مشكلة ممكن تكون صغيرة بس بالنسبالى كبيرة

السلام عليكم ورحمة الله وبركاتة
عندى مشكلة بسيطة اوى بس مش عارفة اعمل اية
انا اتخطبت من فترة وحصلت مشكلة بينى وبين خطيبى
والمشكلة ان كل الناس نغلطانى مش عارفة لية هل السبب فيا انا ولا الممجتمع دة اتغير وبقى وحش وكلة حاجة فية عادى للدرجادى
المشكلة اللى حصلت اننا كنا فى يوم خارجين واليوم كان كلة ماشى تمام ومظبوط وعلى الاخر بقى يوم اسود
يا ترى اية اللى حصل (خطيبى باسنى من خدى فى الشارع)
ممكن الكلمة تكون بسيطة بس بالنسبالى كبيرة انا حسيت انى رخيصة اوى اوى وزقيتة وبهدلت كرامتة فى الشارع
وهوا قعدت يتأسفلى كتير بس انا مكنتش برد علية وكنت ناوية اوصل الموضوع لبابا وماما فى البيت
بس مردتش لانهم ايكد حيفركشوا الخطوبة وانا بصراحة بحبة وعاوزاة بس مكنتش متصورة انة يعمل فيا كدة
كل اصحابى لما حكتلهم قعدوا يقولولى دى حاجة بسيطة اوى فيها اية يعنى يبوسك دى مشاعر واحساسيس ودة اكيد حصل غصبن عنة بس ازاى يعنى هوا المفروض خطيبى وبيحبنى يبقى يحافظ على شكلى ادام الناس وميخليش حد يقول عليا كلمة وحشة ابدا وناس تقولى انتى غلطانة كان ممكن تقوليلوا ان دة جرحنى وزعلنى ومن فضلك متعملش كدة تانى بهدوء بدل ما انتى كبرتى المشكلة اوى كدة
بس يا جماعة هوا بجد طلبها منى قبل كدة وانا قولتلة لا مبحبش اعمل حاجة مش من حقى وهوا قالى خلاص وانا مش حعمل حاجة انتى مش عاوزاها يعنى عارف انها حضيقينى يبقى عملها لية اساسا

بجد مش عارفة اعمل اية انا مش عايزة اسيبة وفى نفس الوقت زعلانة منة اوى اوى لانة حسسنى انى رخيصة
واللى زاد بقى انة هوا كمان زعلان اوى وبيقولى انتى حسستينى انى زبالة هوا انا نازلك مخصوص عشان اعمل كدة يعنى انا لو عايز اعمل كدة عندى اللى حعمل معاهم انا عملت كدة عشان بحبك وهوا دلوقتى اللى زعلان
انا بحبة لدرجة انى جيت على نفسى وكلمتة وقولتلة خلاص انا قابلة اسفك وبلاش نزعل من بعض بس من فضلك متعملش كدة تانى ولا الموضوع حيوصل لوالدى وحفركش الخطوبة قالى انا مش عاوز اسيبك ونفس الوقت انتى جرحتينى وسيبى الزمن هوا اللى حيداوى

قولولى اعمل اية وهل اللى انا عملتة دة صح ولا غلطت ولا مين اللى غلطان ولا انا فعلا مكبرة الموضوع ولا اية؟