مشكلتي امي ادخلو الله يسعدكم لاني ماراح اطول واحذف الموضوع

صباح الخير.. ممكن يكون موضوعي طويل لكن تحملوني شوي الله يسعدكم.. انا مشكلتي امي.. انا عمري 26 و وزوجي 37 عندي طفلين الصغير عمره 4 سنين.. امي ماتحب كثرة الأطفال مو بس ماتحب الا تكره هالطاري كره العمى ..
اخواني 3 وانا الرابعهمع انها صغيره عمرها 46 و اصغر واحد بالثانوي.. ..
مو مشكله انها ماتحب كيفها.. لكن المشكله تتحكم فيني.. يعني تهاوشني لاتحملين لاتكثرين عيال تقول خلاص الحمدلله عندك 2 لاتجيبين ادعيلهم بالصلاح وخلاص وشوله الحمل.. لاتحملين الناس ماتحب البزران ماتحب كثرتهم.. طيب وش علي من الناس انا احب الاطفال زوجي يحب الاطفال ويحب عياله الحمدلله ومو مقصر والله وده بطفل ثالث دايم يلمح لي خلاص ولدك عمره 4 سنين ماودك تجيبين لنا بنوته او ولد ودايم يلمح وانا اقوله لا ابي ارتاح كم سنه عيالك لسى صغار لاحقين ان شاء الله وهو يقول انتي صغيره بس انا كبير حلو لو تجيبين طفل الحين ولما تولدين.. يكون ولدك الصغير قرب ع الخمس سنين مناسب عمره وترتاحين كم سنه وتجيبين طفل بعد.. حلو لو عندنا اقل شي 4 أطفال او 5..
ويقول مابي اصير كبير وعيالي صغار ابي اهتم فيهم مادامي شباب وفعلا كلامه صحيح ومقتنعه لكن اكابر واكتم الي بداخلي واقول لا ابي ارتاح انا اتعب عيال وتربيه وبيت ومسؤولية ووو إلخ...
وهو يشوف كلامي كذا ويسكت علشاني علباله فعلا هذا السبب اللي مخليني مااحمل.. وبالحقيقه لا انا ودي لكن امي كاسره ظهري..
ومايدري عن كلام امي ماقلتله.. لان اعرف زوجي مايحب التدخلات لا من بعيد ولا من قريب ولو يحس ان تصرفاتي هذي بسبب امي والله ينجن ويقلب علي وتتحول حياتي جحيم زوجي طبعه زين معنا لكن عصبي مره لو احد حاول يتحكم فيه او يفرض رأيه عليه.. والله يتغير ويصير انسان ثاني ماعرفه وانا مابي اخسره واخسر حياتي ..
انا من بدايه زواجي مااطلع اسرار بيتي ولا انقل حكي من اهلي لزوجي يعني مقفله الباب عن الجهتين والحمدلله ماشيه حياتي..
والله ضايقه فيني الدنيا لدرجه احيانا ابكي انا ودي بالحمل وعندي الحمدلله القدره ومستعده لتربيه ليش مااحمل ودي احمل واجيب طفل افرح فيه انا وزوجي لكن امي عصبيه مرره وتدخل مرره لدرجه اول ماولدت كل يوم تدق علي وتزن تزن يلا روحي ركبي لولب حتى ماترضى اكل حبوب لأن ولدي الصغير حملت فيه وانا ماادري يعني نسيت كم حبه وحصل حمل...
وعلشان كذا هي خايفه استخدم الحبوب وانساهن واحمل تبغاني اركب اللولب علشان تكون متطمنه وترتاح اني ماراح احمل.. مررره حريصه وكل يوم داقه لين ركبته و ارتحت من زنها علي .. الحين كل فتره وفتره لما تسولف معي او لما اسير عليها الا ماتجيب طاري هالحمل تقول انتي هيه لاتفكرين بالحمل تكثرين البزران وانتي وانتي طبعا تسولف وهي معصبه..
ودايم تسولف عن وحده من قرايبنا جايبه 6 ماشاءالله وتقول كل سنه وهي والده ناقده عليها... يعني انتي ماتحبين البزران غيرك يحب ليش الا ماتتحكمين فيني.. يمكن تقولون عيالك ازعجوها أو شي . لا الحمدلله انا قايمه بنفسي حتى ولاداتي كلها فبيتي وزوجي يوديني المستشفى ويجيبني يعني ماعمري ضايقتها ولما اسافر لها كل بعد 3 اشهر اجلس اسبوعين ويجي زوجي ياخذني.. لدرجه تتمنى وتحاول فيني اجلس اطول لانها تنبسط علينا وعلى عيالي وتوكلهم وتلاعبهم وتموت بولدي الكبير خصوصا ولما ارجع لبيتي تدق تقول فقدتكم كنتم مونسيني وتحبني انا عارفه هالشي.. لكن عندها عقده من الاطفال ماتحب كثرتهم ماتحب فكره اني احمل وجيب مره ثانيه ..
متضايقه من تدخلاتها فيني بالحمل يعني هذا الشي راجع لي ولزوجي.. شسوي انا بين نار امي وزوجي وانا مع رأي زوجي لكن كاسره ظهري.. تعبت والله دايم افكر لمتى ما راح احمل يعني اجلس 3 او 4 سنين مااجيب صعبه والله وعارفه زوجي بيرجع ويفاتحني بالموضوع ماراح يسكت كل هالفتره هو ممهلني سنه او سنتين بالكثير يقول ارتاحي بعده بيقلب الموضوع جد وزوجي ماينعاند صعب مره .. وامي الود ودها اوقف خلاص على كلامها كافي 2 .. زوجي يحترم امي..
لكن ماعمري جبت له طاري هالشي لان مره قديمه قلت امي ماودها احمل الحين قسم انجن وكلاني بقشوري هذي حياتنا وش دخل الناس قلت لا لاني تعبت آخر ولاده وهي قصدها ارتاح كم سنه لما قلتله كذا الحمدلله سكت ومن بعدها ماعمري جبت طاريها ... ممكن تحسون هالموضوع عادي لكن لا والله الا هم كبير على صدري وشي يكسر الظهر لما تكونين نفسك بالحمل وزوجك يبغى وعندك القدره وتجي امك تمنعك من هالشي بالقوه ..
واتوقع حتى لو قلتلها من باب التخويف ان زوجي يبي يتزوج علي يبي عيال بتقول عادي خليه اهم شي انتي لاتجيبين شفتو كيف بالله عليكم شلون اتصرف وش اسوي تعب والله لاحول ولا قوة الا بالله..