مشكلتي اني على وشك اني افسخ خطوبتي(ملكتي)

بناااات والله مررررة تعبانه ابا نصايحكم لو سمحتو

انا حاحكيلكم قصتي و ابا اسمع اراء كل وحده منكم اذا ما كان في اي مانع

انا عشت قصة حب مع واحد اتعرفت عليه و زي اي اتنين اتفقو على الزواج و كل شئ ..
و بالصدفة اهلي عرفو كل شئ و الحمدلله انه اهلي متفاهمين لأبعد الحدود يعني ما عاقبوني ولا حرموني من التلفون ولا شئ بس بالكلام و قلتله على كل شئ و انه ماقدر استمر عشان اهلي و كده المهم امه اتصلت انها تبا تيجي و تشوفني و تشوف ماما .. ماما وافقت بس ماما كانت خايفة انه الأم تطلع قوية و على قولتها تطلع عيني .. بس الحمدلله الام تحطيها على الجرح يبرد المهم ماما مررررة ارتاحت للام و (......) الي هو يعتبر زوجي حاليا خطيبي.. اتصل لبابا على اساس انهم يتقابلو و بابا يشوف انه كيف اخلاقه .. (......) المهم دايما يقولو الحب ما يوقف قدامه اي شئ الولد بابا قال عنهم انه باين علية كويس و ابن حلال و خلينا نسال عنهم .. المهم قعدو اهلي شهر يسالو و الحمدلله كل شئ طلع مرررررة كويس و انا استخرت و طلبت منه انه يستخير ..

المهم ماما اتصلت بالأم و قالتلها مرحبابكم عشان قرايت الفاتحه و كل شئ على حسب الاصول بس اتفقو من البداية بحكم انه (.....) لسا طالب في اخر سنة امتياز تقنية طبية انه اول ما يخلص و يبدأ يشتغل يعني بعد سنة ملكة و بعد سنة زواج ..

وهما وافقو وكلو سار كويس .. المهم جات فترة الخطوبة وكنا نشوف بعض فيها بس كنت احس انه حرام يشوفني لانه لسا ما سار زوجي ولا حاجة ومني قادرة اقرب منه اكتر لانه حرام انه يشوفني ولا يكلمني كتير المهم احنا عكسنا التقاليد وسرنا نتكلم بشكل جنوني وكان مستعد انه ينزل من مكة (ايام الحج) عشان يشوفني لمدة 5 دقايق و يرجع تاني
المهم
فتحت لبابا موضوع الملكة بعد 3 شهور و نص و فهمته و قلتله انه حرام وما يسير انه يشوفني ولا يكلمني و كل شئ
المهم (....) قال انه ما يقدر انه يسلم المهر دحين وكده لمن اتكلمت انا وبابا ((لأنه بابا معودنا على الصراحه التامة في الامور الي كده)) قال انه لا يربط الملكة بالمهر انشاءالله تملكو في الحرم و اول ما يحس نفسه مستعد انه يسلم المهر اوكي مافي مشاكل .. خاصة انه بابا حاسس بوضعية الشباب دحين الي يبو يتزوجو لأنه عانا مع اخويا

(...) جا و اتكلم مع بابا و كل شئ و سارت الملكة بعد اسبوع بالظبط
والله العظيم كانت اجمل ايام حياتي الين ما كملنا سنة
انا ليا حاليا سنة و 5 شهور

المهم كان دايما يقولي انه مضايق وانه مزنوق في الفلوس وكده المهم انه كانت كل ما تجيلو فلوس كان يصرفها في كلام فاضي لدرجة انه اخر مرررة دخل جمعية و استلم مبلغ 20 الف ريال ايش تتوقعو سوا فيها؟؟؟؟؟؟؟؟؟؟؟؟؟؟؟؟؟؟؟؟؟؟؟؟

اشترا بيها لاب توب
و غير انه يبا يشتري سيارة جديدة مع انه سيارته احدث موديل و اكشخ شئ و كل بعد فترة اقولي مدري ايش ما عندي فلوس ..
بصراحه مررة بنقهر احس انه ما بيسوي شئ علشانا انا وياة

