مشكلة زوجية أحتاج المساعدة الله يسعدكم..

السلام عليكم ورحمة الله بركاته
أنا اول مرة اشارك قصتي ومشكلتي في أي منتدى معليش اتحملوني قصتي طويلة راح احول اختصرها قد مااقدر وأحتاج أسمع آراء أو نصائح او دعوات ..
في البداية انا بنت ماما وبابا مطلقين وعشت مع بابا وزوجة اب كانت حياة فيها شوية مشاكل في بدايتها وبعد كدا حياة عادية ماكان فيها مشاعر (بابا انشغل بحياته وماما عند اهلها وهي مريضة بالفصام والوسواس القهري من زمان فتقريبا انحرمت من حنان الأم).
وزوجي إنسان محترم ومن عائلة كويسة وطيب وحنون وفيه صفات ايجابية كتير ولكن فيه مشكلة .. كانت طفولته صعبة شوية (انفصال الوالدين – قساوة زوجة والده في التربية) فشخصيته غريبة فيها تناقضات وافكار سلبية دايما,ما عنده ثقة بالنفس ولا تقدير للذات و متردد وحساس وضعيف الارادة وكتوووم ما يعبر ابدا بالي يفكر فيه او يحس بيه (وآخر نقطة هي أكبرمشكلة في علاقتنا).
طبعا عنده القولون من سن المراهقة وهو الآن عمره 35 سنة.
راح ابدأ بالقصة هو يسير ولد خالتي واختارني عن قناعة وحب وانا وافقت لانه كان مناسب ليا واستخرنا وتم الزواج واضطرينا السفر والاستقرار في المنطقة الشرقية ونحن من سكان مكة وجدة لظروف عمله.
عشنا بداية حياتنا في محاولة التعرف على بعضنا , شخصياتنا فيها اختلافات عادية مثلا هو هاديء انا عصبية شوية هو حساس رومانسي وانا جدية عملية (من رأيي اختلافات عادية ممكن التأقلم مع بعضنا).
كان هو اكتر حب ورومانسية يقرب مني وانا كنت بجهل مني أبعد أو اضحك أو أخجل (مااعرف مشاعر متضاربة) حياة جديدة ومكان جديد وعايشة مع رجال غريب وكنت مو فاهمة حركات الرجال ولقيت صعوبة في البداية (كان يفهمها هو للاسف أني انفر منه وماابغاه) .
بعد سنتين حملت وجبت بنتي الآن عمرها 6 سنوات ..
عشنا حياة زي كل الازواج فيها مد وجزر , مضاربات مشكلات عدم تفاهم قلة صبر تذمر شكوى بس المهم بعد كل زعل لازم نتكلم او اليوم الي بعده ما نطول وترجع حياتنا عادية.
لما سار عمر بنتي 4 سنوات تقريبا بدأ بالانفجار وقلي روحي بيت اهلك في مشكلة بيننا ولازم تنحل بدون مايوضح ايش المشكلة وايش يبغى وايش اسوي ولا شي!
وفعلا رحت لاهلي في جدة وقعدت اقرا الين طحت في موضوع انمطاط الشخصية ولغات الحب الخمسة وفهمت كل شي و هو كان موجود في جدة بس عند اهله وقبل ما يمشي الشرقية مر عليا وبابا غصبه يطلع يتكلم معايا وفهمته الي قريته وفهم مني وقال صح واتحمس وبس راح للشرقية وجلست عند اهلي زيادة.
بعد كدا الكل اقنعني روحي لبيتك وسويها مفاجاة وفعلا لما رحت جبت كيكة وهدية ورتبت البيت ولما رجع من العمل مره اتفاجأ وانبسط وحضني والحمدلله مشيت الأمور..
فبعدها بدأت اطبق الحركات الي يحبها ويبغاها مني من حب ورومانسية و زي كدا حسب الشي الي قراتو وفهمتو ورحت لمستشارة توعيني اكتر و سرت انسانة احسن حتى في عصبيتي وتذمري و هو اعترف باني احسن وبعدها قررنا الانجاب وحاولنا ولكن ما كتب الله .. ( هو حسي و جنوبي وانا بصرية شمالية).
بعد حوالي سنة للآن اعترفلي انو مقدّر التغيير وشايفه بعيونه ولكن ما بيوصله اي شي لقلبه ليش ماادري !!! اقله هل انا مصطنعة او تحسني أمثل ؟ يقلي لا مااعرف . قلتله طبيعي شي مو في شخصيتي لكن اتعملته واتقنته وحبيته وفعلا باسويه من قلبي.
وهادا حالنا للآن ان كل شي بيننا تمام كمعاشرة زوجية من قضاء وقت وتحمل مسؤولية ونتكلم ونضحك ونمزح وكل شي تمام ولكن في شي في قلبه على قولته زي البلوك او شي قافل مو قادر استقبل منك أو اعطيكي اي شي.
ودحين بيفكر في الطلاق جديا ويقول انه افضل حل مع اني حاولت اقنعه نروح لمستشار زوجي او استشاري او طبيب نفسي اكيد في حل (شاكة انه عنده اكتئاب خفيف أتكوّن من حياة طفولته ومراهقته واستمر معاه ومع ضغوطات الحياة الزوجية نفسّه كله عليا واتشكل الألم والنفور مني) ..
ملاحظة: جربنا نروح معالجين ولكن شكلهم ماكانوا مناسبين لحالتنا يعني سوء اختيار , هو ما رفض نجرب بس سار يائس ومستسلم ولما العلاج ما نفع معاه زادت الحالة عنده سوء). كمان عنده تناقضات في مشاعره قبل ما يقلي ننفصل وكدا كان يخطط معايا نعمّر بيتنا سوا وكان يبغى أطفال مني وكمان لما اطلب منه نسافر يقول طيب هيا شوفي متى وفين تبي نروح ولما سألته بعدها ليش تشركني في احلامك ومستقلبلك يقول ماادري عادي باتكلم)!!
انا عند اهلي في مكة ومعايا بنتي وهو رجع الشرقية بس انا مررة متأثرة واحبه ومتمسكة بيه وماابغى الطلاق واهلي واهله وكل الناس مستغربين من قراره لان ماعندنا مشاكل واضحة وظاهرة احس الموضوع نفسي بس. وما رضي احد يتدخل او يساعده او ينصحه. وهو كلم بابا وقله راح أستخير و ابغى الطلاق ..!!
ايش رايكم اخواتي انا ابدا مو فاهمته ساعدوني بنصيحة بموقف مشابه او بدعوة ..
وشكرا لكم كلكم مقدما ورجاء بدون تجريح ...
ولو في اي سؤال انا حاضرة أجاوب لتوضيح اي نقطة ..