مشكلتي اني .....

السلام عليك اينما كنت يامن تقرأين سطوري ..
كنت دائما اتصفح هذا المنتدى وءأسف لحال الكثيرات اللاتي يغرقن وتسطر اناملهن لنا الامهن لنمد لهم يد النصيحة والمشورة وحتى لو ماعرفنا ايش نقول نكتفي بالدعاء .
وها انا اليوم الجأ اليكن بعد الله مولاي في الدنيا والاخرة لااعتراض على حكمه ولن تكون سطوري سوى فضفضة اخوية ورجائي انكن لن تبخلن بالمساعدة ...
قصتي من البداية انني انسانه طموحة لاتوجد لدي حدود , من صغري كنت اطالع في القمر واقول ودي امشي عليه , اناظر صور العلماء والادباء والمشهورين من الناس في الجرايد واقول انا لازم اطلع مثلهم لازم اكون انسانه يشير اليها بالبنان مثل مايقال لذا فقد اجتهت في دراستي وتفوقت على اخواني كلهم وكل سنه اطلع من اوائل في أي مرحلة دراسية الى ان وصلت الى اول سنه في الجامعة .
رفضت امي دخولي الى الجامعة بحجة اني خلاص انا بنت ويكفيني تعليم ولازم اتعلم شغل البيت علشان اتزوج واصير مثل كل بنات جماعتنا اللي تزوجوا وهم اصغر مني لكني بالعقل والمنطق ومساعدة ابوي الله يخليه لي دخلت الجامعة واصررت اني التحق بكلية الاقتصاد لاني حسيت اني راح انجح بهذا الطريق .
ابوي دائما كان يشجعني وما يبخل علينا كلنا بشيء مع انه انسان غير متعلم لكنه كان يبجل التعليم واصر على كل اخواني انهم يكملون دراستهم برا وانا اصر علي اني ادخل الجامعه واكمل وما اقعد ابدا في البيت , اتذكر يوم دخل الانترنت في السعودية كان ابوي اول من جابه البيت ووقتها كنت في المتوسط لكنه جلسني جنبه وسوالي ايميل وعلمني اشلون ادخل واتصفح وقال لي كلمة الى الان حافظتها قال ان ثقتي فيك بلا حدود حافظي عليها.
وقتها ماكنت اعرف ايش يعني لكن بعد وقت قصير عرفت , كلمته كانت الجدار اللي يمنعني اني اسوي أي شيء غلط ولما كبرت كبرت ثقته فيني لدرجة انه حتى امي ما تسألني عن صديقاتي لاني انا من كنت اجري وراها علشان اعرفها عليهم ومرت السنين وتخرجت من الجامعة وكنت من الاوائل على الدفعة .
اهلي فرحوا كثيير خاصة ان تقديري كان حلم ماجابه احد من اخواني يومها قال ابوي ليتك ولد كان راسي وصل القمر يومها فكرت ايش الفرق بين البنت والولد .
قبل تخرجي بسنه انخطبت بعد الحاح من اهلي ويوم تخرجت رحت اقدم على وظايف ويوم عرفت ان زوج المستقبل يبغاني اجلس في البيت فسخت الخطبة رغم معارضة الجميع رفضت أي احد يمنعني من طموحي خاصة اذا كان هذا الطموح ما يتعارض مع ديننا ومادام ان تفكيره ضيق كذا فالافضل الانسحاب .
للأسف رغم كل شيء حاولته مالقيت وظيفة مناسبة, راح تقولون غيرك كثير ورغم كذا ما كنت افكر بالزواج ابدا وتوجهت افكاري الى تحضير الماجستير .
المشكلة بدت من اسبوعين صحيت من النوم على صوت جوالي لما رديت كان هناك منحة لإكمال الدراسة في بريطانيا جاتني على طبق من ذهب , انا خلاص عقلي طار اخيرا احلامي راح تتحقق وخاصة ان البعثة سنه ونصف فقط ومختصة بنفس مجالي وراح تكون في جامعة مشهورة وطبعا لازم محرم يسافر معي والوظيفة مضمونة وبراتب خرافي بعد العودة وفي مكان ما كنت احلم فيه, كلمت اهلي والفرحة ما خلتني انام خاصة ان اخوي الصغير راح يطلع يدرس ووافقوا مانحي المنحة على دراسته على حسابهم لكن جاء رد ابوي قاسي بمعنى الكلمة
لا انت بنت والبنت ما تسافر الا مع زوجها
للأسف تحطمت , اول مرة في حياتي استسلم بدون دفاع حاولت اتكلم بس ما قدرت يعني مافي شيء يشفع لي ابدا . كل هذا التفوق والشهادات ما تنفع لاني بنت , حاولت مع اخواني يقنعون ابوي لكن كل واحد فيهم قال هذي المنحة ما تناسبك
للاسف ماهي المنحة اللي ما تناسبني لكن الغلط فيني انا بنت
كان علي من الاول ما احلم , ليش ما احد قالي انك بنت لا تحلمين لا تدرسين لاتتفوقين اجلسي في البيت سوي شاي وقهوة وانتظري عريس الغفلة
من اسبوعين وانا حالتي حالة ما قادرة انام ولا اكل ولا اشرب والعبرة خانقتني نفسي اصرخ واقول لكل الناس ليش حظي كذا ,قعدت ادعي حتى على الرجال اللي اتصل ليش يتصل علي انا ويحطمني ..الحين مالي رغبة في أي شيء لا وظيفة ولا أي زفت ماني قادرة اناظر في اهلي وحبست نفسي في غرفتي ما ادري الى متى ؟
ساعدوني اتجاوز هذا الاحباط احس اني بموت وماني قادرة استحمل نظرة الشفقة في عيون اخواني ..
كل ليلة ادي ربي يعوضني بس ماني قادرة انسى ..
انتظر ردودكم ..