مشكلة صديقتي محتاجه مساعدتكم .. لاتبخلون علينا

مرحبا باخواتي واخواني فهالمنتدى الرائع ..
اليوم جيتكم اعرض عليكم مشكلة وحده من اعز الناس على قلبي وودي بمشورتكم لاني سويت معها اللي اقدر عليه ...
وصديقتي هذي من دوله عربيه وهالنقطه مهمه علشان تعرفون ماهي سعوديه ..

نجي للمشكله ...
بعد ماانتهت صديقتي من دراستها الثانويه هنا سافرت لبلدها تكمل دراستها هناك
وهي البنت كانت سعوديه بكل شي فيها اللهم الجنسيه بس ومحافظه وملتزمه التزام مثل باقي البنات من الاسر المحافظه ..ولاكانت تعرف شي اسمه حب .. كانت تشكر الله دايم على هالنعمه من كثر ماكنا نسمع بمشاكل البنات والحب ..
المهم وهي هناك من غربتها عن اهلها صارت تدخل النت وتتواصل معنا وتقضي وقتها بين دراستها واقاربها هناك والمنتديات ... وصار اللي كانت خايفه منه تعرفت على شاب من بلدها
وكان الكلام بينهم بحدود وهي كانت عاجبته لانها جدا حذره ومحترمه .. وهي كانت تحترمه لانه محترم ومؤدب ومختلف عن بقية الشباب اللي فالمنتدى وبعد فتره بدوا يتكلمون بالماسنجر وتعرف عليها اكثر ورغم انه فبلدها وعادي عندهم لو تروح تطلع تقابله بس هي رفضت وهو ماطلب منها بالعكس كبرت فعينه اكثر واحترمها لانها متمسكه بحجابها ..
وبدت بينهم قصة حب عني انا اشوفها محترمه لانها غيرت فيهم اثنينهم للاحسن
هي صارت تخاف على نفسها اكثر وتحرص على دينها وكانت تدعي وتستخير الله كثير اذا هالشي غلط ويضرها ويغضبه منها يصرف هالشاب عنها ويشيله من قلبها ..وكانت سوالفهم عن الاهل والدراسه وكان يشجعها وعرض عليها الزواج وكان عنده استعداد يعرفها بامه وخواته ويخطبونها عادي من دون مايحرجها ويقول انه عرفها من النت وكانت تعرف عنه كل شي ..وهو مايعرف عنها الا شي بسيط واحترم رغبتها انها ماتقول شي عن اهلها ومايعرف الا اسمها الاول بس .. كان يشجعها على الدراسه والله صديقتي كانت من النوع اللي عادي مايهتم فالدراسه بس بعد ماعرفته كانت تجد وتجتهد وهي تحكي لي عن مستواها وكيف تحسن
كنت استغرب ياما عجزوا اهلها فيها بس كانت عادي بس الحب يسوي اكثر من كذا ..
وشجعها تتحجب حجاب كامل زي حجابها فالسعوديه يعني تغطي وجهها كامل وبالفعل سوت هالشي رغم غرابته وندرته فبلدها بس كانت ترضي ربها وكانت سعيده وهو شجعها اكثر بعد ماكانت متردده شوي خوف من احد يضايقها
وهو كان عيبه الوحيد يدخن شجعته الين بدا يخفف من هالبلا وان شاء الله يكون تركه
والصلاة والصوم كانوا يشجعوا بعض عليه كان لمن ياذن بسرعه تطلعه يلحق الجماعه بعد ماكان يصلي فالبيت لكنها شجعته يروح يصلي فالمسجد ... احس اني طولت بالكلام بس حبيت اوضح لكم الشي اللي بينهم .. ادري البعض بيشوف علاقات النت ماهي جديه او غلط بس هذي اراء وتختلف والعله ماهي فالنت او علاقاته بقدر ماهي بسوء استخدامنا له اتمنى محد يفهم اني اشجع عليها بالعكس ..اذا فيد الواحد يبعد عنها الافضل يبعد ..
نجي للمشكله ... من كم يوم صار بينهم مشكله وسوء فهم .. وهو فهم الموضوع غلط وزعل
حاولت تقنعه بس مثل كل الرجال فالاول تاخذهم العزه بالاثم ويزعلوا .. وهو هذا عيبه كان اذا زعل من شي تركها كم يوم الين يطيح اللي فراسه ويرجع بس بعد ماتكون ماتت قلق وخوف عليه .. وهذا الحاصل الان له تقريبا عشر ايام ماتدري عنه شي الا انه طلع زعلان ومتضايق وقال ماهو راجع للنت ابد وهي تعودت منه هالكلام اذا صار شي زعله من احد فالنت او من اصدقائه او منها ... والحين صديقتي مالها الا ربها والله رحمتها لمن اشوفها اونلاين فالماسنجر وكيف تدخل وتطلع كل شوي على امل يرجع او حتى مايرجع بس تعرف هو طيب او لا والله رحمتها وكلمتها والبنت تعبانه مره نصحتها بالصلاة والدعاء ان الله يهون عليها ويشرح لها صدرها ... والمسكينه الوقت اللي تركها فيه كان فعز اختباراتها والله يجيب العواقب سليمه ... انا عرضت عليكم مشكلتها وانا اعرف انكم والغالبيه منكم راح يردوا عليها بنفس ردي ..انها تصلي وتدعي وهي فعلا مواظبه على التراويح والقيام وتدعي الله يهون عليها بس ودي انتم بعد تنصحونها .. لانها تقرا المنتدى ..انا قلت ادعي ان ربي يشيله من قلبك قالت دعيت بس شي من داخلي مايبغى وعلى فكره هي ماهي مراهقه ولا عندها مشاكل عائليه ممكن تكون خلتها تلجا لهالشي كتعويض هي عمرها 24 سنه
اللهم اني اسالك تهون عليها وتريحها والله اني شلت همها لانها اكثر من اخت لي
دعواتكم لها ..وانتظر انا وهي ردودكم والله يكتب اللي فيه الخير وجزاكم الله خير الجزاء