مشكلة ولدي مع المرضاعه والحمام بسبب اخته الصغيره

السلام عليكم

عندي ولدي عمره سنتين ونص ... مب قادره اعلمه يترك المرضاعه .. لانه يشوف اخته الصغيره عمرها سنه وشهرين ترضع .. وهو يقلدها بكل شي .. والمشكله ماصار يشرب الحليب في المرضاعه .. لا وطالع لنا بشي جديد .. لازم يشرب العصاير بالمرضاعه اذا اخته اشربت حليب او عصير .. والمشكله هي صغيره مااقدر اخليها تترك المرضاعه .. وهو حاولت وياه جبت له انواع واشكال من الاكواب عليها حركات ورسومات .. يشرب منهم .. بس يرجع يطلب المرضاعه في اخر اليوم ..
والشغله الثانيه ..
ابي اعلمه على الحمام .. مب عارفه شلون .. وهو ماشاءالله ذكي ويفهم .... اقوله نروح الحمام مايبي يروح يبي يلبس الحفاظه .. اذا وصخ نفسه في الحفاظه مايقولي انه وصخ نفسه واذا سألته ينكر .. مع انه والله فاهم وعارف بس مادري ليش يعاند .. وانا اغسله اراويه حفاظته الوصخه واسأله شوف شنو هذا يقولي هذا شنو واقوله شفت انت وصخت لازم تقولي اذا وصخت عشان اغسلك وتصير نظيف .. ويقتنع .. بس المره الثانيه يرجع ينكر ... جنني .. مع انه يوم اصغر ماكان جذي .. كان اول مايوصخ يركض يقولي ماما وصخت تعالي غسليني ..

عنيد عنيد بشكل مو طبيعي .. واحس انه طول الوقت عينه على اخته اي شي في يدها ياخذه اي شي تسويه يسوي مثلها ..
وهي فديتها صغيره لاتكش ولاتنش الا مظلومه مع اخوها اللي ماخذ كل وقتنا على مشاغبته

ساعدوني الله يخلي لكم عيالكم ان شاءالله