عندي مشكله تضحك وتبكي ما أدري كيف أوصفها لكم يمكن تقولون داعيه للخير تتدلع علينا
ويمكن تشوفونها تافهه... لكن ابيكم تعيشونها معي وتتخيلون نفسكم في محلي حتى تشوفون الحاله إللي أنا فيها
يا بنات تدرون إيش مشكلتي
مشكلتي إن الاطفال كبارهم وصغارهم يحبوني لا وبعضهم يموتون فيني
يمكن تستغربون من كلامي !!!!
وربي إني صادقه يا بنات
أكيد إنتم ألحين تقولون وين المشكله
وربي إني أضحك وانا أكتب على الكيبورد هم يضحك وهم يبكي
أحس مشكلتي غريبه وعجيبه في وقت واحد
مالكم بالطويله ابي اقولكم كيف هذولا الاطفال يحبوني ويموتون فيني وما أدري هي نعمه وإلا نقمه !!؟؟
أنا ابي احكي لكم الحكايه من البدايه من يوم وأنا في صف خامس كانت تحبني وحدة صغيرة في صف اولى إبتدائي
وبعدين في الثانويه حبتني اخت زوجي كانت صغيرة في الابتدائي كانت تجي عندنا في الثانويه
قبل أتزوج كنا نخرج مع بعض انا واخواتها
بسيارة وحدة وعلى ما تجي السيارة ما تروح تنتظر مع أخواتها لا تجي تجلس معي وزميلاتي
وتترك أخواتها
وإستمرالحال وتزوجت وربي رزقني
باخو زوجي الصغير ابو سبع سنين ما يفارقني من اول اسبوع زواج
حتى إنه جهزوا له اهله شنطته عشان يروح معي شهر العسل تخيلوا ؟؟
ابي اطلق لكم العنان عشان تحسون بإللي أحس فيه
لولا ستر ربي وثم تدخل اخو زوجي الكبير ومنعه إنه يروح معي شهر العسل يا حسرة قلبي
ومن بعدة اخواته كل وحدة تجي من المدرسه وما تروح لبيتهم تجي عند أختكم في الله داعيه للخير
وبما إننا في عمارة وحدة وكل الاخوان متزوجين وعايشين مع بعض طبعا كل واحد في شقه مستقله
تطور الحال فصاروا اطفال وعيال اخوان واخوات زوجي كل شوي وواحد داخل وواحد خارج
وربي لو تشوفون فرحتهم من يوم ما يفتح باب بيتي ولا كأنه باب الكعبه إنفتح وولد داخل وبنت خارجه
أكيد تبون تقولون إنتي الغلطانه ما تمنعينهم من دخول بيتك
لكن الاجابه تبي تصدمكم ما في طفل ما خرجته وخاصمته وطلعته من بيتي لكن مافيه فايدة
سبحان الله ما يزعلون مني شوي ويرجعون ولا كأن شئ حصل
يمكن عشان قلبي ابيض وما احقد على احد مدري
لو وحدة من سلفاتي سوت ربع إللي سويته ما احد دخل عليها
أنا ما ني داريه إيش مسويه لهم >> صرت أشك في نفسي
مرة في واحد من عيال سلفاتي كان يضرب ولد ضيفه جات عند عمتي وكل شوي والولد جاي يبكي
عند أمه بصراحه موقف محرج حتى أمهاتهم إنحرجوا من الضارب والمضروب
تدرون كيف حليت المشكله قلت لولد سلفتي إذا ضربت هذا الولد ثاني مرة ما عاد اخليك تدخل عندي
وسبحان الله ما عاد ضربه شفتم كيف يسوي الحب
يا بنات والله العظيم عندي بنت سلفتي هبلت فيني كل شوي وهي عندي ما تقعد في بيتهم كثر ما تقعد عندي
لا والمضحك إنها كل شوي وهي تقول انا أحبك واموت فيك وشوي وتنط في وجهي وهات يا بوس
لو اخليها كان تقطع خدي بس أنا شارطه عليها بوسه وحدة تكفي في اليوم >>> حشى دواء
انا عيالي ما بوستهم ولا باسوني وإبتلشت في عيال سلايفي >> مسكينه أكسر الخاطر
و شوفوني يوم الخميس لما يتجمعون حمواتي عند امهم وكل وحدة تجيب عيالها وعينك ما تشوف إلا النور
بيتي ينقلب حضانه وهاتك يا إزعاج من جميع الاعمار من سن ثلاث سنوات وحتى 18 سنه >> صرت البيت الكبير
لا وازيدكم من الشعر بيت إذا رحت عندي اهلي >> بيتي قريب من بيت أهلي
