مشكلة قد تكون بسيطة وقد تكون عويصة

السلام عليكم ورحمة الله وبركاته ..
لاول مره في حياتي الجأ لموقع او منتدى لاطرح مشكلتي بس ضاقت بي السبل ..
انا تقدم لي ولد عمي قبل فتره وكانوا طول عمري يقولون مابتاخذين غيره ، بس انا كنت اقول لو مايبقى رجال غيره مااخذته ومو كبره ولا غرور بس لانه ماعنده شخصية حسب مااسمع ومنطوي ومنعزل حتى طريقة لبسه مو مثل الشباب واهلي كانوا معاي بهالموضوع .. لما تقدم لي طبعا رفضت ع طول بس تفاجأت بردة فعل اهلي كلهم قالوا فكري واستخيري قلت شفيكم هذا فلان من جدكم ؟ قالوا والله تغير راح للعسكرية وجاء رجل ثاني تفاجأنا فيه تغير 360 درجة وخلوق ومؤدب وبمجلس الرجال رجل .. استخرت وسألت الكل عنه حتى ازواج خواتي مدحوه وقالوا احسن منا ورحت لحساباته بمواقع التواصل ولاحظت عليه العقل والثقل ووافقت عليه بس بالعقل اما النفس ماتبيه ولا ترغبه وماادري ليش وافقت بس يمكن لاني حكمت عقلي واساسا سواليف الحب ذي ماكنت حاطتها براسي لاني ادري الزواج مافيه حب وعشق فيه الفه ومحبة وعشره بالمعروف ..
طبعا اسبوع ماقبل الملكة كان اخيس اسبوع بحياتي طول الوقت احس حياتي بتكون مجامله وتسليك وماراح احبه ولا راح اطيقه بعد .. المهم ملكنا وهديت شوي وصرت احسن بس ماكان يعني لي شي بس بيوم الشبكة وبعد ماشبكنا حسيت اني اسعد انسانه بالدنيا حبيته دخل قلبي رغم انه مو حلو وانا اصلا مايهمني الشكل ولا اعطاني وجه لانه خجول ههههه لما خلونا لحالنا بارك لي وعطاني هاداياي وسألني اذا محتاجة شي وطلع بسرعه .. طبعا طلع واخذ قلبي سبحان الله وجلست ايام افكر فيه واقول ليته حولي احضنه 🙈 .. بس لما كلمني بالواتس بعد فتره يوم كلمني سبحان الله راح كل هالحب ماادري ليه صرت استثقل سوالفه .. يتفلسف بزياده ويتصنع بالكلام ومؤدب بزياده وغشيم واحسه بس يبيني انبهر فيه بس مايدري اني شايفه وعارفه وفاهمه .. وفيه شوية بخل وانا اكره هالصفة وقايلة له اني اكرهها ..
ورغم انه يقولي من كلام الحب من احسن مايكون وباين عقله كبير ومخه رزين ومو من النوع اللزقه ، وانا اصلا مو معطته مجال ، بس من اول رساله بيننا حسيت بضيق وحسيت اني مااحبه .. ماادري وين راحت ذيك المشاعر هو يحبني ادري بهالشي حتى لو بخيل امرها سهل باعوده ع الصرف لاني احيانا ماالومه ابوه بخيل يعز عليهم الريال عشان كذا مو متعود يصرف هالمبالغ .. بس ماادري ماابي اظلمه معاي لانه طيب وشاف وعانى بحياته ماابي اصير انا والزمن عليه وهو حساس لو حس اني ماابيه بيشيلها بخاطره خصوصا اني مو مبينة له شي .. فقولوا لي طبيعي احساس النفور هذا !! انا ماشفته من بعد الشبكة بس اخاف انفر منه بعدين اخاف مااحبه اخاف ماابيه يلمسني ولا يقرب مني .. الحين صار لنا شهرين نكلم بعض ونفس الشي حتى هو مايطور بالمواضيع كل يوم نفس الكلام .. انا تغيرت صرت أجرأ حتى صرت امزح عشان يتلحلح شوي ياخذ علي بس هو يقاله بيدلعني يقعد يقلب الموضوع رومنسيه وتحوم كبدي زياده انا 😞