مشكلتي بسيطة بس أثرت فيني ..أتمنى الاقي حل..

والله ماعندي خبرة

واتمنى الاخوات يساعدونك


لكن اوصيك بحسن الظن في الله

والتفاؤل


وعدم اليأس

لا تخافين وقسمى وقتك للدراسة بشكل مضبوط وتوكلى على الله .. واكثرى من الدعاء ..
وتعوذى من ابليس ..
أهم شى يكون عندك هدف تبين توصلين له .. وبنفس الوقت ابذلى جهد .. وسالفة المكان يوم دخلتيه وما ارتحتى له .. يمكن انتى ماتعودتى تطلعين من مجتمع المدرسة لمجتمع الكليه .. حقيقه هو يختلف لكن اللى تبى شىء معين وهدف تبى توصل له لازم تذلل كل العقوبات اللى تعترضها .. ولا ليه سموه هدف ؟؟ عزيزتى اول ماتدخلين المكان او الكليه كونى لك صداقات بسيطه اقصد بمعنى زماله .. تقلل من احساسك بالغربه بداخل هالمكان ... علشان تلاقين وحده مثل همك و.. وتتشاركون بنفس الهموم وبنفس الاهتمامات ... وانشاءالله ماتشوفين الا كل خير

ما عرفت ليش انتي ما قادره تبقين في الكليه؟ هل لأنج تحسين انج ما راح تجيبين معدل، او في شي ثاني؟؟

سلام اختي..

اولا اللي راح.. راح.. خلاص لا تفكرين فيه.. بس حاولي تفكرين شلون تصلحين اللي راح.. و تتجنبين وقوعه مرة ثانية..

و هذا بيكون عن طريق عدة اسئلة تسألينها لنفسج و ان شاء الله من خلالها تقدرين تصلحين وضعج...

انا باعطيج مجموعة هالاسئلة لكن عقب ما اخبرج بمبدأ أو فكرة انا مشيت عليها طوول فترة دراستي و الحين صرت انصح فيها كل طالب و طالب و خاصة اللي قاعدين يكملون بالجامعة...

شوفي اختي.. كل انسان عنده في حياته ميول و رغبات معينة... لكن هالميول و الرغبات تخضع لعنصر مهم وااايد (و خاصة في مجال الدراسة) و هو القدرة و التمكن.. فهمتي قصدي؟؟؟

خليني اوضح لج اكثر.. يعني مثلا يصير احيانا انج تحبين مادة معينة او تخصص معين... لكن في نفس الوقت ما تكونين متمكنة منها و مو قادرة عليها.. يعني مثلا انا كنت اموووت على الفيزياء و الرياضيات.. و استمتع فيهم بس للاسف درجاتي فيهم كانت في النازل على طول...

و فيه مواد ثانية تحبينها و تميلين لها و تحسين انج متمكنة منها.. و درجاتج عال العال فيها...

طيب فيه مواد ما تحبينها و لا تطيقينها لكن درجاتج فيها ممتازة.. انا كنت اواجه هالشيء في مادة الاحياء مثلا

او مادة ما تحبينها و درجاتج ابددا مو لهناك فيها..

نصيحتي لج...

خذي ورقة و قلم... قسميها لاربع خانات.. حطي في الخانة الاولى: تخصص احبه و اقدر عليه.. و في الخانة الثانية :تخصص احبه بس ما اقدر عليه.. و في الخانة الثالثة: تخصص ما احبه بس اقدر عليه و في الخانة الاخيرة: نخصص ما احبه و ما اقدر عليه...

جيبي قائمة التخصصات في الكلية و حطيها جدامج .. و تمعني في المواد اللي بتدرسينها في التخصص و قيمي نفسج فيها على السريع.. و بعدين حطي كل تخصص في الخانة اللي تناسبه...

هذا راح يسهل عليج وووااايد مهمة اللف و الدوران و راح ينظم افكارج و يرتبها.. لانج الحين مبين انج ضايعة و متخربطة..

الحين نجي للاسئلة اللي لازم تسألين نفسج حول التخصص اللي بتدرسينه و المكان اللي بتختارين الدراسة فيه...

سألي نفسج...
طيب ليش انا اختار الكلية؟؟ او ليش اختار المعهد؟؟
شنو مميزات هذا و شنو مميزات هذا؟؟؟
شنو سيئات الكلية و شنو سيئات المعهد؟؟؟

و ان شاء الله من خلال هالاسئلة.. و اتباع هالطريقة راح تعرفين شنو تختارين...

و بعدين انتي الحين خايفة و مضطربة.. فتحسين عقلج موقف و لا قادرة تفكرين في اي شيء و حتى لو تفكرين افكارج راح تكون مخربطة لانج حاسة انه ما عندج وقت و مو قادرة تخططين عدل..

ان شاء الله هالطريقة تفيدج.. و ان شاء الله تطمنبنا عليج..

و سامحيني على الاطالة بس حبيت افيدج و الله..

موفقة اختي،،

اشكركم جزيل الشكر اخواتي الف معنى وصدقتي حسن الظن بالله اول خطوة.. واختي محتاجة قلب اشكرك على اسلوب طرح الجميل ومشكلتي عندي هدف لكن الوصول له غير موجود عندنا بالشرقية انا كنت احب علم النفس لكن كلية الدمام مافيها هالقسم ,,وبالنسبة للكلية انا بالعكس دخلت وكان معي شلة صديقاتي وكنا مبسوطين العام مع بعض لكني مانجحت واهالسنة قدمت ع المواد اللي حملتها وحملت بعد مادتين ,,والفصل هذا عندي مواد ومااعتقد راح انجح بتقديمهم لأن نظام الكلية زفت..مافيه مراعاة ..اختي زوونا هذا سبب عدم بقائي بالكلية..اختي ام جاورس اشكرك من كل قلبي على كلامك الجميل كفيتي ووفيتي بحسن اسلوبك والميول والرغبات خلتنا بس نعيش بخيييييييال وننتظر بكره وش مخبي لنا المشكله انا بالدمام ماعندي جامعة تحقق لي اللي اتمنى حتى المعاهد زفت والكليه بلى مراعاة..وانا انتظر السنة الجاية بخوف كبير محتارة وين اروح مره افكر بجامعة بفيصل اللي كثير ينصحوني فيها لان مافيه الا هي بس مشكلتها تخصصاتها ماتتلائم معي كيف ادرس شي مو من ميولي ..والكلية السنة الجاية بيسلموني ملفي ...وانا مادوي اجلس فاضية السنة الجاية’’.. بس من كل قلبي اشكر ردودكم اخواتي ..وحلولكم الحلوة..