضفضلو مو معقول بنجلس بدي الحاله للابد وانا كل ما احاول احس اني اضايقه مادري
ساعدوني الله يخليكم