مشكلتي اني بدويه وتزوجت حضري وعذااااابي

مشكلتي إني تزوجت واحد من الرياض يعني مو بدوي لا ومن عائلة ثرية جدا وأنا ساكنة عند أهلي بالديرة موقتا بسبب ظروف عمل زوجي وإذا جاء بالإجازة يأخذني عند أهله بس لنا شقة لحالنا..... ياربي أنا أموت من الفشيلة إذا جت الإجازة ورحت لحمولتي أحس نفسي أقل منهم بكل شي بيوتهم غير عن بيوتنا وأكلهم غير ولبسهم غير وهرجهم غيييير أحس نفسي ما أسوى إذا رجعت لأهلي أقول بنفسي عادي ليش الاحساس بالنقص كل واحد حسب بيئته يكفي اني طيبه معهم وانهم يحبوني لكن إذا رحت لهم اتغير 100 % ويرجع لي الاحساس بالنقص والله احيانا اتحسف اني تزوجت حضري مرات اقول لو متزوجة بدوي مثلي وجالسة بالديرة احسن لي أنا عندي ولد وبنت وأهل زوجي رررروعة ناس محترمين أمه صغيرة وهو بكر أهله تخيلوا يجيب لي صوره وهو صغير مصور عند برج ايفل حق فرنسا وانا اقول بنفسي لو يدري إني وقتها كنت ارعى غنم امي كان ماخطبني مرة رحت لهم وصلحوا لي عزومة حاطين الاكل على طاولات عاد انا بحياتي ما شفت أكل يحط على طاولات وكراسي إلا عند جيرانا أجانب تصدقون وقفت زي الخبلة مدري من وين أبدأ بعدين عرفت السالفة وصار العشاء بوفيه وانتي تخدمين نفسك بنفسك إلى الان اذا شفت بوفيه اتفشل واتذكر جهلي وغبائي امي تقولي ماعليك منهم هم خطبوك وهم يدرون انا بدو من القرى وانا مقتنعة بكلامها لكن إذا قربت رجعت زوجي خلاااااص انقلب وارجع احس بالنقص واهله عمرهم ماجرحوا شعوري بكلمة بس الفرق بيني وبينهم واااااااااااضح وصلت لحاله فضيعة لدرجة اني اسأل امي أقولها هم ليش خطبوني يعني خلصن بنات الرياض؟؟؟؟ ياربي اذا شفت بنات عماني اللي تزوجن من قرايبنا عايشات بالديرة احسدهن انهن ما تزوجن حضري مثلي احس انهن مرتحات نفسيا بكل مناسبة يظهر الفرق بيني وبين اهل زوجي ودايم تصير مواقف محرجة حاجات تفشششششل خصوصا يوم جو يخطبوني وإلا يوم ولدت وجو عندنا بالبيت تمنيت الموووووت ولا المواقف اللي صارت الحين قاعدة اقرى في النت زي المشفوحة عشان أحاول اتعلم لو حاجة بسيطة لأني أخاف زوجي يروح يتزوج علي وحدة حضريه من مستواه كان أموووووت من قهري على نفسي بس احس نفسي تايهه شوي يمكن بالطبخ استفدت من عالم حواء كثير بس اللبس وطريقة الكلام ماراح تتعدل عندي واذا حاولت اعدل كلامي اشوف انواع الطنازة والاستهزاء من اخواني وبنات عماني يقولون لي ماشاء الله تحضرتي!!! أقوم اتفشل وارجع على لهجة البدو.... باقي فقط تسعة شهور ويستقر زوجي في الرياض وراح ياخذني معه على طووول وهذا اللي انا شايله همه زوجي حبوب وطيب ويحترمني لكن أخاف مع الايام تفتح عيونه على اشياء ثانية واخاف يندم على انه تزوج بدوية بكرا راحح ينعزم وياخني معه واكيد راح استقبل الحريم في بيتي وهذا الشي مخوفننننننننننني بقوة لأنهم مجتمع راقي وناس اثرياء بس ماشاء الله ملتزمين وماحفظين ولا عندهم مياعة أو فسوق بالنعمة أحس مشكلتي مالها حل ............... الله يخليكن لا أحد يقولي لا يهمك وخليك قوية لأن الموضوع جد ماهو خرابيط والفرق بين مستواي ومستوى أهل زوجي فرق السماء عن الأرض والناس هالحين ماترحم