مشكلتي انا وبنتي مع أبوها

أخواتي العزيزات بنات حواء

بعرض عليكم مشكلتي بعد ان ضاق خلقي وتعبت نفسيتي وايد
ان شا الله استفيد من نصايحكم وتقولو لي انا على حق ولا لا ..
ان متزوجة من 13 سنة وعندي خمسة اطفال .. زوجي ولله الحمد انسان متفهم ومتفتح ونادرا ماتحصل بيني وبينه اي مشاكل وفيه كل المواصفات اللي تتمناها الوحدة في شريك حياتها .. الا انه لما يغضب يتحول إلى شخص اخر .. وهذي الحالة لاتتكرر كثيرا يعني مرة كل ثلاث سنوات أو أكثر
ومثل مايقولون اتق شر الحليم اذا غضب
.................
بنتي اللي صارت معها المشكلة هي الكبيرة عمرها 12 سنه والحمدلله متحجبة عن اقتناع مو فرض مني انا وتحب ابوها موت وهو يموت فيها
المشكلة هذي المرة بدأت عندما طلب منا الخروج لزيارة أهله وأثناء استعدادنا للخروج نادى بنته وطلب منها تلبس دراعة (جلابية)>> أتوقع يبي يوري أهله ان بنته كبرت وصارت مرة ..
بس انتوا تعرفو ان البنات في هذا السن يحبون يكشخون ويتميزون في لبسهم.. والدراعات انا اشتريلها اياهم تلبسهم بالبيت مو برا
حاولت البنت تعترض .. بس هو أصر والبنت استسلمت على اساس ان احنا رايحين بيت جدها
المهم خرجنا وفي الطريق قال بنوقف مطعم نتعشى
قلت له خلينا ناخذ العشا وناكل في اي مكان .. قال لا احسن ننزل
قالت البنت بابا انا ماريد انزل .. نزل من السيارة وهو معصب وقال اللي يبي ينزل .. ينزل واللي مايبي بالطقاق
قلت لها نزلي لايزعل ابوج .. قالت ليش يزعل ما بي انزل بهالملابس
المهم قعدت البنت في السيارة وقعدت انا معها .. لان اختها الصغيرة نايمة في ايدي (6شهور)
وطبعا ما كان ممكن اخليها في السيارة بروحها ..
........
الحركة هذي غاضت ابوها .. وبعد ماتعشى مع بقية العيال ورجع للسيارة
قرر الغاء الزيارة .. وتوجه مباشرة إلى البيت
وهناك انفجر الوضع .. طبعا انا فضلت اني ادخل غرفتي .. بدلا من التدخل
ومسك البنت بهدلها .. لما كنت اسمع صوته .. كنت احس انه بيذبحها
بس بدون مايمد ايده عليها .. وخلاها تطلع كل ملابسها وتقطعهم بايدها ورماهم بالزبالة ..
وقالها خليك تعانديني مرة ثانية وماراح تلبسين الا هذي الملابس في البيت أو برا
والبنت مو فاهمة شو سوت ؟؟؟؟
وطبعا بعدها جا دوري انا .. وهوكان حاس اني انا اللي معصيتها عليه
مادري ليش جذيه فهم الموضوع ؟؟ وطبعا مافي مجال للمناقشة وهو في هذي الحالة ..
ونامت بنتي بدون ماشوفها .. وانا قلبي متقطع عليها لايصير فيها شئ
.......
في صباح اليوم التالي وكان يوم الخميس بعد ماصليت الفجر .. رحت اشوف بنتي واقومها للصلاة
قامت وهي تبكي وتقول لي .. عرفتي ابوي شو سوا ؟؟ وتتسائل وتقول ليش انا شسويت ؟؟
هو قال اللي يبي ينزل .. ما قال لي نزلي وانا رفضت
طبعا انا هديتها وقلت لها هذا ابوك ويحبك .. واللي صار لانه كان معصب
واليوم ان شاالله كل شئ بينتهي .. المهم قعدنا ان وياها فترة الصبح مع بعض
احاول انسيها وهي كل شوي تتذكروتبكي .. ومن الاشياء اللي كانت تقولها:
كيف بنسى اللي صار .. وكانت تقول اذا تذكرت هالسالفة في المدرسة ببجي جدام البنات
وكيف ازعل منه وانا احبه >> من كثر ماتحب ابوها ..
المهم طلبت منها ماتسوي نفسها زعلانة علشان مايزعل ابوها منها زيادة
وقلت لها خلي الموضوع عادي وكل شئ بينتهي
.......
وعلى العصر كان الموضوع انتهى وابوها عادي يكلمها وطلعها برا معاه
يزور اهله بس بالملابس اللي هو يبيها ..
.......
اللي تاعبني اني خليتها تواجه الموقف بدون مااتدخل
واحساسي ان هذا الموقف راح يضل بذاكرتها .. ويأثر على نفسيتها
خاصة انها تمر بمرحلة مراهقة وراح يخليها تخاف من ابوها ومستحيل تناقشه في أي شئ
وخايفة يفرض عليها هالملابس اللي ماتناسب سنها وتفكيرها
مع العلم بأني البس اي شئ ابيه ومايتدخل ..

أدري طولت عليكم .. بس مالي غيركم
قولو لي شو رايكم .. وكيف اتصرف معاه
مع العلم بأني انا وياه بعد ماتكلمنا ..