مشكلة امي واسلوبها مع ابوي ...>>استوفى الردود

السلام عليكم .. بناااااااات
عندي مشكله جداا حساسه وماني متعوده اشكي لأحد موضوع بهالحساسيه
هو عن إمي ..
امي اذا كانت رايقه يازين اسلوبها معنا وطيبه وكلامها حلو .. وتستخدم معنا الفاظ حلوه مثلا ( ياحبيبتي ياقلبي ياروح امك ) يعني اذا مروقه ودي اشيلها واحطها ع راسي

بس مع ابوي مشكلتها مشكله :-
اول شيء بقولكم عن ابوي ( هو مره كتوووووووووووم ويتحمل كثير يعني صبور وحنون مره ومايضرب ولا يرفع صوته الا اذا عصب مره مره بس بالغالب يمسك نفسه , وكثير متحمل امي وصابر عليها )
لهم يمكن 26 سنه مع بعض
امي تزوجت وهي صغيره ..
وكانت ماتعرف شيء بالحياه لاانه كانت بقريه
المهم شوي شوي وصارت فاهمه وواعيه اكثر
ماعلينا مو هذا موضوعنا
صار لها يمكن سنه ماتتحمل اي كلمه من ابوي ولا حتى مزح ..
اذا قال لها شيء على طول تنفخ عليه
لو يقولوها اليوم صايره حلوه ولا وش هاللبس الحلو على طول تنفخ عليه
بكلام واسلوب مره نرفززززز ..
يعني مثلا تقوله كذا ( يله يله انت اسكت محد طلب رايك )
مابي امي تعامل ابوي بهالطريقه .. والله ابوي صار مايجلس معنا بالصاله بسببها
كل وقته يجلس بالمقلط لوحده .. يتفرج تلفزيون ولا يقراء جرايد ..
هو طبعا يداوم بس انا اقصد الاوقات اللي فاضي فيها
واذا شافته جالس تقوله انت بس جالس بالبيت ماتطلع .. واذا صار يطلع تقوله انت ماتبي تجلس معنا
تخيييييييييلوووووووووو تخليه يغسل مواعييييييين ( اخر موقف صار اليوم , احنا 3 بنات ومقسمين الششغل علينا بالدور . اليوم المطبخ على اختي الصغيره عمرها 13 , وقبل السحور راحت تتروش وامي دخلت المطبخ وجلست تغسل بدالها وتهاوش بالاخير راحت دقت الباب على ابوي , لاانه بالمقلط وعنده زوج بنت عمي , وقالت له انت بس جالس ماتساعدنا ف شيء ولا تدري عن اللي تعبان واللي مريض تعال غسل مواعين , وياحياتي هو راح يغسلهاا . بعدين انا رحت بداله وغسلتهم )
واذا جلس يتقهوى معنا تقوله لاتاكل كذا لاتشرب كذا ليه لبسك كذا لاتوسخ كانها تتقرف منه ..

وانا مابي امي تاخذ اثم وذنوب عشان ابوي كل يوم ينام وهو زعلان او متضايق منها
وربي مره احزن عليه يوم اشوف القهر بعيونه ومبين انه كاتم بنفسه

احيانا اقول لامي لاتعاملين ابوي بهالطريقه او ليه تكلمينه كذا .. بس ابد ماتسمع مني
وتعصب تقول انتم تحبونه اكثر مني
وبصراحه احيانا احس اني احب ابوي اكثر منها

ياناسسسسس ابوي مايقصصصصصصصر معها مدلعها ويعطيها اللي تبي مصروف شهري
و يطلعها متى ماقالت يلا .. اي شيء تبيه يعطيهاا ماعمره قال لاا , ولا ماعندي
بس هي تقول انو ماقد شفت منك حاجه حلوه وكلام كثير
مابيهاااااا تقول كذا حرااااااام عشان نفسهااا قبل لايكون عشان ابوي

يابنات ابيكم تنصحوني كيف اشيل الهم من ابوي ..
وكيف نتعامل مع امي واخليها تهتم بإبوي وتشوف طلباته وتراعيه
حياتي هو عنده السكر والضغط ..

علاقة امي مع ابوي بهالشكل خلت فيه توتر بالبيت .. اخواتي صغار ويتضايقون
مراهقات وحده 13 والثانيه قريب بتدخل ال 16
على فكره امي ماتعرف تتعامل معها بإسلوب كويس صح انها تنصح وتتكلم وتناقش
بس اذا صار فيه غلط على طول تنفخ وتهاوش , حتى هم اذا صارت لهم مشكله بالمدرسه مستحيل يجون يعلمونها يخافون انها تهاوشهم فاهمين هالاحساس كيف !!؟

المهم ابي نصيحتكم وش السواة معهاااا ..
نقاش معها ماينفع لاانها مره تعصب وبتقعد تهاوش واناا مابتحمل يمكن ابكي هههه

وامممممممممم لاتحرمونا دعواتكم