مشكلتي شايفه حالي على زوجي

السلام عليكم ورحمة الله وبركاته..

ترددت كثير قبل اكتب الموضوع لي اسبوع وانا احاول واتراجع حتى قررت اليوم انزل مأساتي..

بنات بجد محتاجة مشورتكم .. ابغى كل وحدة فيكم تحط نفسها مكاني وتقولي ايش لازم اعمل؟؟

اقولكم المشكلة بالتفصيل وياليت توسعوا صدوركم معي..

انا جامعية موظفة واكمل الماجستير ولله الحمد ..

متزوجة من سنة وشهرين بالضبط ..

مشكلتي بدأت اول ماتوظفت .. طبعا جاء تعييني في قرية بعيدة جدا عن المنطقة اللي كنت عايشه فيها..

وكانت اول مرة اتغرب فيها .. واخذت معي امي واخواتي وعذبتهم معي في الغربة ..

كانت ايام صعبة علينا كلنا وكنت دايم اسمع شكوى اخواتي وتذمرهم .. ونفسيت امي تعبت بشكل كبير ..

وكل ماقدمت نقل يقولوا مايحق لك الا اذا تزوجتي.. ومن هنا جت فكرة زواجي مع اني زمان ماكنت افكر بالزواج نهائيا لاني ولله الحمد كنت عايشه حياتي بالطول وبالعرض ..

المهم خلال هذي الاحداث تقدم لي واحد من الاقارب... ووافقت بدون تردد ،، صحيح اني صليت الاستخارة بس يمكن عشان كل اللي في بالي اني انقل واريح امي واخواتي من الغربة..

حصلت مشاكل للسماء فترة الخطوبة بس برضه ماتراجعت في قراري ( وياليتني تراجعت بس ايش ينفع الندم الحين )

المهم تمت الزيجة واستمريت سنة كاملة وانا في قريتي وهو في مدينة ثانية نشوف بعض مرة كل شهر وفي الاجازات الرسمية

وكنا سمنه على عسل..



نسيت اقولكم ان زوجي اقل مني بكثير شهادته كفاءه متوسطة ودرس معهد متوسط مايساوي الثانوية وراتبه يجي نصف راتبي..

بس كل هذا مااخذت له اي اعتبار وقتها..




وجاء النقل..

وجاءت معه المشاكل..


بداية مشاكلنا كانت بسبب انقطاع راتبي فترة بسبب النقل ..

بس حاولت قد مااقدر اني استحمل وماتذمرت نهائيا بس كانت اعصابي تعبانة مررررة ..

وجاء موضوع دوامه يجي من الدوام العصر يتغدى وينام ،، يصحى من النوم متأخر ويروح لأصحابه..

وانا جالسه مقابله الجدران .. لا انيس ولا ونيس..

استكبرت هذا الموضوع طبعا كان في البداية نخرج احيانا سوى بعدها يقولي ماتخرجي حتى ماتتعودي..

بس كان يطلعني عند اقارب لنا .. بس طلعة انا وهو بس لا ..

عارفين يعني مايجلس معي ولا نخرج سوى..

يمكن انا من النوع المغرور بنفسه شوي ..

عارفين كنت متفوقة في الدراسة وعندي طموح والحمد لله وظيفتي كفتني ووفتني ..

استكثرت هذا الشي على نفسي ..

وصارت المشاكل بيننا على اتفه الاسباب ..

وصراحة حتى لو انا الغلطانة ماكنت اعتذر ولا افكر حتى..

ممكن اعمل كان شي ماصار بس اعتذر لا..

اسلوبي معه صار جاف جدا ..

صرت اشوفه ولا شي..

وهو زمان كان يراعيني .. كنت كل شي بحياته ..

الحين تغير الوضع ... صار يجافيني بزيادة لدرجة صار ينام بغرفة ثانية ..

وجاء اليوم الحاسم وطلبت الطلاق..

كلمت واحد من اخواني الشباب وقلت له "ماعدت قادرة على الاستمرار ابغى الطلاق"

وجمعنا اخوي اليوم لأكثر من ساعة..

وفضفض زوجي بكل اللي في قلبه..

عملت وعملت وتعمل ووووووو......

وانا؟؟؟

ماقدرت ارد؟؟

صح كل اللي قاله صحيح ..

لاني مو راضيه على حياتي معه ..

استكثرت اني اكون مجرد خادمة في البيت ..

طبخ وغسل وتنظيف بدون شكر او تقدير ..

بعدها جلس اخوي معي ..

وقالي كلام ماينقال..

تتوقعي لو تطلقتي بترجعي تعيشي زي لما كنت بنت؟؟

انت عارفه ان الناس بتشرهه عليك اكثر باعتبارك متعلمة ومثقفه وماقدرتي تحافظي على بيتك؟؟

وووووووو....

كلااااااااااااام كثيييييييييييييير..

ظلت في بالي نقطة واحدة .. مين يستحملك لو تطلقتي ..

وفي الاخر ..

طلب مني اني اعتذر من زوجي وابوس راسه ..

يقول لازم اتنازل حتى المركب يسير .. ولازم اطاطي للريح لاصارت قويه..

جلست ابكي اكثر من ساعة ..

مااقدر اسوي كذا..

مااقدر اتنازل هذي كرامتي..

يقولي هو عارف انك احسن منه عشان كذا مايجلس في البيت ..

مو عارفه الحين ايش اعمل..

طبعا هو ( زوجي ) من فترة ينام بغرفة ثانية ولما كان يكلمني اخوي طلع من البيت..

ولما جاء كنت لسى ابكي في الغرفة .. فـ سحب نفسه وراح ينام في غرفته ..

والحين مالي غير الله ثم انتم..

قولوا لي انصحوني ايش اعمل..

احس اني كرهته زيادة لما قالي عيوبي! وعمايلي فيه..

احس انه الحين شمتااااان فيني ..

ولو اعتذر بيشمت زيادة..

دلوني وانصحوني ايش العمل؟؟

بنات اترجاكم لا تطنشوني ولا تنسوني من دعائكم ..

انا في انتظاركم ..

وجزاكم الله عني كل خير..