مشكلة تحتاج الرد عليها اليوم

انا زوجي طيب بالمره. بس مشكلتي معاه ان راسه يابس زي الحجر . يعني طيبته بلا حدود ودمه خفيف . بس لما يحب يعاند ما فيه العن منه حتى في الاشياء البسيطه جدا .
اليوم بالذات احس اني كرهته من كل قلبي . في كل اجازة صيف يتعمد يكسرني قدام اقاربي .
يعني انا ليه سبع سنوات متزوجه ولا مره خرجنا مع بعض زي الناس او حتى نسافر . من يوم ما تزوجت ما سافرت الا خمس او ست مرات وكانت لغرض معين موتمشيه وما نجلس اكثر من ثلاثه ايام او اربعه . وعندي بنتين وولد ومن حقهم يطلعون ويتمشون مع امهم وابوهم كعائله . بس لما اقوله هالكلام يقولي اتركي الكلام الفاضي . اش بيصير لهم اذا طلعوا معاك وحدك او طلعوا معي وحدي . خلي عنك كلام علماء العفس والرفس يعني علماء النفس .
وانا في اجازة الصيف اجلس عند اهلي وكل بنات العائله المتزوجين برا العائله يجون عند اهلهم . وكلنا بيوت اهلنا جنب بعض . واحس اني باموت من القهر لما اشوف ازواج قريباتي وحريم اخواني يطلعونهم يتمشون بشكل شبه يومي او يروحون الاسواق او زيارات وهم مع بعض . وانا يرميني في بيت اهلي وما عاد يسأل عنا الا اذا كلمته وطلبته في حليب او حفاظات يجي يحطها من عند الباب ويروح . ولو ما اتصل ما يكلف على نفسه حتى يتصل ويسأل محتاجين شي او لا.
والمشكله اني في نهاية كل اجازة صيف اقوله ما نبغى انا والاولاد نحس انا اقل من غيرنا . ويصير عندي امل ان السنه اللي بعدها بتكون افضل . على الاقل صورتنا قدام اقاربنا . لانهم ماخذين فكره انه رامينا وما يهتم فينا . وبالذات حريم اخواني . وتعرفون الحريم يشمتون ببعض وكل وحده تقول انا اللي مدلعني زوجي ويموت فيه . والمشكله الاكبر ان ها لحركات ما تطلع منه اكثر شي الا في اجازة الصيف .في الوقت اللي ابغى الكل ياخذ عني اني مرتاحه وان انا كمان زوجي يحبني ويحب يسعدني زي ازواجهم واكثر . وبصراحه لما خرجوا كل قريباتي اليوم مع ازواجهم حسيت بالقهر على نفسي وعلى اولادي . واتصلت عليه وقلتله طلقني . لانه كل سنه يشمتهم فيه اكثر من السنه اللي قبلها.موبس على التمشيات والخرجات . حتى لما اتعرض لمواقف احتاجه فيها اول من يتخلى عني هو. يحبني بس اذا كنت بخير او ماني محتاجه شي او لما يشوفني اصلا مبسوطه من غيره . عشان كذا اتصلت عليه وقلتله طلقني . لاني اذا ما حسيت انك موجود جنبي انا والاولاد اذا احتجناك معناها ما عاد تلزمنا في اي وقت ثاني .لانك اذ ما عزيتنا واكرمتنا قدام الي حولنا وبعدت عنا شماتتهم معناها ما لك داعي في حياتنا . ولا اش رايكم انتم ردوا عليه الحين لاني باموت قهر . وما دري اش بيكون مصيري بعد طلبي .:(