لازم يلحقني كم واحد منهم وربي إنهم يتركون أمهاتهم ويجون ورايه عند اهلي
وكل ما ابي اجي اروح لأهلي اقول يا فلان لا تلحقني عند اهلي روح مع امك يقول طيب
وشوي وهو جاي ورايه اطردة ويرجع ,,اطردة مرة ثانيه ويرجع صرت أشك في نفسي إن ساحرتهم
وحتى في الزواجات إذا رحت فرح بعض الاحيان أقول لبنتي روحي مع البنات في طاوله ثانيه
ولا كاني أمك ابي الفكه منهم >> مسكينه بنتي راحت فيها
شوي والطاوله مليانه من بنات سلفاتي وبنتي الله يا البلشه
وين ما أطقها عوجا وإذا رحت لسلفتي ويكونون هذولا الاطفال ورايه في البيت ينقالي أبي أشرد منهم
وأجي زيارة لسلفتي إللي بيتها يصفر من الاطفال تدرون جو عندي في بيتي وتركوا امهم
وشوي وهم طابين علينا عيالي وعيالها يعني وين ما روح وهم ورايه
ياربي وين اروح وين اولي من هذولا الاطفال :icon33: وربي قربت أجن منهم أهاليهم مرتاحين وانا إللي مبتلشه فيهم
من أخر ما حصل من هذولا الاطفال اليوم رحت الحرم وجلست في الساحه وكانت شبه فاضيه
وربي يا المكان إللي جلست فيه يمكن مترين في مترين كان فاضي وما فيه احد لا حريم ولا اطفال وماهي إلا
عشر دقائق ويجون مجموعه من الاطفال إللي يبعون تقريبا عشرة ويقعدون فوق رأسي وأنا صرت مثل هذا
يعني تركوا الساحه بكبرها وما حلا لهم القرقه غير عندي كانهم يدرون عني وعن معاناتي
ساعات أغبط سلفاتي وازواجهم ما احد يطق بابهم ولا احد يفكر يدخل عندهم
أما أنا إذا شافوني إنهبلوا فيني
نسيت شئ إسمه حريه وراحه وهدوء
شوي وعقلي يفلت مني من الاطفال عيال سلفتي متعلقين فيني أكثر من أمهم وليل ونهار وهم عندي
لا تحسبوني ساكته وفاتحه الباب على مصراعيه المفاتح معلق في رقبتي
لكن لو ننسى الباب دقيقه ما تدرون إلا والكل دخل
فيه ولد لوحدة من حمواتي هو الوحيد إللي ما يدخلي عندي يجي عند بابي ويتكلم مع الاطفال الثانين
وما يدخل ابد ويستحي مني حيل
لين ذاك اليوم إللي تسببت فيه لنفسي ومسكته وقلته حبيبي ليه ما تدخل عندي ويستحي الولد ويغطي وجهه بيديه
وانا اقوله لا تستحي إنت رجال البنت هي إللي تستحي مو إنت >> عمرة اربع سنين
الولد شكله إنسحر من يومها وهو كل ما جات أمه لأمها وهو طايح عندي وإذا ما فتحنا الباب ما يدقه غير رفس برجليه
وإذا خرجناة بالقوة يبكي ويصيح يبي يدخل غصب>> ما قلت لكم إن تسببت لنفسي
أنا صرت افكر واقول مافيه امل منهم غير إنهم يكبرون وماعاد يجوني
لكن ويش أسوي بامهاتهم إللي كل سنه وتحمل وحدة فيهم وابتلش فيهم أنا
وإذا كبروا وإرتحت منهم جو عيالي بعيالهم ونعيد ونزيد من أول وجديد
من كثر ما أطردهم واخاصمهم واصيح عليهم أحس نفسي صرت كراهه رغم إنه مو بيدي
أنا ما اكرهم لكن طفشت منهم لا وابو الشاب زعلان يبيني احمل بعد كل إللي صاير لي
يا بنات أعطوني الحل انا تعبت وربي إني تعبت وطفشت إيش أسوي فيهم
يااقلبي عليك ... يااعمري ماشاء الله
اكيد انتي حنوووووووووووونه وقلبك طيب .. وترا الاطفال يحسون بالحنان سبحان الله
انا كذا كل مااروح جمعة حريم .. يجتمعون اطفالهم عندي .. ومايخلوني اقدر اقعد مع الحريم هههههههههه
بس انا ما عندي اطفال فأقول في بالي اكيد ربي يعوضني سبحان الله ^_^
يااعمري ربي يريح قلبك ياااارب وان شاء الله البنات يفيدونك بخبرتهم حبيبتي
تقبلي مرووري ^_^