مشكلة صديقتي حيرتني ومحتاجة رايكم

صباحكم ورد ياقمرات :27:
بنات عندي موضوع محتاجة مشورتكم فيه
لأختي صديقة عزيزة انحطت في موقف صعب ومحتاجة مشورة حقيقية خاصة انها وحيدة امها و أبوها ومالها اخوات غيرنا انا واخواتي
عمرها 18 سنة
انخطبت لإبن عمها و وهي في سن صغيرة من 3 سنوات يعني وهي في سن 16
و خطيبها عمره الآن حاجة و ثلاثين ====== >> لاحظوا فرق السن :29:
المشكلة فين ؟؟
المشكلة يا اخواتي ان الخطيب اساسا كان يبغى يخطب وحدة أكبر منه في العمر بس هي ماوافقت عليه
و لما رفضته و هو متعلق بها طبعا رفض يخطب اي وحدة غيرها و سافر يكمل دراسته و رجع من 4 سنوات ...... وفي اجتماع عائلي شاف بنت عمه اللي هيا صديقة اختي و عجبته و طلب من ابوه يخطبها له ...
تمت الخطوبة و كان طاير بها من الفرح و بما انهم اولاد عم وأهل كان فيه بينهم اتصال تليفونات وكدا بعلم أهلها و اهله
بعد فترة سنتين و نص تم عقد القران ( مِلكة ) بعد ما طال موضوع الاتصالات بينهم
اتصلت والدتها بأهل الخطيب و قالت لهم ان موضوع الخطوبة طول و يا اربطوا أو اتركوا
يا تعقدوا على البنت او تسيبوها بدال ماهي معلقة ونرجع لكم الشبكة و كفى الله المؤمنين شر القتال


و بالفعل تمت المِلكة
على فكرة البنت تقول انه ماكان متحمس لموضوع الملكة في البداية بس لما راح ليبت اهلها واتفقوا ابوه و ابوها مع بعض خلاص صار عادي و مبسوط حسب كلامها ..

بعد الحفلة فضل فترة حوالي 3 شهور ما كلم عمه اللي هو ابو خطيبته خصوصا انه مافي مجال يزورهم لانها في الشرقية و هو في أبها .... يعني على الاقل تصير بينهم اتصالات زيادة عن الأول بما ان الموضوع دخل في منطقة أعمق و البنت صارت زوجته بشرع الله ..

في فترة ال3 شهور كان اتصالاته مقتصرة على البنت بس
يعني يكلم خطيبته و ساعات تلاقيه يطفش فجأة و يزعل من غير سبب و يدور أسباب للمشاكل و لما تجي تعاتبه يقول معليش انا طفشان و سامحيني
البنت صغيرة و قلبها طيب و عاقلة وماتحب المشاكل و فوتت كتييييييييير و طنشت كتير كتير
لدرجة انها ساعات تجي تدق عليه جوال يقوم يطنشششششش ومايرد ابدا و يسيبها بالأسابيع من غير ما يكلمها و يبين عذره عن عدم رده عليها

في الاخير تكرر موضوع التطنيش كتير و البنت ارسلت له مسجات اكتر من مرة و هو مطنش ولا عبرها
و آخرة مرة ارسلت له مسج قالت له عمك يسأل عليك كلمه
و بالفعل اتصل عليه و كلمه عادي
على فكرة ...... البنت لها شهر منتظرة منه اتصال وهو مطنششش و لا قالت لاهلها على اللي حصل ولا عندهم خبر انه مايكلمها ..... أمها حست انه فيه حاجة و سألتها أكتر من مرة يابنت كيف خطيبك ؟ تقول لها الحمد لله طيب كلمته عادي

اليوم تقول لي انها أرسلت له رسالة من اسبوع تقول له باين ان غيابي و حضوري عندك واحد و خلاص انا راح اكلمهم و ننهي الموضوع .... اليوم لها اسبوع من ارسلت رسالتها الاخيرة و المفروض انه يتصل بها مباشرة بعد الرسالة على اساس انه شاريها ..... بس الرجال برضه طناششششش ولا اكنه حصل حاجة و خبر خير عاااااااااااادي

بقي نقطة اخيره انا شخصيا حاسة بقلق منها
البنت تقول ان تصرفاته ماتدي ان عمره فوق 30 سنة ... شكله مرجوج على الآخر ومافيه رزانة و يزعل من غير سبب و يرضى من غير سبب و يتأسف ومتــقــللللللللب... يعني بإختصار عنده حالة انعدام توازن بعض الأحيان ...

المطلوب ..... ياجماعة الخير البنت بجد محتارة تكمل والا تنهي كل شي خصوصا ان عمرها صغير جدا و الحياة قدامها و حلوة زي القمر و متربية و بنت ناس و مليون واحد يتمناها بلا مبالغة ..؟؟

جات استشارتني و انا بلــّمت ماعرفت ارد عليها و اكتفيت بجملة وحدة ( القرار قرارك وانتي شوفي ايش تبغي و نفذي )

بجد محتاجين مشورتكم يابنات الله يسعدكم
انا عن نفسي ولو كنت مكانها كنت انهيت كل شيء بعد موضوع الرسالة اللي بينت له فيها انها متضايقة وحاسة انه ماهي فارقة معاه سواء كانت غايبة او حاضرة و لقيت تطنيش أسبوووووووووع :mad:
يعني على الاقل كان يتصل ويفسر سوء التفاهم دا لو كان فيه سوء تفاهم


ايوه صح

نسيت اقول لكم انها تكلم اخته واخته توصل لها أخبار انه عادي و متحمس قدامهم و مستمر في تجهيز الشقة ولا كأنه وصله المسج اللي ارسلته له ...

ياناس تكمل والا ايش ؟