مشكلتي أنا وزوجي في اسم بنتي

الأسرة والمجتمع

السلام عليكم ،،،أخواتي عندي مشكلة يعلم الله ما أحط راسي على مخدتي إلا وأحاول ألاقي حل لهادي المشكلة ،،أنا متزوجة لي خمس سنوات اول زواجي حملت ماشاءالله بسرعة لكن عيون الناس مارحمتني وسويت عملية الزائدة وأنا حامل في الشهر الثالث واتنومت في المستشفى شهر مابين الحياة والموت لكن الحمد لله ربي رفق بحالي وطلعت من المستشفى وولدت ولادة مبكرة في الشهر السادس وكانت بنت الله يجعلها شفيعة لي يارب ،،،بعد ماخرجت من النفاس ريحت كم شهر ورجعت فكرة الحمل في راسي خصوصا واني ما استخدم موانع ولفيت الدكاترة وممرخات وربي ما أراد جلست سنة بدون حمل بعدين الحمد لله حملت من دون أي تدخلات ،،وابتلاني ربي بحصوة في المرارة واتحملت الوجع عشان جنيني والدكتور قال انه لازم أسوي العملية بمجرد الولادة لانه المرارة ملياااااانة حصى ،،وولدت الحمد لله وجبت أحلى بنوتة ،،،المشاكل بدأت لما جينا نسميها أنا وأبوها كنا متفقين على اسم والمفاجأة أتدخل أبو زوجي وهو رجل ديكتاتور جداً جداً جداً ومرة متعب أهله وزوجي معاه المهم انه أتدخل وقال لزوجي البنت تسميها على اسم أمي يعني جدة زوجي والاسم مرة قديم وكبير وقال لي زوجي ورفضت وأوصلتها للطلاق لأني تعبانة في البنت ولسه ورأيا عملية المرارة كل دا وما أستاهل أني اسميها ،،أبو زوجي لما شاف أصراري قال لزوجي يا تسميها على اسم أمي ولا لا انت ولدي ولا أعرفك مع انه عنده ثلاث بنات وكل وحدة اسمها أحلى من الثانية ليش ما سمى وحدة فيهم على امه ،،المهم زوجي صار بين نارين وراح كتب اسم البنت زي مايبغ أبوه ،،ويعلم الله أنها مشاكل ليل مع النهار بسبب دا الموضوع وزوجي طيب وابن حلال بس انه يخاف من أبوه مرة وشخصيته ضعيفة قدامه ،،، دحين بنتي الوحيدة عمرها ثلاث سنوات ربي يحميها وزودت عيار الهوشات لأني بدخلها الروضة ومستحيل ادخلها بدا الاسم ،،ًواحس موقفي قوي لانه أتأخر حملي وطلع السبب من زوجي يعني لأحمل ولا اسم بنت ،،،،،شورو علي أخواتي ايش أسوي نفسيتي زي الزفت مرة مستعرة ومستحية من الاسم وفي نفس الوقت ماابغ أخسر زوجي ،،،شورو علي ،،،
129
64K

يلزم عليك تسجيل الدخول أولًا لكتابة تعليق.

تسجيل دخول

الحاجه صوصو
الحاجه صوصو
و عليكم السلام و رحمة الله و بركآته .
حبيبتي ايش الاسم اذا ممكن عشان نشوف حجم الموضوعع ^^
ثانيا :
اسمعي يمي , شفتي xxxxx وكيف يجيبن روس ازوآجهن !!
بالكلام العذب و التدلع , كل الي عليك انك تدوخينه و تهبيلين فيه : و فاتحيه بنفس الوقت عن اسم البنت و أبدي تشكي أنا احمل وأطلق و اتألم و بسوي عمليه قريب , ما استحق أسمي البنت ؟ طيب افرض مت و أنا خاطري بأسم معين تقعد كل ماناديت البننت بأسمها الي يبيه ابوك تتذكرني و يضيق صدرك لأن خاطري بأسم غيرة , جدتك الله يرحمها مآتت ومآت اسمها معها , كيف شكل بنتك بكرة يضحكوا عليها خاف على نفسيتها :(

^ طبعا كل هالكلام قزوليه بغنج و دلع . ^^ و بالتوفيق
dreams happy
dreams happy
الله يعينك،.
      والله الموضوع معقد وصعب يعني ابوه ومافيه يوقف بوجهه ويزعله، بس انا والله من رأيي مششي الموضوع، كله اسم لا طلع ولا نزل، والواحد مو بإسمه،.مششي الدنيا زي ماهي ولا تعاندي زوجك لانو هو كمان مايقدر يخسر ابوه،.والله يسسخره لك ويعينك،.
غيمه,
غيمه,
الله يدبرك ع احسن تدبير
قاسية وراسية
قاسية وراسية
يا حاجة صوصو قسما بالله أني كارهة الاسم لدرجة حتى ما احب اكتبه وماني معترفة بكرت العيلة بس هو اسم عتيق جداً جداً وازيدك من الشعر بيت سويت العملية وشافني وأنا أتلوى من الوجع لا وارضع كمان وأنا بطني مفتوحة أربعة فتحات من العملية ،،،وحبيت أضيف أني أنادي بنتي بالاسم اللي أنا أبغاه قدام زوجي وأبوه وأهله عناااااااد حتى بنتي صارت عارفة اسمها وأبوه لما يسألها ايش اسمك تقوم تقوله الاسم اللي أنا أناديها فيه يقوم ينقهر
alzhra121
alzhra121
نصيحة شدي حيلك واحملي وجيبي بنت سميها بكيفك

مشيها لاجل خاطر زوجك

وان مات ابو زوجك روحي لأقرب فرع احوال مدنيه وغيري اسمها

سهله وبسيطه تكفين لاتعقديها

قسم بالله عندنا بنات عليهم اسماء يحزن عليهن الحجر ...ههههه

قرمله.. مهرة.. عطرة.. رفعة..

ان كان بنتك مالها نصيب في احد الاسماء ذي
فأنت محظوظه وبنتك كمان


وسعي صدرك يابنت الناس