خاصة يا بنات انه الفترة الاخيرة مرررررة متغير سار يكلمني من طرف خشمه كلامة سار كله تكبر في تكبر
لمن يكون نفسي اسوي شئ ما يخليني اكمل فرحتي
غير اني لمن اكون تعبانه و اتصلت فيه و قلتله ترا انا مرررررة تعبانه ايش تتوقعو قالي؟؟؟ قالي بلا دلع مافيكي شئ و قفل ولا عاد اتصل ولا حتى ارسل مسج يتطمن فيها على صحتي
هادا كله غير انه لمن سار يتصل انه نتكلم دقيقتين و نسكت امكن نص ساعه ساكتين اما اقعد انا اقرا في كتاب و هو يلعب في الجوال وغير انه كان يكلمني في وقت محدد و بعد نص ساعه لازم تلفونو يكون ويتنج يعني يتكلم معايا الين موعد معين بعدين يقفل و يشتغل الويتنق معاه و غير المكالمات الي في الجوال بالساعات و كل ما اسئله اقولي مع صاحبي مع انه قلبي حاسس مليون في المية انه مش صاحبة و في مررة اتصلت لقيت ويتنق و فتحه حبيت وقتها انه ادلع شوية قلت يمكن الحال يرجع زي ما كان قلتله فين بوستي والله عملها من غير نفس قلتله ايش دي قالي ايش بوسة قلتلها طيب من غير نفس قالي بس اسمها بوسة و صوتي بان انه زعل و هو حس بده الشئ ولا حاول انه يراضيني ولا حتى كلمني يا بناااااااات متخيلين انه في اليوم كله ما سرت اكلمه الا العصر و احيانا بس 5 دقايق في اليوم الواحد ؟؟؟؟؟

و كمان الشئ الاكبر انه من فترة ((قبل العيد )) قالي ابغا اسافرمصر في العيد رحلة علاجية مع صاحبي ((بصراحه الشك كان مليني)) المهم قلتله لا و زعل ومدري ايش (( قلت في نفسي ما في مشكلة يزعل يوم و يرجع لطبيعته المهم اصر انه يسافر قلتله روووح على طوول صليت الاستخارة و دعيت قلت (( يارب اذا كانت سفرته دي راح يكون وراها فتنة و اشياء ماهي كويسة الله لا يكتبها عليه )) و بالفعل اتكنسلت الرحلة من غير سبب
المهم و جات فترة قالي انه راح ياخد اجازة لمدة اسبوع عشان استريح فيها انا انبسط على بالي انه يبا يعوضني وانه راح ننبسط فيها بس الطامة الكبرى ايش سار ؟؟؟؟

قالى انه ارسلو المستشفى لمؤتمر في مصر لمدة اسبوع انا سكت بصراحه الكلام ما دخل راسي بالمرررررررررة

قلتله الله يوفقك ..
انا عندي قريبتي تشتغل في نفس المستشفى وقت ما سالتها قالتلي مافي السنة دي مصر اصلا اذا كان في في الكويت كمان لطب الاسنان مش تخصص زوجك
انا قلت في نفسي لا تفتحي الموضوع الا لمن تتأكدي مليووون في المية صاحب اخويا يشتغل من جوزي و قلتله اساله
و لمن ساله قاله مافي لا لو كان في كانت الناس كلها رايحه مصر لانها قريبة والناس تحب تروح مصر
و برضه كذبت نفسي
و كلمت مرت اخوياو قلتلها انه زوج اختها برضه مه زوجي و قالي نفس الكلام :44:
المهم فاتحته في الموضوع و قلتله انا عارفه انه مافي مؤتمرات في مصر ولا شئ المعم قعد يصرخ و يقولي خلاص اوكي انا كداب انا (.....سب.....) سألته تاني مررة قالي ايش اسويلك يعني ومدري ايش المهم قالي يا امي لو تبغي تلغي الارتباط الي بينا الغية
و قعد يقول خلا ما ابغا اتكلم معاكي بعدين سكت و قالي خلاص خليني اقفل دحين

و بكره هو مسافر حلفت يمين على نفسي اذا سافر ما جا الين حدي وراضاني راح افسخ كل شئ بينا لانه لو ما هميته من دحين ما راح اهمه بعدين ..

قلت لأهلي و اعز صحباتي الي يتمنولي الخير كلهم قالولي نفس الكلام
1- انه شكله يبغا يفسخ و بيستعمل اسلوب التطفيش
2- لو انه لو سنة و 5 شهور مو قادر يلم مهر متى راح يسوي البيت و يجيب العفش؟؟
3- قالولي انه مو حاططني في باله لأنه لو في بالو كان سوا شئ على الاقل لمستقبلنا
4- طفش مني
5- انه مل وما شاف احد من اهلي واقف و بيسأل و يقول انت وانت ايش سويت ؟
6- انه في وحده لافه عليه مظبوووط لأنه يستحيل يتغير في يوم و ليلة كده فجأة
7- ما سار يهتم بيا ولا بمشاعري ولا بأحاسيسي لدرجة اني لمن ازعل ولا اكون مضايقة زي اكون زي اي جدار اقعد اكلمة و افضفض و بعد ما اخلص اقولي والله دايخ و تعبان يالله باي

قولولي رايكم بصراحه ولا تبخلو عليا باي شئ