مشكلتي إني آخذ الأمور بعصبية في المشاكل مع زوجي ... فما هو الحل ؟؟

مرحبا بنات ...
شلونكم انشالله بخير ..
بنات هذي أول مرة أشارك في هذا القسم ..
مشكلتي ..
أنا متزوجة من أربع شهور بس والله أمس كملت الأربع شهور ..
زوجي رجل جداً طيب ومتفهم ومنفتح على الحياة ومتعلم ويعمل مهندس مدني ملتزم ويصلي والحمدلله ويخاف الله وعمرة ما صغرني قدام أهلة أو أهلي دايماً يقول عني قدامهم كلام يرفع الراس ويشرح الصدر والله وأنا أحترم فيه هذا الشي ..
أنا زوجة على قولته طيبة وحلوة وأمورة وأحب نطلع ونروح ونيجي نطلع مطاعم ونروح رحلات بحر يعني يا بنات أنا مش نكدية أبدا وأعرف أنه يحبني ويموت فيني بس مشكلتي أني وايد عصبية .. وأزعل فوراً وأعصب على أصغر الأمور .
أعمل في شركة تأمين دوامين .. ولحد ألحين ما حملت وننتظر الفرج من الله .
حياتنا جداً جميلة وأحس أنه طاير فيني ومو مقصر معاي أبداً .. والله العظيم أشكر ربي صبح وليل على هذه النعمة .
أنا مو مقصرة فيه ولا في بيتي وجدا هو معاون معاي في شغل البيت وترتيبه لأن أنا هو عايشين في بيت لوحدنا مش عند أهله .
بس يا بنات المشكلة أن روحي تصغر بصرعة من أي موقف وأي مشكلة وأعصب على طول .. مرات أصير أصارخ في وجهه .. هو بطبعة جداً هادي ومش عصبي أبداً ويحل الأمور والمشاكل بهدوء جداً عكسي أنا .
أهله ناس جداً طيبين وأحب أزورهم وأروح عندهم وأمة طيبة جداً وأحبها .
بس هنا المشكلة .. أن أنا وهو مشاكلنا صغيرة ونحلها على طول .. بس إذا جاتنا المشكلة من برة باب البيت غالباً تكون من أهله أو بالأخص أمه .
وكل ما صار شي بيني وبين أمه .. مش مستعد يطلعها غلطانة أبداً ..
وأحس المشاكل الي تصير سخيفة بس مادري شلون تكبر.. والله العظيم أمه طيبة بس أحسها مرات تتدخل في حياتنا بس والله أحس تصرفاتها كلها جاي عن جهل وعدم درايةومرات تزن كتير وتفرض بعض الأمور مثل إذا بطلع مشوار ممكن تفرض نفسها أطلعها المشوار الي تبيه بس أنا أكون ما بدي أوصل ذاك الطريق لأن الطريق زحمة أو عندي مشاوير أهم من مشوارها أو بصراحة مش جاي على بالي أروح ممكن تزعل وما يعجبها الكلام أو تكبر المشكلة ويصير الحق علي أو مرة أون مواعداها أطلعها الساعة عشرة على معرض أوسوق وتتصل فيني الساعة تسعة وزعلانه وتصارخ ليش لحد ألحين ما طلعتها والمشكلة أني أكون متفقة معاها على العشرة يعني هي ايش بدها فيني قبل العشرة وهذا الي يسببلي العصبية . وإذا شكيتها حق زوجي وأكون معصبة يسمع مني ويحاول مرات يعالج المشكلة بس من غير ما يقول أمه غلطانه ومش مستعد يغلطها أبداً ولا يطيبلي خاطري وقت المشكلة وأصير أبكي من القهر وآخر شي بعد ما أكون فطست من العصبية والبكى يطيب خاطري لأن يموت إذا بكيت من أي سبب أعصب وايد وأحس أني مظلومة أكون أنا عصبية وهو أعصابة باردة . وحتى أحس أنه ما يرجعلي حقي وآخر شي عصبت عليه وقلت له وحلفت أنه ما راح آخذ أمه أي مشوار سواء سوق أو غيره وما راح أوديها غير عند الظروف . وقلت له انا ما أحب المشاكل والمشكلة الي تدخل بيتي مرتين وثلاثة ما أحب أنها تتكرر فرجاء لا تخلي أمك سبب مشكلة بيني وبينك وابعد هذا الموضوع عني وقلت له أنت عندك أخت تسوق واثنين من اخوانك في البيت ومش متزوجين وعندك أبوك عنده سيارة وفي انت إذا بدها تلروح أي مكان ياخي وصلها انت أو حدا من أهلك . يزعل من كلامي وما يعجبه بس كمان ما يعصب بس يقولي هذا الكلام مايصير وما يمشي وما تزعليني منك .
يا بنات بصراحة أنا ما أحب الي يفرض الشي علي أو يجبرني أسويه بدون رضا ..
أحب زوجي وأموت عليه والله لا يحرمني منه .
صارلي أسبوع أحس أن لما أعصب معدتي تصير تعورني وايد ولما أهدا يروح الألم سألت قالولي أكيد قولون عصبي .
مش عارفة ايش أسوي بعصبيتي وشلون أكون هادية وأحل المواقف بهدوء وبدون عصبية . زوجي يقولي كل شي فيكي رهيب إلا عصبيتك يقولي عيبك عصبيتك .
يارب عسى ربي تساعدني ما أبي أخرب بيتي بسبب عصبيتي وأسلوبي النرفزي .

قولولي أيش أسوي يا بنات علشان أرتاح في حياتي في بيتي ومع زوجي والله ما أحب نزعل أنا وهو من بعض أبدا .
أيش الطريقة الي تخلي الوحدة هادية وما تعصب ؟؟؟؟