مشكلة محرجة شوي.. لكن حساسة ومهمة.. تفضلوا جزاكم الله//اكتفى من الردود

السلام عليكم
ماراح ادخل بالتفاصيل احتراما لقوانين المنتدى
لكن هي وحدة من تزوجت وزوجها يعاقبها بالهجر
يعني اخذ من الدين قاعدة اهجروهن بالمضاجع
فعادي يهجر بالاسبوعين والثلاث مهما كانت السالفه
وهو يرضى من ثاني يوم بس يقول لها نفسي منردة عنك
يعني يعطيها ظهره وقت النوم بالاسابيع


واحيانا ماتكون فيه اي مشكلة او اي شي
وتقوم زوجته تتزين ووتعطر وتتشيك.. ويعطيها ظهره وينام
واذا عصب يقول لها: انتي كل همك ذاك الشي
ومرة قال: انا قدرت اكسرك واعلمك ان جمالك مايهمني عشان ماتشوفين نفسك علي


حتى اذا صارت الزوجة بيوم راحت تسوي حمام مغربي مثلا
يقوم يفتعل اي مشكلة من تحت الارض وينام بدري

ومرة سوت له ليله مصريه جلست اسبوعين تحضر لها.. وشرت بدل رقص
قام هو واعتذر لها..
قال: مشكوره حبيبتي بس انا بتعشي برا اليوم.. رغم انه كان قايل بتعشى بالبيت!

علما بان زوجته مهتمه مرررره بنفسها
يعني نظيفة ومرتبة وناعمه دايما ماشاء الله
وتستخدم ارقى العطور واذا اخذت دش تعمل صنفرة وماسكات
واذا لبست مافي اشيك ولا انعم منها
وكل شهر تشتري قمصان نوم جديدة وتغير بتسريحة شعرها
وتنقش حناء بجسمها احيانا واحيانا تلصق استكارات واحيانا عدسات الملونة
المهم انها تغير شكلها دايما و ٢٤ ساعه مرتبه
ولازم تحط يوميا روج او قلوس مع بلاشر وكحل
وتجلس فيه ماتشيله الا قبل النوم
وتنظف اسنانها ٣ مرات يوميا وبفمها دايما مستكه بطعم الهيل
ودايما تعطر غرفة النوم والمفارش بياسمين او بخور
باختصار البنت رشيقة وانيقة وراقية ومرتبه والكل يحسده عليها..


كانت اذا سمعت عن النصايح اللي تقول ان الرجال ممكن تكسبينه بالجنس.. تتعجب!
تضحك وتقول: اما هالنصايح خرابط.. او ان زوجي غيييييير عن باقي الرجال..
حتى اذا سمعت عن لهفة الرجال لذاك الشي بأول شهور الزواج.. تتعجب اكثر..
وتحس باحباط اكثر واكثررررر.. رغم انها لسى عروس وبعز شبابها وجمالها..
ورغم ان زوجها لسى ببداية الثلاثين..

لهم على هالحال سنتين.. لحد ماحملت..
وصار يقول لها بعدي عني.. ما اتحمل شكل بطنك..
وكل يوم مطلع لها حجة جديدة عشان يتحاشاها.. وهي صابرة..
لانها تحتسب الاجر ولانها تبي تحافظ على بيتها وزوجها..
وبعد ماولدت رجعت له مشتاقة.. وهو برضو مطنش..
يعني جاها مرتين خلال شهر.. رغم انها رجعت مثل اول ماشاء الله..
ورغم دوشة البيبي الا انها ظلت محافظة على كل شي كانت تسويه..
يعني مثلا تقول لزوجها: حبيبي عطني 10 دقايق انوم البيبي وراجعه.. ابيك بسر.. مع غمزة..
ترجع تلقاه غاطس بعاشر نومه.. رغم انه يسهر بالعادة.. بس عنادا فيها..
وهكذا..
وبأحد الخلافات قال لها زوجها: انتي تتلصقين فيني بس انا بأسي قووي..
وانتي ماتهزين فيني شعره.. وكلك على بعضك ماتهميني..
طبعا اذا تصالحوا اعتذر عن هالكلام.. ويقول: كنت بقهرك بس..
لكنه يرجع بنفس الوقت لحركات التصدد والتغلي حقته..
واذا شافها حاطه روج قبل النوم جلس يتريق..
ودايما يقول لها: انتي فاكرة الزواج كله جنس.. الزواج شي اكبر من كذا..
علما بانها مو كل يوم تتقرب منه.. يعني تبي حقها مرتين بالاسبوع عالاقل..
وهو دايما يقول لها: انا مو خفيف زي باقي الرجال.. لاتتوقعين اني مثلهم اكبر همي الفراش..



المهم
مع الوقت صارت زوجته تنفرررررررر من قربه وقت النوم..
تحاول تنام قبله.. وتعطيه ظهرها..
بطلت مكياج الليل.. بطلت قمصان نوم مشخلعه..
تغسل وجهها وتلم شعرها وتلبس بيجامتها وتغطس بالنوم..
وهو كان ملاحظ وساااااكت.. شهر وشهرين..
بعد 3 شهور بدا يرمي كلام.. يعني اذا شالت البيبي يقول: الله لنا.. نسيتيني..
وين الاحضان حقتي انا..؟
ووقت النوم يجي يقول وهو منحرج: ايش دعوى حبيبتي سافطتني؟
او يقول: كنتي اول ماتتامين قبل البوسة.. ليه تغيرتي..
وهي مطنشه.. او تقول بسرعه: خلاص خلاص هذه بوسه يلا ينام.. وتنام..

صار الرجال يتميلح عندها كل شوي.. ويتزين لها بشكل مبالغ فيه..
حتى الحلاقة اللي كانت تحبها وكان يرفضها يقول يع ما احبها.. صار يسويها لعيونها..
صار يعلق على صور الفنانات عشان يقهرها.. ويقول: وين اللي يعفني؟ وهو يغمز..
صار يتغزل فيها عالعشاء.. ويحاول يمهد لها قبل النوم.. وهي تسحب..
تقول: مو جالسه انتقم والله.. بس نفسي مكسوووره..
سنتين وهو محسسني اني مو مرغوبة.. ويعايرني بقربي له..
صرت انحاشى اقرب كل ما اتذكر تجريحه.. ياما سفطني بالشهور..
واول اذا حضني كنت احس باحراج وكهرباء بجسمي,, الحين احس بخنقة..
تقول: ارتحححححت.. ومع الوقت ماتت رغبتي فيه..
احبه صح.. قايمه بكل حقوقه صح.. اقدره واصونه صح..
لكن مو قادرة اتقبل قربه وقت النوم.. وهو السبب..



تعليقكم بنات؟