مشكلة بسيطة تتحول بسبب الآخرين إلى مشكلة عويصة

أخواتي في عالم حواء:
يمكن إذا قرأتم مشكلتي تضحكون علي وتقولوللي ليه ما تحطينها في باب ساعدوني، لكن المشكلة صارت تضايقني كثير في عملي والسبب إن بعض زميلاتي يعلقون علي بسبب هذه المشكلة إللي كنت أشوفها بسيطة بس تحولت إلى مشكلة عويصة، والمشكلة هذه مو أنا وحدي إللي أعاني منها لوحدي لأني لما رحت لمنتدى ساعدوني لقيت الكثير عنده نفس المشكلة، المشكلة إني موظفة ولدي في السكن الخاص الذي أسكنه أنا وزوجي مواصلات خاصة تودي الطالبات وأنا أركب معاهم لأذهب لعملي، طبعا الوضع سيئ ليس لأني أركب مع الطالبات ولكن بعض الطالبات للأسف الشديد يستغلون هذه النقطة لمضايقتي، طبعا فكرت بوسيلة مواصلات أخرى ما يكون فيها طالبات لكن المشكلة أن زوجي لا يقبل أن أركب بدون محرم لازم يكون معي وحدة تركب معي، أنا لا أعارض رأي زوجي، لأن الموضوع موضوع شرعي ما أقدر أقول له أنه غلطان وهو صح، بنفس الوقت أن معاناتي بدأت أيضا أن مواعيد هذا الباص الذي أركبه مع الطالبات يتناسب مع مواعيد الطالبات فقط ولا يتناسب مع مواعيدي، حاولت أمشي حالي قد ما أقدرـ لكن تعليقات الزميلات السخيفة مرة مضايقتني ، غير أن الأمر بدأ يطال إلى جودة عملي والتقصير في أداء واجبي بشكل محرج، من التعليقات: ليه زوجك ما يثق فيك، ليه زوجك رجعي احنا في عام 2006 ومازال يفكر بهالعقلية، طيب مادام حكر لهذه الدرجة خليه هو إللي يوصلك.......... وغيرها وغيرها من التدخلات السخيفة ورئيستي في العمل: شوفي فلانة ما شاء الله عليها إذا طلبت منها تتأخر ربع ساعة أو نصف ساعة ما تتضايق لكن أنت تتضايقين وتعتذرين أقولها لأن ظروفي مختلفة عنها هي عندها سواق خاص يقدر ينتظرها لكن أنا ما عندي حايروح عني الباص والنتيجة أني بدل ما أتأخر نصف ساعة أتأخر ساعتين .لكن من يقدر إلا إللي دايس النار برجله( الله يكرمكم) دخلت بمشاكل كثيرة مع زوجي إن يغير رأيه لكن رافض يقوللي هذا مو مبدأ أغيره هذا أمر شرعي وديني، فكرت أطلب مساعدة في قسم ساعدوني وكتبت موضوع هناك بس ما أحد رد علي وهو:
أريد مساعدة ضرورية حول شركة مواصلات في المنطقة الشرقية لتوصيل مدرسات من بيوتهن إلى المدارس أو الجامعات وبالعكس، المشكلة إللي عندي أني مدرسة وزوجي ما يرضى أن أركب سيارة خاصة مع سواق لوحدي، إلا إذا كانت معي وحدة، ولكن المشكلة وين ألاقي وحدة تكون مواعيدها على نفس مواعيد دوامي، وفكرت هل توجد شركات توفر سواق معاه زوجته؟؟؟؟؟؟؟؟؟؟؟؟؟ يا ليت ساعدوني لأن هذه المشكلة مسببتلي مشاكل كثيرة الله يعلم وحاولت أتفق مع كذا زميلة من زميلاتي في الدوام إني أروح معاها لكن تفاوت وقت الدوام وفي أيام تكون ما تروح فيها يصعب الأمر علي بالمرة ...... ولكم مني دعوة
أرجوكم سامحوني على الإطالة ولكن فعلا أنا متضايقة من هذا الموضوع ما أدري ألقاها من زوجي ولا من رئيستي في العمل ومقارناتها السخيفة مع من هم وضعهم أفضل مني ولا من زميلاتي إللي بدل ما يدورون لي حل يحاولون يثروني ضد زوجي ؟؟؟؟ والله يا بنات إني ما أبالغ إذا قلت لكم إن هناك الكثير من المواقف المحرجة التي أتعرضلها بسبب هذا الأمر التافه وأنا من جد مضايقة ومحتاجة إنكم تساعدوني