مشكلتي تكسر الخاطر! من فيكم يعطيني حل؟

شلونكم اخواتي بنات حواء..
حبيت افتح لكم قلبي و اعرض عليكم مشكلتي و ابيكم تحكمون في النهاية..يمكن الاقي حل يريحني منكم..
انا بحرينيه..تزوجت من احد الأقارب وهو يعيش في بلد خليجي آخر "الكويت"..بس هو مو كويتي الجنسيه..هو عماني...فلما تقدم لي سألني وين تبين تعيشين ديرتج "البحرين "ولا "الكويت"؟كان شاريني ومستعد يسوي اي شي..انا الثورة مستانسه وطايره من الفرحه اني راح اسافر..ما فكرت في الغربه و لا اني راح انحرم من شوفة هلي وصديقاتي..قلت له وديني الكويت، وانا احب سوق الكويت وايد....
المهم تزوجته مع العلم انه وظيفته كلش صعبة وفي بلد ثاني"عمان" يشتغل في البترول و في الصحرا..حتى ما ينفع يوديني وياه..فهو يتركني لمدة شهرين و يسافر لشغله و يرجع لي لمدة شهر"..و فوق هذا كله اني قاعده عند اهله..لأنه يخاف يتركني في شقة بروحي..
طبعا انا توظفت في الكويت..وعاجبتني وظيفتي.. بس الوقت اللي يسافر عني و يخليني بروحي..اتملل وايد وماعرف شاسوي في عمري من الملل.وانا من النوع الحركي و الأجتماعي..وحياتي مرة وحدة تغيرت وصارت ممله.. بس الشهر اللي يرد فيه ارتاح اشوي...و ياليته كله لي..ثلثه حق هله، و ثلثه الثاني حق ربعه..

احس روحي متزوجة بالأسم.. دارت سنه على زواجنا، شفت فيها زوجي 4 شهور بس..

ففكرت اني احمل عشان ألهي نفسي بالياهل..و انشغل عن زوجي شوي..والحمدلله انا في شهري الثامن و باقيلي شويه واشوف ذريتي انشالله...

طبعا انا اشتكي كل شهر واطلب من زوجي يرحمني.. اني مو قادرة اتحمل الغربه في الكويت والملل اللي انا فيه وودي ارجع بيت هلي"في البحرين" في الوقت اللي يكون في دوامه"لمدة شهرين "في عمان...
وهوه معاند ومو راضي..ومو حاب اني ارجع بيت هلي لين تتعدل وظيفته ويحصل وظيفة مكتبيه..ويقول" انها مو عدله..ومو حلوه في حقه وسمعتة.. اني متزوجه و قاعدة عند ابوي..جنه مو قادر يحط لي بيت..وما يبي احد يصرف علي .."

وانا مصممه على رغبتي هذي..والحين الياهل بيحتاجني ليل نهار وابي امي تساعدني في كل شي..لأنه زوجي ما راح يكون موجود..فقلت له ابي استقيل وانتقل البحرين انا وولدي..ووقت رجعته من عمان..ارجع الكويت وانتلاقه في مكانه الصغير في بيت اهله..

وهو معاند ..ويقول روحي اولدي عند امج وقعدي كل فترة اجازتك..وبعدين ردي مكانج وردي لوظيفتج..وآخر مكالمه كانت كلها صياح ونياح..وقررنا انه نفتح الموضوع ويا هلي وانه راح يقنعهم يقنعوني..انه لمصلحتي ارد الكويت وامسك بيتي ووظيفتي.لأن شكلي قلط بالبحرين!!

فأنتوا شرايكم في مشكلتي العوييييصه الكريهه!! لاعت جبدي ملل..زهقه..شاسوي..اعاند مثل عناده..ولا انطم واسكت..واتقبل اللي اخترته..
وحطوا نفسكم في مكاني..شلون تتصرفون؟؟؟
:44::44::44::06: