مشكلة خادمتي (( سرقة الأغراض ))

السلام عليكم ورحمة الله وبركاته

اخواتي ،،، مشكلتي يمكن تكون بسيطة وهينة بالنسبة لمشاكل الخدم اللي مالها حصر.

راح اقولها بالتفصيل وارجوا ما يضايقكم تفصيلي بهالأمور ؟؟ بس عشان تعرفون كل نواحي المشكلة بالضبط

بس بصراحة مضيقة صدري حيييييييييييييييييييييل ،، ولا أدري كيف اتصرف بهالمشكلة ؟ قلبتها يمين وشمال ؟ واخاف اتصرف تصرف يضرني .

انا موظفة ولي بنت وولد ،، حدتني ظروف وظيفتي اني اجيب شغالة. ولا بصراحة ،، أنا ما أطيق الشغالات نهاااااااااائي ،،، واحس انهم علقم بالحلق. ولولا وظيفتي مافكرت نهائي اجيبها.
المهم: شغالاتي اندونيسية ،، أول ثلاث شهور وش حليلها ،، خيالية ،،، شغلها ماعليه ،، بس اخلاق ،، محترمة ،،، صلاتها محافظة عليها ، تصوم الاثنين والخميس ، ما تتضايق من كثرة الشغل ،، مع العلم انها اذا رحت بيت اهلي ،، ولا بيت اهل زوجي ،، ولا صديقتي ،، تشتغل فيه كأنه بيتها.. من نفسها من غير ما أطلبها.
ارتاحت نفسي لها ،، وأموري كلها تمام ،، الين جاء يوم ،، وطلبت صديقتي الشغالة مني . وقالت لي: انها جاية من تخييم وتعبانة ومن بكره بتمشي للدمام لأهلها. وتبيها تساعدها بشغل البيت. وديتها لها ،،، ساعدتها بالبيت ،،،، حطيتها عندها العصر وجيت بالليل الساعة عشر واخذتها منها .. الأمور تمام ... ومرت على هالسالفة ثلاث اسابيع ،، خلالها لقيت اتصال من صديقتي من الدمام بس ماقدرت ارد عليها .
المهم ، بعد ثلاث اسابيع، دقت علي صديقتي وقالت لي ،، انها فاقدة سلسلة ذهب كانت على مكتبة الصالة! وانها متأكدة ان شغالتي هي اللي أخذته! وانها دقت علي خلال الاسابيع اللي راحت تبي تقولي ومارديت عليها.
انا قامت بي الدنيا ، وبصراحة انقهرت بالبداية من صديقتي كيف تقول كذا؟ وانا خدمتها بهالخدمة يمكن بناتها لعبوا بالذهب وضيعوه، لأني من النوعية اسيب ذهبي على الكومدين(التسريحه) علني وعمري مافقدت شي منه نهائي .
دخل بي الشك وكان وقتها عندي ضيوف بس يمونون رحت ارسلتها لبيت اختي وفتحت دولابها مع العلم ،، ان شقتي صغيرة مره ومكشوفه على بعضها لأن عائلتي صغيرة ،، المهم فتحت دولابها والمفاجأة ؟؟؟؟؟؟
لقيت أكثر من قطعة ملابس لي أنا بدولابها؟؟؟؟؟؟؟ ومصفطتها عادي كأنها أي قطعة من ثيابها؟؟؟؟؟؟؟؟؟؟؟؟؟؟؟؟؟؟؟ مت قهر ؟؟؟ خصوصا اللي اخذتها ملابس غالية عندي مو أي كلام؟
ضاق صدري قلت ماراح انفضها الين يروحون الضيوف الي عندي. عاد تذكرت اني من فترة بعيدة ارتب ملابسي واطلع اللي بوديه للجمعية الخيرية وقلت لها اي شي عاجبك لك ولبناتك خذيها من الأكياس حقت الجمعية قبل ما أوديها،، (( على بالي كريمة،، وخري هناك يا حاتم الطائي،، كش على خشتي)) قلت يمكن فهمتني غلط وراحت تاخذ اللي يعجبها حتى من الأكياس حقت الملابس الشتوية والصيفية ووقتها كنت حامل وشايلة كل التنانير والبلايز بأكياس خصصتها لها ، المهم ، بعد ماراحو قلت لها اني برتب ملابسي الشتوية والصيفية ،، وخلال ما أرتب قلت لها وين تنورتي والجاكيت والبلوزة اللي اشكالهم كذا وكذا وكذا .. قالت مادري مدام؟؟؟؟((الله ياخذ هالخشوم الفنس))
قلت بعطيها فرصة ترجع اللي اخذته ،، فإذا رجعته فهي كانت فاهمتني غلط ومسيكينه ماحولها سرقة ولا غيره،، بعد الفرصة مارجعت كل الملابس ،، رجعت بس جاكيت،، انا وقتها انجن جنوني بجد((تو الناس ياخاله)) وأجي افتشها بحضورها ،، والاقيها كل اللي شفت شايلته((شالك أبليس آمين) طبعا سلسال الذهب مالقيته ،،، ؟؟؟؟ وبطقاق وملاعن طلعتلي الملابس بعد ماحاولت اني احتويها(( اخسي يارحيمه)) قلت لها ماراح اسويلك مشكلة اذا اعترفتي بغلطك وطلعتي الملابس وسلسال الذهب ،، المهم طلعتلي الملابس والسلسال تحلف انها ماأخذته؟
المفاجأة لقيتها ماخذه قميص نوم لي قصيييير مره ،، وماخذه ملابس كانت لي يوم كنت عند اهلي الملابس هذي كانت امي محتفظة فيها ، يعني موب عندي اساسا ؟؟؟ ولقيت ماخذه جزمتين وحدة مادري لمين ؟؟ والثانية كانت لأختي؟ غير التنانيز والبلايز حقاتي ،، ولقيت عندها بلوزه تجنن من والس ،، طالعتها قلت انا شايفتها قبل كذا وين وين؟؟ قامت تحلف وتقسم انها جايبتها من ديرتها؟ قلت والس غالي والبلوزة متأكدة سعرها فوق الميتين؟ وش جاب والس لقريتهم؟؟
المهم سكت انا عليها ،، لأني كنت بالتاسع ،، ومحتاجة لها ،، وقلت بتصرف معها لما أخلص الأربعين،،
تفاجئت بالاربعين وانا عند اهلي بدل ما تحاول تكسبني ،، مزفته اخلاقها معي وخصوصا مع امي ،، قلت انتظر الين اخلص
خلصت الأربعين ورجعت للبيت ، تعدلت اخلاقها ،، وصارت معي تمام ،، وطبعا انا عشان ولادتي كانت مو مضبوطة رجعت اعدل الأمور الأيام هذي من خياط وخلافه.
زبببببببببببببببببببببببدة الهررررررررررج:
دقيت على صديقتي اشوف اخبارها ،، وتفاجأت انها تقولي يوم فتشتي خدامتك مالقيتي بلوزة سوداء من والس ،، تذكرينها اللي وريتك أياها يوم زرتيني في رمضان؟ انها اختفت بعد ماجات شغالتك عندي آخر مره؟
انا تلعثمت مادري وش اقولها ،، وانا شايفة البلوزة ؟ امبيري وصل اتش ؟؟ وما أفكر الا ماسكة بنت الكلب هالفنسى ولاعنة خير خير خيرها ..
قلت لها اني ماشفتها ،، ولا أدري معي حق ولا لا؟؟ بس قلت لازم افكر قبل اي شي وش اسوي بالي عندي بالاول خصوصا انها حالفة ومقسمة بالله انها لها ؟؟؟ والسلسال بعد ؟؟ وخصوصا ان السلسال مالقيته ،، وقلت لصديقتي اني مالقيته؟ وانها يمكن تكون متهمتها ظلم؟
لأني حست البيت كله دولابها وتحت الفرش وفتحات الدواليت المخزن وكل شي ؟؟ مالقيت السلسال؟؟؟
قلت اتفاهم بمشكلتي وبعدين اتفاهم مع صديقتي ،، بالنهاية صديقتي وغالية عندي وراح تقدر ظرفي اني ماقلت لها بالبداية...
المشــــــــــــــــــــــــــــــــــــــــــــــــــــــــــــــكلة::
محتارة وش اسوي بالشغالة؟؟ مابي اتصرف تصرف اندم عليه ولا يكون مو بصالحي ولا وبصالح عائلتي ؟؟
احيانا اقول أصبر عليها مابقى الا حوالي سنة عليها خصوصا انا تعدلت معي وقبل ما تسافر افتشها ولا اخليها تسافر بأي قطعة سواء لها ولا لنا ولا لصديقتي يعني ،، اخليها تسافر بشنطة وملابس جديدة وبعد ماتروح افتش ملابسها زين اكثر ،، واحرقها وافتك من اي شي كانت بتسويه لنا بديرتها.. مع اني ما اتوقع انها راعية سحر ،، اعتقد يدها ماخذه على السرقة؟
هي بصراحة تعدلت الحين ،، وشغلها زين ،، مع ان اسلوبها مع امي ومع خالتي ام رجلي موب زين وأعزي الأمر انهم اعطوها وجه بالسوالف واخذت عليهم..
وأحيانا اقول ،، اسفرها ،،، واذا سفرتها بصراحة حالة رجلي المادية ماتسمح اني اقدم مرة ثانية واتحمل مصاريف ثانية غير اللي صرفت على هالفنسى..
وأحيانا أقول ،، اتنازل عنها ،،، منها استفيد من فلوس التنازل واقدم على وحدة ثانية اربيها مثل ما أبي ،، لأن هذي بصراحة مع تعبي مع الحمل سلمتها الحبل على الغارب ،، كل ماتبي تسوي في البيت تسوي.. واعترف اني اتحمل مشكلتي هذي بالدرجة الأولى ،
وبنفس الوقت اقول ،، حرام اتنازل عنها لوحدة تبتلش بها بالسرقة؟؟
مع انها والله العظيم ،، طباخة درجة أولى ،،، وشغلها زين ،، وكانت جاية قبل بفيزا طباخة عند عائلة غنية بالرياض..
يعني ما يعيبها الا سرقتها ،،، السرقة اللي مادري شو تبي ؟؟ سرقة ملابس؟؟؟

أنا حيرانة ،،،،، ولا أدري وش اسوي؟؟
انا بحاجتها الفترة هذي ،،، الين اتعافى ،، يعني إن شاءالله كلها اسبوعين وبقوم بعافيتي ،، بعدها؟؟؟ ايش اسوي ؟؟؟ تكفون دلوني على حل يريحني ؟؟؟
اكمل معها السنة وتقريبا شهرين كمان ؟؟ ولا اسفرها ؟؟ ولا اتنازل عنها ؟؟
انا بأنتظار ردودكم ،،، لا تبخلون علي ؟؟ ارجوكم ؟؟