○●مشكلتي الغريبه والعجيبه ○●

السلام عليكم يا امهات

مثل ما انتو شايفين عندي مشكله غريبه وما اعرف اشرحها بس ان شاء الله تفهموا علي وتساعدوني
انا مثلكم ام لكن مسمى ام فقط يعني ماعندي مشاعر امومه مثل باقي اﻷمهات فجأه في شي بداخلي تغير وما ادري ايش بالضبط كنت حنونه جدا ع اطفالي احبهم موت واهتم فيهم لكن من 4 سنوات تغيرت صرت عصبيه واصرخ عليهم من اتفهه اﻷمور هذا غير اني ما عاد اهتم فيهم يعني ما اهتم بأكلهم ونظافتهم واصلا مايهمني اذا ناموا بالصاله والا المجلس ولا غرفتهم
تمر ايام وحتى اسابيع دون ما اضمهم او ابوسهم مثل كل ام
اذا راحوا المدرسه او طلعوا من البيت ما اشتاق لهم ولا اسأل عليهم
تصوروا حتى امي وخواتي ملاحظين اني مررره قاسيه عليهم
مرات كثيره اصررخ ع بنتي واضربها وما اخليها تتكلم وانزعج من صوتها
وابني الكبير قاسيه عليه وطول اليوم ارسله للبقاله والمغسله والصيدليه احيانا ارسله بعز الظهر ويرجع وهو عرقان ولا اهتم ﻷمره ومرات كثيره يقولي ابوه لعاد ترسلينه الظهر خافي الله بالولد وهو عمره 9 سنوات
وخوانه الصغار 7 5 3 سنوات تاركتهم طول الوقت لوحدهم اما جالسين بالصاله عند التلفزيون ولا يركضون ويصارخون

تعبت والله تعبت ما ادري ايش فيني ياربي احاول اهتم فيهم مثل قبل وموقادره ما ادري ايش اللي حصلي ما ادري وين اختفت مشاعري اللي قاهرني ان عيالي يكبرون وما حسوا بالحب واﻹهتمام من امهم اقرب الناس لهم
ساعدوني يا امهات قولولي كيف ارجع مثل قبل واحب عيالي واهتم فيهم واراعيهم
قولولي اذا فيه امهات مثل حالتي او مرض لاسمح الله يخلي اﻷم جافيه وبدون مشاعر
تكفون ساعدوني او ادعولي